តាមប្រភពព័ត៌មាន Big think បានឲ្យដឹងថា អ្នកវិទ្យាសាស្ត្រមួយក្រុមបានដឹងដោយចៃដន្យថា ពូជដង្កូវដែលធ្លាប់តែគេយកមកធ្វើជានុយស្ទូចត្រី អាចមានសមត្ថភាពរំលាយថង់ប្លាស្ទិកបាន។ នេះគឺជាការរកឃើញមួយដែលអាចជួយដល់ពិភពលោក ក្នុងការដោះស្រាយបញ្ហាសំណល់ប្លាស្ទិក។
ដង្កូវដែលស៊ីប្លាស្ទិក មានឈ្មោះថា Galleria Mellonella។ ក្រុមអ្នកវិទ្យាសាស្ត្រមួយក្រុម ដែលធ្វើការស្រាវជ្រាវសំរាប់ចេញផ្សាយក្នុងអត្ថបទ Current Biology មាន លោកស្រី Federica Bertochhini ដែលមកពីវិទ្យាស្ថានជីវៈវេជ្ជសាស្ត្រ និងជីវបច្ចេកវិទ្យានៃ Cantabria របស់ប្រទេសអេស្ប៉ាញ (Spanish Institute of Biomedicine and Biotechnology of Cantabria) លោក Paolo Bombelli និង លោក Christopher Howe មកពីសាកលវិទ្យាល័យ Cambridge ក្នុងចក្រភពអង់គ្លេស។
ការរកឃើញនេះ ធ្វើឡើងនៅពេលដែលលោកស្រី Bertochhini ដែលជាអ្នកចូលចិត្តចិញ្ចឹមឃ្មុំ យកដង្កូវនោះចេញពីក្នុងឡាំងដាក់ឃ្មុំ។ ដង្កូវនេះគឺជាសត្វចង្រៃសម្រាប់ការចិញ្ចឹមឃ្មុំ ព្រោះថាវាទៅនៅក្នុងឡាំងចិញ្ចឹមឃ្មុំផ្តេសផ្តាស។ លោកស្រីបានយកវាចេញ ហើយដាក់ក្នុងថង់ប្លាស្ទិក។ ក្រោយមកទើបលោកស្រីឃើញថង់ប្លាស្ទិកនោះធ្លុះ ដោយសារដង្កូវនោះស៊ីចេញមកក្រៅ។
ដោយសារតែឃើញដូច្នេះហើយ ទើបក្រុមរបស់លោកស្រីបានធ្វើការពិសោធន៍ទៅលើដង្កូវនេះបន្ថែមទៀត។ គេបានដាក់ដង្កូវច្រើនជាងមុនក្នុងថង់ប្លាស្ទិកមួយ រយៈពេលត្រឹមតែ១២ម៉ោង ដង្កូវទាំងនោះអាចរំលាយថង់ប្លាស្ទិកដល់ទៅ៩២មីលីក្រាម។ បន្ទាប់ពីបានរំលាយហើយ ដង្កូវទាំងនោះបន្សល់នូវសារធាតុ Ethylene Glycol ដែលជាសារធាតុប្រឆាំងនឹងការកក៕
ចែករំលែកព័តមាននេះ