ខេត្តកំពង់ស្ពឺ ៖ ហេតុការណ៍ក្រឡាប់រថយន្តដឹកកម្មការិនីដែលទៅបំពេញការងារនៅរោងចក្រ ព្រោះមានរថយន្តដឹកដីមួយគ្រឿងបើកចូលចំណែកផ្លូវរបស់ខ្លួន ទើបធ្វើឱ្យរថយន្តដឹកកម្មករចេញពីរថយន្តដឹកដីបណ្តាលឱ្យក្រឡាប់របួសកម្មករ កម្មការិនីជាច្រើននាក់ ហេតុការណ៍នេះ
ខេត្តកំពង់ស្ពឺ ៖ ចាត់ទុកថាសំណាងណាស់ទៅហើយដែលមិនមាននរណាម្នាក់ស្លាប់បាត់បង់ជីវិតក្នុងហេតុការណ៍ក្រឡាប់រថយន្តដឹកកម្មការិនីទៅបំពេញការងារ មូលហេតុដោយសារតែអ្នកបើករថយន្តគេចឡានដឹកដី ហេតុការណ៍នេះកើតឡើងនៅម៉ោង៦និង១០នាទីព្រឹក ថ្ងៃទី២៨ ខែមេសា ឆ្នាំ២០១៧ នៅផ្លូវលេខ៥១ ចន្លោះគីឡូម៉ែត្រលេខ ៤-៥ ភូមិអង្គតាឡឹក ឃុំសំបូរ ស្រុកសំរោងទង ។
មន្ត្រីនគរបាលស្រុកសំរោងទងបានប្រាប់ថា តាមការសាកសួរកម្មការិនីមួយចំនួន គឺមុនពេលកើតហេតុពួកគេបាននាំគ្នាជិះរថយន្តមកធ្វើការដូចសព្វមួយដង លុះមកដល់ចំណុចខាងលើក៏ជួបគ្រោះថ្នាក់ក្រឡាប់បែបនេះតែម្តង។ រថយន្តដឹកកម្មករដែលគ្រោះថ្នាក់នេះម៉ាកហាន់ដាយ ពណ៌ស បើកបរពីជើងទៅត្បូង លុះដល់ចំណុចខាងលើក៏មានឡានធំដឹកដីមួយគ្រឿងទៀតបើកបរចូលមកក្នុងទិសផ្លូវខាងខ្លួន ទើបធ្វើឲ្យអ្នកបើករថយន្តដឹកកម្មករជាន់ហ្វ្រាំងបន្ទាន់ ដើម្បីគេច ភ្លាមនោះក៏រេចង្កូតចូលទៅចិញ្ចើមផ្លូវទេរ ហើយផ្អៀងក្រឡាប់តែម្តង។ ចំណែកឯអ្នកបើកបររថយន្តដោយភ័យខ្លាចមានមនុស្សស្លាប់ក៏រត់ចោលរថយន្តបាត់ស្រមោលឈឹង ។
លោកចឹក បូរិន្ទ ប្រធានមន្ទីរការងាខេត្តកំពង់ស្ពឺ បានប្រាប់ផងដែរថា រថយន្តនេះដឹកកម្មករសរុប៤៥នាក់ កម្មការិនី រួមនឹងកម្មករសំណង់ប្រុសៗមួយចំនួន។ ក្នុងហេតុការណ៍នេះ បណ្តាលឱ្យមានអ្នករបួសសរុប១៥នាក់ ក្នុងនោះធ្ងន់ម្នាក់ដោយបាក់ដៃ។ ក្រោយកើតហេតុសមត្ថកិច្ច និងខាងមន្ទីរកាងារបានបញ្ជូនក្រុមកម្មករ កម្មការិនីរងគ្រោះ ទៅសម្រាកព្យាបាលនៅគ្លីនិកឯកជនរួចរាល់អស់ហើយ។ កម្មកររងគ្រោះទាំងអស់មកពីឃុំចាន់សែន ស្រុកឧដុង្គ ខេត្តកំពង់ស្ពឺ ពួកគេជាអ្នកបម្រើការងារនៅរោងចក្រឯខេត្តកណ្តាល។
ករណីនេះក្រុមកម្មការិនីជាច្រើនបានលើកឡើងថា បណ្តាលមកពីអ្នកបើកឡានដឹកដីបើកចូលចំណែកផ្លូវឡានដែលពួកគេជិះ ទើបបណ្តាលឱ្យគ្រោះថ្នាក់បែបនេះ ។ ចំណែកអ្នកខ្លះលើកឡើងថា បើកុំតែអ្នកបើកឡានពួកគេបើកគេចចេញពីឡានដឹកដីម្ល៉េះសមមិនដឹងជាមានមនុស្សប៉ុន្មាននាក់ស្លាប់នោះទេ។ ជាងនេះទៅទៀតអ្នកបើកឡានពួកគេទំនងគិតពីអាយុជីវិតក្រុមកម្មការិនីដែលនៅលើឡាន ទើបបើកគេរហូតធ្លាក់ជំរាលផ្លូវ បណ្តាលឱ្យក្រឡាប់បែបនេះ។
លោកចឹកបូរិន្ទបានបញ្ជាក់ថា ពេលនេះអ្នករបួសធ្ងន់កំពុងសំរាកបន្ត ចំណែកអ្នករងរបួសស្រាលតបាន វិលទៅលំនៅឋានវិញហើយ៕
ចែករំលែកព័តមាននេះ