រាជធានីភ្នំពេញ៖ នៅក្នុងសន្និសីទសារព័ត៌មាន នាព្រឹកថ្ងៃទី១២ ខែវិច្ឆិកា ឆ្នាំ២០២២ លោក គង់ ភោគ អ្នកនាំពាក្យផ្លូវការកិច្ចប្រជុំកំពូលអាស៊ានលើកទី៤០ បានថ្លែងថា ថ្នាក់ដឹកនាំប្រទេសទីម័រឡេស្តេបានសម្តែងនូវសេចក្តីរីករាយចំពោះសេចក្តីសម្រេចរបស់ប្រមុខដឹកនាំអាស៊ាន ពិសេសអរគុណកម្ពុជាដែលបានជួយជ្រោមជ្រែងក្នុងការជួយគាំទ្រប្រទេសទីម័រឡេស្តេចូលជាសមាជិកអាស៊ានទី១១។
លោក គង់ ភោគ មានប្រសាសន៍បញ្ជាក់យ៉ាងដូច្នេះថា «ក្នុងនោះ គាត់ក៏បានសម្តែងការអរគុណជាពិសេសដល់កម្ពុជាដែរ ដែលយើងតែងតែបង្ហាញពីការគាំទ្រទីម័រឡេស្តេចំពោះសំណើរសុំជាសមាជិកអាស៊ានទី១១ ដូច្នេះព័ត៌មានទាំងអស់នេះ គឺជាសប្បាយរីករាយមិនមែន តែសម្រាប់ប្រជាពលរដ្ឋ៦៥០លានរបស់អាស៊ានប៉ុណ្ណោះទេ ប៉ុន្តែគឺជាសេចក្តីសប្បាយរីករាយរបស់ប្រជាពលរដ្ឋទីម័រឡេស្តេទាំងអស់ផងដែរ»។
សូមបញ្ជាក់ថា ប្រមុខដឹកនាំអាស៊ាន កាលពីថ្ងៃទី១១ ខែវិច្ឆិកា បានជួបប្រជុំគ្នានៅទីក្រុងភ្នំពេញ ព្រះរាជាណាចក្រកម្ពុជា នាឱកាសកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធ និងបានឯកភាពថា «ជាគោលការណ៍ ទីម័រឡេស្តេត្រូវបានអនុញ្ញាតឱ្យចូលរួមជាសមាជិកអាស៊ានទី១១»។ ត្រង់ចំណុចនេះមានន័យថា ប្រទេសទីម័រឡេស្តេ បានទទួលលទ្ធផលវិជ្ជមានមួយកម្រិត តែនៅមិនទាន់ក្លាយជាសមាជិកពេញសិទ្ធិរបស់អាស៊ាននោះទេ។
យ៉ាងណាមិញ ទោះមិនទាន់ក្លាយជាសមាជិកពេញសិទ្ធិរបស់អាស៊ានក៏ពិតមែន តែមេដឹកនាំអាស៊ានក៏បាន ឯកភាព «ផ្តល់ឋានៈជាប្រទេសសង្កេតការណ៍ដល់ទីម័រឡេស្ត និងអនុញ្ញាតឱ្យទីម័រឡេស្ដេចូលរួម ក្នុងកិច្ចប្រជុំអាស៊ានទាំងអស់ រួមបញ្ចូលទាំងសម័យប្រជុំពេញអង្គនៃកិច្ចប្រជុំកំពូលអា ស៊ាន»។ ដើម្បីក្លាយជាសមាជិកអាស៊ានទី១១ ពេញសិទ្ធិ ប្រទេសទីម័រឡេស្ដេត្រូវបំពេញលក្ខណៈវិនិច្ឆ័យជាច្រើនក្នុងការទទួលបានសមាជិកភាពអាស៊ានពេញលេញ។
យ៉ាងណាមិញ ភ្លាមៗក្រោយការសម្រេចរបស់មេដឹកនាំអាស៊ានដែលបានឯកភាពជាគោលការណ៍ ទីម័រឡេស្តេត្រូវបានអនុញ្ញាតឱ្យចូលរួមជាសមាជិកអាស៊ានទី១១នោះ លោកប្រធានាធិបតីទីម័រឡេស្តេលោក José Ramos-Horta ក៏បានបង្ហោះសារលើផេកហ្វេសប៊ុកផ្លូវការរបស់លោកកាលពីថ្ងៃទី១១ ខែវិច្ឆិកា សម្តែងនូវអំណរ គុណដល់ប្រទេសកម្ពុជាក្នុងនាមជាប្រធានអាស៊ាននាឆ្នាំ២០២២នេះ និងរដ្ឋសមាជិកឯទៀតដែលបានជួយជ្រោមជ្រែងឥតឈប់ឈរសម្រាប់ការចូលជាសមាជិកអាស៊ាន។
លោក José Ramos-Horta បានសរសេរថា «ទីម័រខាងកើតស្វាគមន៍សេចក្តីថ្លែងការរបស់មេដឹកនាំអាស៊ានស្តីពីការស្នើសុំប្រទេសទីម័រខាងកើតសម្រាប់សមាជិកភាពអាស៊ានដើម្បីទទួលស្គាល់ទីម័រខាងកើតជាសមាជិកទី 11 របស់អាស៊ាន ហើយទន្ទឹងរង់ចាំធ្វើការជាមួយ ប្រទេសឥណ្ឌូនេស៊ីដែលនឹងធ្វើជាប្រធាននៅឆ្នាំ២០២៣។
ប្រធានាធិបតីរូបនេះបានបន្តថា «យើងមានសេចក្តីសោមនស្សរីករាយក្នុងការសហការ និងធ្វើការជាមួយក្រុមប្រឹក្សាសម្របសម្រួលអាស៊ាន និងលេខាធិការដ្ឋានអាស៊ាន ឆ្ពោះទៅរកការរៀបចំផែនទីបង្ហាញផ្លូវ និងសម្រាប់សមាជិកភាពពេញលេញរបស់ទីម័រខាងកើត រួមទាំងព្រឹត្តិការណ៍សំខាន់ៗដែលបានកំណត់នៅក្នុងរបាយការណ៍នៃបេសកកម្មស្វែងរកការពិត»។ «យើងស្នើឱ្យរដ្ឋសមាជិកអាស៊ានផ្តល់សមាជិកភាពពេញលេញដល់ទីម័រខាងកើតនៅឆ្នាំ 2023 បន្ទាប់ពីការរៀបចំស្នើសុំអស់រយៈពេល 11 ឆ្នាំ និងការអនុម័តផែនទីបង្ហាញផ្លូវ និងរាយការណ៍ទៅកិច្ចប្រជុំកំពូលអាស៊ានលើកទី 42»។ នេះជាការលើកឡើងរបស់ប្រធានាធិបតីទីម័រខាងកើត។
លោក José Ramos-Horta បានបន្ថែមថា «យើងទទួលស្គាល់ និងថ្លែងអំណរគុណចំពោះជំនួយឥតឈប់ឈរ និងការគាំទ្រយ៉ាងពេញទំហឹងពីរដ្ឋសមាជិកអាស៊ាន ជាពិសេសចំពោះព្រះរាជាណាចក្រកម្ពុជា សម្រាប់ការគាំទ្រឥតឈប់ឈរ និងការកោតសរសើររបស់យើងចំពោះដៃគូខាងក្រៅសម្រាប់ការផ្តល់ជំនួយកសាងសមត្ថភាព»៕
ចែករំលែកព័តមាននេះ