ខេត្តកំពង់ស្ពឺ ៖ អំពើហិង្សាបណ្តាលឱ្យមនុស្សម្នាក់ប្រកាច់ស្លាប់ក្នុងថ្លុកឈាមនៃពិធីមង្គលការមួយដែលបង្កឡើងដោយភាគីខាងកូនកំលោះ ព្រោះតែជនរងគ្រោះនៅតែរឹងរាំបទរាំអញ្ចែកៗ ហេតុការណ៍នេះកើតឡើងកាលពីវេលាម៉ោង២២និង៣០នាទីយប់ ថ្ងៃទី២៦ ខែមេសា ឆ្នាំ២០១៧ ស្ថិតក្នុងភូមិបឹងរនាល ឃុំព្រៃវិហារ ស្រុកគងពិសី។
ជនរងគ្រោះឈ្មោះ អ៊ុំ នាង ភេទប្រុស អាយុ៣៤ឆ្នាំ រស់នៅភូមិ-កើតហេតុខាងលើ ចំណែកជនដៃដល់ឈ្មោះ បញ្ញា ហៅអាញ៉ូយ អាយុ២២ឆ្នាំ រត់គេចខ្លួនបាត់ ត្រូវជាសាច់ញាតិកូនកំលោះ។ ចំណែកបក្សពួកជនដៃដល់៤នាក់ ក្នុងនោះ ១-ឈ្មោះ សុខ ស៊ីណារ៉ា អាយុ២៣ឆ្នាំ ២-ឈ្មោះ ឃឹម សុខរ៉ាន់ ភេទប្រុស អាយុ២៨ឆ្នាំ ៣-ឈ្មោះ ហោ ចាន់ស៊ីណា អាយុ២២ឆ្នាំ និង៤-ឈ្មោះគូ ប៊ុនរ៉ុង អាយុ២៥ឆ្នាំ ពួកគេមកពីភូមិឬស្សីវាល ឃុំកក់ ស្រុកបសេដ្ឋ ខេត្តកំពង់ស្ពឺ។
លោកវរសេនីយ៍ឯក ឃឹម សុផាន់រ៉ា អធិការនគរបាលស្រុកគងពិសីបានឱ្យដឹងថា នៅយប់កើតហេតុទាំងភាគីបង្ក និងជនរងគ្រោះបានមកចូលរួមមង្គលការបងប្អូនរៀងៗខ្លួន ដោយភាគីបង្កមកពីខាងកូនកំលោះ រីឯភាគីជនរងគ្រោះជាសាច់ញាតិខាងកូនក្រមុំ។ បើតាមការសាកសួរអ្នកដែលចូលរួម គឺក្រោយចប់ការទទួលភ្ញៀវមានកម្មវិធីរាំលេងកម្សាន្តផង ដោយជនរងគ្រោះបានឡើងច្រៀងចម្រៀងមួយបទចំណងជើងថា «ប្តីអាវាសែ» ស្រាប់តែជនបង្កស្ទុះទៅវាយនៅលើឆាកតន្ត្រីដោយចោទថា ច្រៀងដៀមដាមឱ្យខ្លួន។ ពេលនោះសាច់ញាតិទាំងសងខាងបានឃាត់ និងសម្រួលគ្នាដើម្បីបញ្ចប់រឿង ហើយជនរងគ្រោះក៏មិនប្រកែកតវ៉ាអ្វីដែរ ព្រោះយល់ថាមុននឹងក្រោយគង់ជាសាច់ឈាមនឹងគ្នា ក៏ព្រមតាមចាស់ ។ ដោយឡែកជនបង្កវិញមិនបាននិយាយអ្វីតបឡើយ គ្រាន់តែថា «បើមានបទរាំអញ្ចែក ឯងកុំរាំប្រយ័ត្នអញចាក់»។ គ្មានរណាម្នាក់ដឹងថា គេនៅចងគំនុំជាមួយជនរងគ្រោះឡើយ ក្រោយមកតន្ត្រីក៏ចាប់ផ្តើមប្រគំសាជាថ្មីដោយមានការសំណូមពរពីក្រុមអ្នករាំសុំឱ្យចាក់បទរាំអញ្ចែក ខាងតន្ត្រីក៏ចាក់ ពេលនោះជនបង្ករាំម្ខាង ហើយជនរងគ្រោះរាំនៅម្ខាង ស្រាប់តែជនបង្កឃើញជនរងគ្រោះកំពុងរាំក៏ស្ទុះទៅចាក់បណ្តាលឱ្យស្លាប់ ហើយរត់គេចខ្លួនបាត់តែម្តង។ ក្រោយពេលកើតហេតុសាច់ញាតិជនរងគ្រោះបានរាយការណ៍ឱ្យសមត្ថកិច្ចចុះទៅជួយចាប់ជនដៃដល់ តែគួរឱ្យស្តាយជនដៃដល់រត់គេចខ្លួនបាត់ទៅហើយ ដោយបន្សល់ទុកដែកឆាបនៅកន្លែងកើតហេតុ ក្រោយមកក៏បានឃាត់ខ្លួនបក្សពួកជនដៃដល់៤នាក់ ។
នៅព្រឹកថ្ងៃទី២៧ មេសានេះ សមត្ថកិច្ចនបានចុះមកពិនិត្យកោសល្យវិច័យឃើញថា ជនរងគ្រោះរងនូវការចាក់ចំក្រោមដោះខាងឆ្វេងដោយដែកឆាប ទើបស្លាប់បែបនេះ។ ក្រោយពិនិត្យចប់សពត្រូវសមត្ថកិច្ចបំពេញឯកសារ រួចប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី។ ចំណែកបក្សពួក៤នាក់ សមត្ថកិច្ចនាំមកកាន់អធិការដ្ឋាននគរបាលស្រុក ដើម្បីសាកសួរ និងកសាងសំណុំបញ្ជូនទៅស្នងការខេត្តចាត់ការបន្ត រីឯជនដៃដល់ដែលកំពុងរត់គេចខ្លួន សមត្ថកិច្ចកំពុងតាមស្វែងរកចាប់ខ្លួនយកមកផ្តន្ទាទោសផងដែរ៕
ចែករំលែកព័តមាននេះ