រាជធានីភ្នំពេញ ៖ ឡុង សំណាង មកពីក្លិបសាលវ័ន្តកីឡា និងវេង សុភ័ក្ត្រ មកពីក្លិបកងទ័ពឆត្រយោងលេខ៩១១ ត្រូវបានគេរៀបចំឱ្យជួបប្រកួតជាមួយកីឡាករថៃក្នុងកម្មវិធីប្រដាល់សមរភូមិអ្នកប្រយុទ្ធនៅលើសង្វៀនទូរទស្សន៍ភីអិនអិននាថ្ងៃអាទិត្យទី៣០ មេសា ខានស្អែកនេះ ។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើល ថាតើកីឡាករកម្ពុជាទាំងពីររូបនេះមួយណាសម្រេចគោលដៅនៅពេលជួបកីឡាករថៃដែលសុទ្ធតែជាជើងខ្លាំងបែបនេះនោះ ។
ឡុង សំណាង ត្រូវជួបកីឡាករថៃឈ្មោះរេ ដា ក្នុងប្រភេទទម្ងន់៦១គីឡូក្រាម ។ កីឡាករថៃរូបនេះ មិនធ្លាប់មកប្រកួតនៅស្រុកខ្មែរទេពីមុនមក ដូច្នេះចំពោះប្រវត្តិប្រកួតរបស់គេមិនទាន់ដឹងថា ខ្លាំងឬយ៉ាងណានោះទេ ។ ប៉ុន្តែសម្រាប់អ្នករៀបចំការប្រកួតប្រចាំសង្វៀនទូរទស្សន៍ភីអិនអិន បានអះអាងថា គេជាអ្នកប្រដាល់ជើងខ្លាំងមួយរូបនៅក្នុងប្រទេសថៃ ។ រីឯឡុង សំណាងវិញមួយរយៈមកនេះមិនឃើញឡើងសង្វៀនញឹកញាប់ដូចមុនទេ ជាពិសេសសង្វៀនប្រដាល់អន្តរជាតិតែម្ដង ។ ដូច្នេះសម្រាប់ការជួបកីឡាករថៃលើកនេះធ្វើឱ្យអ្នកគាំទ្រភាគច្រើនចង់មើលយ៉ាងខ្លាំងព្រោះតែចង់ដឹងថា គូនេះអ្នកណាខ្លាំងជាងអ្នកណា ។
វេង សុភ័ក្ដ្រ មកពីក្លិបកងទ័ពឆត្រយោងលេខ៩១១ ត្រូវជួបប្រកួតជាមួយកីឡាករថៃឈ្មោះផេត អេក ក្នុងប្រភេទទម្ងន់៦១គីឡូក្រាម ។ កីឡាករថៃរូបនេះគេឃើញលេចមុខនៅលើសង្វៀនស្រុកខ្មែរជាច្រើនលើករួចមកហើយ មិនតែប៉ុណ្ណោះ ធ្លាប់ឆ្លងកាត់ការប្រកួតដណ្ដើមខ្សែក្រវាត់នៅលើសង្វៀនទូរទស្សន៍ភីអិនអិនទៀតផង ។ ឯវេង សុភ័ក្ដ្រ គឺជាអតីតជើងខ្លាំងមួយរូបប៉ុន្តែដោយសារបាត់មុខយូរមិនដឹងថាគេនៅខ្លាំងដូចមុនឬយ៉ាងណាទេ ។ ដូច្នេះសម្រាប់ការប្រកួតលើកនេះមានតែរង់ចាំមើលការប្រកួតជាក់ស្ដែងប៉ុណ្ណោះ ទើបដឹងថាអ្នកណាខ្លាំងជាងអ្នកណា ។
ចំណែកគូប្រកួតមិត្តភាពធម្មតាវិញ កីឡាករ ធន់ មករា មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ម៉ន វីវ៉ា មកពីក្លិបការិយាល័យទី៥កងទ័ពជើងគោក និងកីឡាករ ម៉ន វណ្ណី មកពីក្លិបការិយាល័យទី៥កងទ័ពជើងគោក ប្រកួតជាមួយកីឡាករ ប៊ុន សុធា មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ