រាជធានីភ្នំពេញ ៖ ក្រុមហ៊ុនលំដាប់ពិភពលោក G.E Power ដែលមានមូលដ្ឋាននៅសហរដ្ឋអាមេរិក បានប្រកាសកិច្ចព្រមព្រៀងរោងចក្រថាមពលនៅកម្ពុជា ជាលើកដំបូង តាមរយៈភាពជាដៃគូសហការផ្នែកឌីជីថល ដើម្បីជួយបំពេញកំណើនតម្រូវការថាមពលក្នុងប្រទេសនេះ ។ នេះបើយោងតាមសេចក្ដីប្រកាសព័ត៌មានរបស់ក្រុមហ៊ុន កាលពីព្រឹកថ្ងៃទី២៦ មេសា ។
សេចក្តីប្រកាសព័ត៌មានដដែលឲ្យដឹងថា ការចុះហត្ថលេខាលើកិច្ចព្រមព្រៀងធ្វើឡើងរវាងក្រសួងរ៉ែ និងថាមពល និងក្រុមហ៊ុន G.E ដើម្បីដំឡើងប្រព័ន្ធគ្រប់គ្រងការបំភាយ Continuous Emission Monitoring System សម្រាប់តាមដាន និងវិភាគកម្រិតថាមពលបំភាយក្នុងរោងចក្រទូទាំងប្រទេស ហើយក្រុមហ៊ុន G.E Power និងធ្វើការជាមួយក្រុមហ៊ុន Toshiba Plant System & Services Corporation ដើម្បីផ្គត់ផ្គង់ឧបករណ៍សំខាន់ៗដល់រោងចក្រអគ្គិសនីដើរដោយធ្យូងថ្ម ខេត្តព្រះសីហនុ ។
លោក វិកទ័រ ចូណា អគ្គនាយកក្រសួងរ៉ែ និងថាមពល ត្រូវបានដកស្រង់សម្តីក្នុងសេចក្តីប្រកាសព័ត៌មាននេះថា រោងចក្រថ្មីនៅខេត្តព្រះសីហនុ នឹងដើរតួនាទីសំខាន់ក្នុងការជួយប្រទេសកម្ពុជាសម្រេចបាននូវគោលដៅរបស់ខ្លួនជាអាទិភាពខ្ពស់ ដើម្បីបង្កើតសមត្ថភាព និងសុវត្ថិភាពថាមពលកាន់តែប្រសើរ គាំទ្រដល់ការអភិវឌ្ឍជនបទ និងផែនការកំណើនសេដ្ឋកិច្ចជាតិ ។ ជាមួយការបំពាក់បច្ចេកវិទ្យាឈានមុខគេរបស់ក្រុមហ៊ុន G.E គម្រោងនេះនឹងមានប្រសិទ្ធភាពខ្ពស់ដល់រោងចក្រដើរដោយធ្យូងថ្មនៅកម្ពុជា ។
លោក Satoshi Sanada ប្រធានគម្រោងនៃក្រុមហ៊ុន Toshiba Plant System &Services Corporation ថ្លែងថា យើងបានជ្រើសរើសកញ្ចប់សេវារួមបញ្ចូលគ្នា ដែលពួកគាត់ផ្តល់យ៉ាងស័ក្តិសមបំផុតសម្រាប់ប្រតិបត្តិការជាក់លាក់ មានប្រសិទ្ធភាព តម្រូវការបរិស្ថាន និងការទាមទាររបស់រោងចក្រថាមពល CEL2 ថ្មី ។ ជាមួយបទពិសោធន៍ដ៏ល្បីល្បាញនៅលើពិភពលោករបស់ក្រុមហ៊ុន G.E និងអ្នកជំនាញក្នុងឧស្សាហកម្មថាមពល នឹងនាំមកនូវគុណតម្លៃបន្ថែមដែលរកបានពីភាពជាដៃគូយុទ្ធសាស្ត្រនេះ ។
ប្រធាន និងនាយកប្រតិបត្តិក្រុមហ៊ុន G.Eប្រចាំតំបន់អាស៊ាន លោក Wouter Van Werch មានប្រសាសន៍ថា ប្រព័ន្ធថ្មីនេះបានផ្តល់ជូនដោយក្រុមហ៊ុន G.E ជាផ្នែកមួយនៃ Steam Digital Suite របស់យើង នឹងអនុញ្ញាតឲ្យរាជរដ្ឋាភិបាលកម្ពុជាត្រួតពិនិត្យ វិភាគទិន្នន័យបំភាយដែលបានមកពីប្រភពផ្សេងៗ ហើយដើម្បីគ្រប់គ្រងប្រភពពាក់ព័ន្ធទាំងនេះសម្រេចបាននូវដំណើរការល្អប្រសើរ បង្កើនទំនុកចិត្ត និងប្រសិទ្ធភាពកាន់តែប្រសើរដើម្បីកាត់បន្ថយចំណាយប្រតិបត្តិការ និងផលប៉ះពាល់បរិស្ថាននៅមានកម្រិតទាប ។
លោកបន្តថា ៖ « វាជាប្រព័ន្ធដ៏អស្ចារ្យមួយ ជាមួយការវិវត្តគ្មានដែនកំណត់ចំពោះការបំភាយរបស់ឧស្សាហកម្មគ្រប់ប្រភេទ ដែលនឹងជួយអភិវឌ្ឍន៍ប្រទេស ខណៈរក្សាបាននូវទស្សនៈដ៏រឹងមាំទៅលើរបៀបវារៈបរិស្ថាន » ។
ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គិសនីកម្ពុជា លោក កែវ រតនៈ មានប្រសាសន៍ថា យោងតាមផែនការអភិវឌ្ឍន៍ថាមពល ប្រទេសកម្ពុជាកំពុងស្វែងរកការបង្កើនសមត្ថភាពបន្ថែមនៅទសវត្សរ៍ក្រោយនេះ ហើយយើងកំពុងស្វែងរកដំណោះស្រាយប្រកបដោយប្រសិទ្ធភាពបន្ថែមទៀតពីក្រុមហ៊ុនផ្សេងៗដូចជា G.E នៅក្នុងវិស័យចំហាយទឹក ដើម្បីជួយយើងឲ្យសម្រេចបាននូវគោលដៅនេះ ។
លោកបន្តថា ៖ « ធ្យូងថ្មនៅតែដើរតួនាទីសំខាន់ក្នុងការរលាយថាមពលរបស់ប្រទេសកម្ពុជានាពេលអនាគត ហើយយើងចង់ឲ្យក្រុមហ៊ុន G.E នាំមកនូវអ្នកជំនាញរបស់ខ្លួនដើម្បីបម្រើក្នុងវិស័យនេះផងដែរ » ៕
ចែករំលែកព័តមាននេះ