បុរសជនជាតិចិនបើករថយន្តបុករះគ្មានប្រណីដៃទៀតហើយ
រាជធានីភ្នំពេញ ៖ បុរសជាជនជាតិចិនម្នាក់ស្រវឹងស្រាជោកជាំបើករថយន្តឡិចស៊ីសរេចង្កូតទៅបុក
រាជធានីភ្នំពេញ ៖ បុរសជាជនជាតិចិនម្នាក់ស្រវឹងស្រាជោកជាំបើករថយន្តឡិចស៊ីសរេចង្កូតទៅបុកម៉ូតូឌុបមួយគ្រឿងរុញទៅបុកតូបបន្លែ តូបលក់ត្រី និងសាច់ជ្រូក នៅផ្សារព្រៃទា បណ្តាលឱ្យបុរសម្នាក់ និងស្ត្រីបីនាក់ទៀតរងរបួសយ៉ាងដំណំ ហេតុការណ៍ដ៏រន្ធត់នេះបង្កឱ្យមានការភ្ញាក់ផ្អើលឡើងកាលពីវេលាម៉ោង៩យប់ ថ្ងៃទី២៧ ខែមេសា ឆ្នាំ២០១៧ ត្រង់ចំណុចតាមបណ្តោយផ្លូវបេតុងអត់លេខ ខាងមុខនិងផ្សារព្រៃទា ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះទី១មានឈ្មោះ អំ ជ្រេង ភេទស្រី អាយុ៣៨ឆ្នាំ មុខលក់ត្រី ស្នាក់នៅភូមិកើតហេតុ របួសថ្លោះត្រគៀក, ទី២មានឈ្មោះ វ៉ាន់ថា ស្រីមុំ ភេទស្រី អាយុ២៨ឆ្នាំ មុខរបរលក់បន្លែ ស្នាក់នៅភូមិកើតហេតុ របួសថ្លោះត្រគៀក, ទី៣មានឈ្មោះ អៀង ស្រីកែវ ភេទស្រី អាយុ៣១ឆ្នាំ មុខរបរលក់សាច់ជ្រូក ស្នាក់នៅផ្ទះជួល ក្នុងភូមិកើតហេតុ របួសរយះជើងខាងស្តាំ និងទី៤មានឈ្មោះ គុណ ហ៊ន ភេទប្រុស អាយុ៣៥ឆ្នាំ មុខរបររត់ម៉ូតូឌុប ស្នាក់ផ្ទះជួលក្នុងភូមិកើតហេតុ របួសបែកក្បាល ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តមួយគ្រឿងម៉ាកឡិចស៊ីស RX300 ពណ៌ទឹកប្រាក់ ពាក់ស្លាកលេខភ្នំពេញ 2AL-0642 បើកបរដោយបុរសជនជាតិចិនម្នាក់ ក្នុងស្ថានភាពស្រវឹងជោកជាំធ្វើដំណើរតាមបណ្តោយផ្លូវបេតុងអត់ ក្នុងល្បឿនយ៉ាងលឿនទិសដៅពីកើតទៅលិច លុះមកដល់ចំណុចកើតហេតុក៏បានរេចង្កូតទៅខាងឆ្វេងទៅបុកនឹងម៉ូតូឌុបមួយគ្រឿងម៉ាកសង់កូរ៉េ ពណ៌ទឹកក្រូច បើកបរដោយបុរសម្នាក់ដែលឈប់ចាំបងនៅកន្លែងកើតហេតុបណ្តាលឲ្យដួលអូសរងការខូចខាតយ៉ាងដំណំរីឯអ្នកបើកបររងរបួសបែកក្បាល ចំណែករថយន្តបង្កនៅតែមិនទាន់អស់ល្បឿនក៏ជ្រុលទៅបុកនឹងតូបលក់បន្លែ លក់ត្រី និងសាច់ជ្រូក ដែលម្ចាស់គេកំពុងរៀបចំទុកដាក់ឈប់លក់ដូរដើម្បីត្រលប់ទៅផ្ទះវិញបណ្តាលឱ្យបន្លែខ្ទាតរាយប៉ាយពេញផ្លូវ ។
ចំណែកឯរថយន្តរងការខូចខាត់ធ្លាក់កាងខាងមុខនិងបែកធុងទឹកភ្លាមៗនោះប្រជាពលរដ្ឋនៅកន្លែងកើតហេតុផ្ទុះកំហឹងនាំគ្នាវាយទៅលើរថយន្តបណ្តាលឱ្យបែកកញ្ចក់ និងវាយអ្នកបើករថយន្តបណ្តាលឱ្យបែកក្បាលត្រូវបានសមត្ថកិច្ចយកទៅទុកនៅប៉ុស្តិ៍នគរបាលចោមចៅ ។
ក្រោយពេលកើតហេតុស្ត្រីរងគ្រោះចំនួនពីរនាក់ដែលជាអ្នកលក់បន្លែត្រូវបានប្រជាពលរដ្ឋដឹកបញ្ចូនទៅគ្លីនិកឯកជនដែលនៅជិតនោះ ចំណែកឯស្ត្រីម្នាក់ និងបុរសម្នាក់ទៀតត្រូវបានរថយន្តសង្គ្រោះដឹកយកទៅសង្គ្រោះនៅគ្លីនិក សម្ភពរស្មី ដោយឡែករថយន្ត អ្នកបើករថយន្តបង្ក និងម៉ូតូត្រូវបានសមត្ថកិច្ចជំនាញចរាចរណ៍ក្រុងចុះធ្វើការវាស់វែងយកទៅទុកនៅការិយាល័យចរាចរណ៍ផ្លូវគោករាជធានីភ្នំពេញដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ