សោកស្តាយ! តារាសម្តែងជើងចាស់ដ៏ល្បី១រូប បានទទួលមរណភាពហើយ
ហុងកុង ៖ ជារឿងសោកស្តាយមួយ បន្ទាប់ពីលោក Yu Chi-ming តារាសម្តែងហុងកុងជើងចាស់ដ៏ល្បី
ហុងកុង ៖ ជារឿងសោកស្តាយមួយ បន្ទាប់ពីលោក Yu Chi-ming តារាសម្តែងហុងកុងជើងចាស់ដ៏ល្បីប្រចាំទូរទស្សន៍ TVB ដែលតែងតែទទួលបានការគោរពយ៉ាងខ្លាំងពីសំណាក់មិត្តរួមអាជីព និងទស្សនិកជននោះ បានទទួលមរណភាពហើយ កាលពីថ្ងៃទី១០ ខែវិច្ឆិកា ឆ្នាំ២០២២ ម្សិលមិញនេះ នៅក្នុងអាយុ៧៨ឆ្នាំ ដោយរោគាពាធ។
ដំណឹងដ៏ក្រៀមក្រំនេះ ត្រូវបានប្រកាសដោយកូនប្រុសលោក Yu Chi-ming ផ្ទាល់តែម្តង ដោយបានបញ្ជាក់ដំណឹងនៃការលាចាកលោករបស់ឪពុកគាត់ដោយភ្ជាប់ជាមួយពាក្យសម្តីទៅកាន់ប្រព័ន្ធផ្សព្វផ្សាយហុងកុងថា «អរគុណសម្រាប់ការព្រួយបារម្ភរបស់អ្នកទាំងអស់!»។
កាលពីដើមឆ្នាំនេះ លោក Yu Chi-ming បានទទួលរងជំងឺដាច់សរសៃឈាមខួរក្បាល ហើយត្រូវបានបញ្ជូនទៅសម្រាកព្យាបាលនៅមន្ទីរពេទ្យ ដែលធ្វើឱ្យគាត់ពិការជាបណ្តោះអាសន្ននៃរាងកាយនៅផ្នែកខាងឆ្វេង ដោយត្រូវជិះលើរទេះរុញជាជំនួយ។
កាលពីថ្ងៃទី០៦ ខែវិច្ឆិកា កន្លងទៅ កូនប្រុសលោក Yu Chi-ming បានជូនដំណឹងដល់អ្នកគាំទ្រថា សុខភាពឪពុកគាត់កាន់តែចុះខ្សោយទៅពីមួយថ្ងៃទៅមួយថ្ងៃ ដោយមិនអាចទទួលទានអាហារបានដូចធម្មតា។ ហើយ៤ថ្ងៃក្រោយមក ដំណឹងមរណភាពរបស់តារាសម្តែងជើងចាស់រូបនេះ ក៏ត្រូវបានប្រកាសជាផ្លូវការ។
គួរបញ្ជាក់ថា លោក Yu Chi-ming បានលះបង់ពេលវេលា៤០ឆ្នាំនៃជីវិតរបស់គាត់ក្នុងវិស័យភាពយន្តជាមួយទូរទស្សន៍ TVB ។ គាត់ទទួលបានកេរ្តិ៍ឈ្មោះល្បីល្បាញ នៅទីនោះជាមួយនឹងស្នាដៃសម្តែងជាច្រើនដូចជា រឿង Journey To The West (យុទ្ធសិល្ប៍មហាទេពស្មើមេឃស៊ុន អ៊ូខុង), War and Beauty, Gods of Honor (ទេវបុត្រណាចា) រួមនឹងរឿងជាច្រើនផ្សេងទៀត។ មិនត្រឹមតែប៉ុណ្ណោះ លោកក៏ត្រូវបានគេរាយការណ៍ថា គឺជាអតីតអ្នកកាសែត ហើយតែងតែចូលចិត្តច្រៀងផងដែរ៕ (ប្រភពពី hype)
ចែករំលែកព័តមាននេះ