ខេត្តបាត់ដំបង ៖ បុរសប្រមឹកម្នាក់ត្រូវកម្លាំងសមត្ថកិច្ចឃាត់ខ្លួន ក្រោយពីស្រាវជ្រាវដឹងថា ជននេះបានប្រើប្រាស់ពូថៅគប់រថយន្តមួយគ្រឿងរហូតជាប់ផ្លែពូថៅនៅលើកញ្ចក់រថយន្តនោះ កាលពីយប់ថ្ងៃទី១០ វិច្ឆិកា នៅចំណុចខាងប៉ុស្ដិ៍រដ្ឋបាល ឃុំភ្នំសំពៅ ស្រុកបាណន់ ។
ជនដៃដល់ឈ្មោះ កយ កុសល ហៅវិត អាយុ៣២ឆ្នាំ នៅភូមិភ្នំសំពីលិច ឃុំភ្នំសំពៅ ស្រុកបាណន់ ។ ជននេះត្រូវកម្លាំងប៉ុស្ដិ៍រដ្ឋបាលឃាត់ខ្លួននៅព្រឹកថ្ងៃទី១១ វិច្ឆិកា ក្រោយពីសាក្សីនានាបានចង្អុលបង្ហាញ។ នេះបើតាមលោក ប៉ាន់ វ៉ាន់នី អធិការស្រុកបាណន់ បញ្ជាក់ប្រាប់កោះសន្តិភាពតាមទូរស័ព្ទ ។
លោក ប៉ាន់ វ៉ាន់នី បានប្រាប់ថា នៅយប់កើតហេតុ អ្នកភូមិបានឃើញឈ្មោះ កយ កុសល ហៅ វិតនេះ កាន់ពូថៅដែលមានសភាពស្រវឹងស្រាផង ហើយបានទាញពូថៅនោះគប់ទៅលើរថយន្តធុនធំមួយគ្រឿង ពេលកំពុងធ្វើដំណើរ បណ្ដាលឲ្យជាប់ផ្លែពូថៅលើកញ្ចក់រថយន្ត តែសំណាងល្អមិនប៉ះចំអ្នកបើកបរ ។ នៅចំពោះមុខសមត្ថកិច្ច ជនដៃដល់ឈ្មោះ កយ កុសល បានសារភាពថា ខ្លួនពិតជាបានទាញពូថៅគប់ទៅលើរថយន្តនោះមែន ។ ខ្លួនហាក់មានអារម្មណ៍តូចចិត្តនឹងប្រពន្ធរត់ចោល ទើបកើតមានគំនិតបែបនេះ ។
បើតាមសាក្សីដែលឃើញហេតុការណ៍បាននិយាយថា នៅថ្ងៃកើតហេតុ គេឃើញបុរសនេះផឹកស្រា.សផង ផឹកស្រាបៀរផង ស្រវឹងធ្លាក់ភ្នែកតាំងពីថ្ងៃ ។ លុះពេលយប់ គេឃើញកាន់ពូថៅ តែដឹងកាន់ទៅណាទេ ស្រាប់តែក្រោយមកឮថា ជននេះបានយកពូថៅគប់កញ្ចក់រថយន្តគេនៅលើថ្នល់ ។
សាក្សីបន្តថា អ្នកភូមិបានដឹងថា ជនដៃដល់គប់កញ្ចក់រថយន្តនោះ គឺឈ្មោះ វិត ព្រោះគេឃើញជននេះបានកាន់ពូថៅនោះតាំងពីក្បាលព្រលប់ម្ល៉េះ ទើគេរាយការណ៍ប្រាប់សមត្ថកិច្ចតែម្ដងទៅ ។
អធិការស្រុកបាណន់ លោក ប៉ាន់ វ៉ាន់នី បានបញ្ជាក់ដែរថា តាមពិតកម្លាំងសមត្ថកិច្ចបានដឹងមុខសញ្ញានេះតាំងពីពេលកើតហេតុភ្លាមៗ ហើយកម្លាំងជំនាញ ក៏បានដើរស្វែងរកជននេះភ្លាមៗដែរ តែរកមិនឃើញ លុះនៅព្រឹកថ្ងៃទី ១១ វិច្ឆិកា ទើបប្រទះឃើញជននេះក៏ឃាត់ខ្លួនតែម្ដង។ ពេលនេះមន្ត្រីជំនាញ កំពុងសួរនាំជនដៃដល់ចាត់ការតាមនីតិវិធីហើយ ៕
ចែករំលែកព័តមាននេះ