ក្រុមប្រឹក្សាសន្តិសុខរបស់អង្គការសហប្រជាជាតិបានព្យាយាមអស់រយៈពេលច្រើនជាង១០ឆ្នាំមកហើយ ក្នុងការរារាំងកម្មវិធីអាវុធនុយក្លេអ៊ែររបស់កូរ៉េខាងជើង ប៉ុន្តែការធ្វើតេស្តនិងបាញ់គ្រាប់មីស៊ីលនៅតែកើតមាន ។
ទណ្ឌកម្មដែលបានដាក់លើប្រទេសនេះរួមមាន ហាមឃាត់ការធ្វើពាណិជ្ជកម្មអាវុធ និងសេវាកម្មហិរញ្ញវត្ថុ និងបិទមិនឲ្យនាំចេញរូបចម្លាក់អ្នកដឹកនាំបរទេសចេញពីកូរ៉េខាងជើងផងដែរ ។
ខាងក្រោមនេះ គឺជាផ្នែកទាំង៦ ដែលអង្គការសហប្រជាជាតិបានចេញសកម្មភាពតាំងពីឆ្នាំ ២០០៦មក ពេលដែលកូរ៉េខាងជើងធ្វើតេស្ដអាវុធនុយក្លេអ៊ែរដំបូង ៖
១-អាវុធ ៖
ការដាក់ទណ្ឌកម្មហាមឃាត់ការនាំចេញ-នាំចូលរាល់អាវុធតូចធំ ប៉ុន្តែបើយោងតាមសេចក្តីរាយការណ៍របស់អង្គការសហប្រជាជាតិ ដែលចេញកាលពីខែមុនឲ្យដឹងថា កូរ៉េខាងជើងបានរួចផុតពីការហាមឃាត់លើអាវុធនេះអស់រយៈពេលជាច្រើនឆ្នាំមកហើយ តាមរយៈក្រុមហ៊ុន និងអ្នកសម្របសម្រួលអន្តរជាតិជាច្រើន ដែលទទួលយកទាំងប្រាក់សុទ្ធ ឬមាស ។
២-ធ្យូងថ្ម រ៉ែថ្ម និងប្រេងឥន្ធនៈ ៖
ធ្យូងថ្ម គឺជាការនាំចេញសំខាន់ជាងគេរបស់កូរ៉េខាងជើង និងជាប្រភពដ៏សំខាន់មួយនៃរូបិយប័ណ្ណបរទេសសម្រាប់សេដ្ឋកិច្ចដ៏ទន់ខ្សោយរបស់ពួកគេ ។
អង្គការសហប្រជាជាតិបានហាមឃាត់មិនឲ្យប្រទេសជាសមាជិកទិញធ្យូងថ្ម និងទំនិញផ្សេងៗទៀតដូចជា រ៉ែដែក មាស និងរ៉ែថ្មមានតម្លៃពីប្រទេសនេះឡើយ ។
ធ្យូងថ្មភាគច្រើនរបស់កូរ៉េខាងជើង ត្រូវបាននាំចេញទៅកាន់ប្រទេសចិន ប៉ុន្តែកាលពីខែកុម្ភៈកន្លងមក ចិនបានប្រកាសពីផែនការផ្អាករាល់ការនាំចូលធ្យូងថ្មពីកូរ៉េខាងជើងពេញមួយឆ្នាំ២០១៧នេះ ។
៣-ផលិតផលប្រណីតៗ ៖
ការដាក់ទណ្ឌកម្មនេះ ក៏មានគោលដៅលើអ្នកមានអំណាចធំៗរបស់កូរ៉េខាងជើងផងដែរ ដោយហាមឃាត់ការលក់ផលិតផលប្រណីតៗដូចជា កប៉ាល់កម្សាន្ត គ្រឿងអលង្ការ និងកម្រាលព្រំថ្លៃៗ។
៤-សេវាកម្មហិរញ្ញវត្ថុ ៖
ក្រុមប្រឹក្សាសន្តិសុខរបស់អង្គការសហប្រជាជាតិបានព្យាយាមអស់រយៈពេលជាច្រើនឆ្នាំ ដើម្បីកាត់ផ្តាច់ការផ្តល់ថវិកាដល់កម្មវិធីអាវុធនុយក្លេអ៊ែរ និងមីស៊ីលរបស់កូរ៉េខាងជើង ។
យោងតាមសេចក្តីរាយការណ៍របស់អង្គការសហប្រជាជាតិ ដែលបានចេញកាលពីខែមុននេះឲ្យដឹងថា ពួកគេប្រទះឃើញភស្តុតាងថា កូរ៉េខាងជើងកំពុងតែប្រើប្រាស់បណ្តាញក្រុមហ៊ុនលួចលាក់ដើម្បីចូលទៅធនាគារទូទាំងពិភពលោក ។
៥-ការហាមឃាត់លើការធ្វើដំណើរ ៖
អ្នកដែលចូលរួមក្នុងកម្មវិធីអាវុធនុយក្លេអ៊ែររបស់កូរ៉េខាងជើង ឬធ្វើការក្នុងនាមជាអ្នកចូលរួម ត្រូវបានហាមឃាត់មិនឲ្យចូលទៅក្នុងរដ្ឋជាសមាជិករបស់អង្គការសហប្រជាជាតិឡើយ ។
អ្នកការទូត និងមន្ត្រីរដ្ឋការរបស់កូរ៉េខាងជើងត្រូវបញ្ជូនចេញ ហើយប្រទេសជាសមាជិករបស់អង្គការសហប្រជាជាតិ ត្រូវតែកាត់បន្ថយចំនួនបុគ្គលិកដែលបញ្ជូនទៅធ្វើបេសកកម្មការទូតនៅកូរ៉េខាងជើង ។
៦-ការអនុម័តទន់ខ្សោយ ៖
ការដាក់ទណ្ឌកម្មនេះមានប្រសិទ្ធភាពទៅបាន លុះត្រាតែរដ្ឋាភិបាលមានគោលបំណង និងសមត្ថភាពអនុម័តវា ។
អង្គការសហប្រជាជាតិគ្មានមធ្យោបាយឯករាជ្យណាមួយដើម្បីអនុម័តការហាមឃាត់ទេ ហើយប្រទេសជាច្រើនគ្មានធនធាន ឬគោលបំណងធ្វើតាមឡើយ ៕
ចែករំលែកព័តមាននេះ