ខេត្ដបាត់ដំបង ៖ ក្រោយពីដាំក្បាលចុះយ៉ាងគំហុកនៃតម្លៃត្រសក់កាលពីប៉ុន្មានខែកន្លងទៅនេះ ធ្វើឲ្យកសិករមួយចំនួនត្រូវបង្ខំចិត្តបោះបង់ការដាំដុះនិងធ្វើចំណាកស្រុក ប៉ុន្តែពេលនេះតម្លៃត្រសក់ក៏បានហក់ឡើងវិញគួរឲ្យកត់សម្គាល់រហូតដល់១.៧០០រៀលក្នុង១គីឡូក្រាម ខណៈកាលពីជាង១ខែមុនតម្លៃត្រសក់នៅត្រឹមតែ១០០រៀលឬ២០០រៀលប៉ុណ្ណោះក្នុង១គីឡូក្រាម ឬស្ទើរតែគ្មានទីផ្សារតែម្ដង ។
អ្នកស្រី អឿត សារ័ត្ន អាយុ៣៥ឆ្នាំ ជាកសិករដាំដំណាំត្រសក់ រស់នៅភូមិត្រស់ ឃុំអូរតាគី ស្រុកថ្មគោល បាននិយាយទាំងទឹកមុខរីករាយថា កាលពីជាង១ខែមុនត្រសក់គាត់លក់បានតម្លៃតែ១០០រៀលទៅ២០០រៀលប៉ុណ្ណោះក្នុង១គីឡូក្រាម ឬស្ទើរតែគ្មានអ្នកទិញផង ។ ប៉ុន្តែពេលប្រមូលផលលើកនេះ ត្រសក់របស់គាត់លក់បានតម្លៃ១គីឡូក្រាមចាប់ពី១.០០០រៀល ដល់១.៧០០រៀល ។
កសិកររូបនេះបញ្ជាក់ថា បន្លែត្រសក់បានឡើងថ្លៃ ចាប់តាំងពីមុនថ្ងៃបុណ្យចូលឆ្នាំថ្មីរហូតមកដល់ពេលនេះ ។ គាត់សប្បាយចិត្ត និងត្រេកអរបំផុតនៅពេលត្រសក់មានទីផ្សារបែបនេះ ព្រោះគាត់បានសងសំណុលគេរួច ហើយនៅសល់លុយខ្លះសម្រាប់ផ្គត់ផ្គង់ជីវភាពគ្រួសារ។ អ្នកស្រីនិយាយទាំងទឹកមុខញញឹមថា បើតម្លៃនេះនៅថេរប៉ុណ្ណឹង គឺកសិករអាចរស់បានស្រួល មិនជំពាក់គេទេ ហើយក៏មិនចាំបាច់ធ្វើចំណាកស្រុកដែរ ។
កសិករមួយរូបទៀត ឈ្មោះឆាន់ ចិន្តា ភេទស្រី អាយុ២៦ឆ្នាំ បេះត្រសក់បណ្ដើរនិយាយបណ្ដើរថា តម្លៃត្រសក់ទើបហក់ឡើងខ្ពស់គួរសម ក្នុងរយៈពេលជិត២សប្ដាហ៍កន្លងមកនេះ ។ គាត់និយាយថា បច្ចុប្បន្ននេះត្រសក់១គីឡូក្រាមថ្លៃ១.៧០០រៀល ហើយឈ្មួញចុះទិញដល់ចម្ការ ថែមទាំងកក់លុយមុនទៀតផង ខុសពីកាលជាង១ខែមុនដែលត្រសក់១គីឡូក្រាមថ្លៃពី១០០រៀលទៅ២០០រៀល ហើយមិនសូវមានឈ្មួញទិញទៀតផង ។
អ្នកស្រី ឆាន់ ចិន្តា បានប្រាប់ថា បច្ចុប្បន្នគាត់ដាំត្រសក់លើផ្ទៃដីទំហំ១,៥រ៉ៃ(១រ៉ៃ=៤០ម៉ែត្រx៤០ម៉ែត្រ) ។ ពេលនេះគាត់ប្រមូលផលបានជិត១០តោនហើយ តែអាចនៅសល់ប្រហែល៧ទៅ៨តោនទៀតកំពុងបេះលក់ជាបន្តបន្ទាប់ ដែលឈ្មួញកណ្ដាលចុះទៅប្រមូលទិញដល់ចម្ការតែម្ដង ។ កសិកររូបនេះរំពឹងថា តម្លៃត្រសក់អាចឡើងបន្តរហូតដល់ខែមិថុនាខាងមុខ ព្រោះបន្លែត្រសក់នេះហាក់ស្បើយជាងប៉ុន្មានខែមុន ដោយសារតែកសិករមួយចំនួនបានបោះបង់ការដាំដុះ ដែលប្រឈមនឹងការខ្វះទឹកស្រោចស្រព និងបាក់ស្បាតកាលដែលតម្លៃធ្លាក់ចុះនាពេលកន្លងមក ។
ជាមួយនឹងទីផ្សារតម្លៃត្រសក់ហក់ឡើងវិញនេះ គេឃើញកសិករមួយចំនួននៅឃុំអូរតាគី ស្រុកថ្មគោល កំពុងមមាញឹកយ៉ាងខ្លាំងក្នុងការចាប់ផ្ដើមដាំដំណាំត្រសក់ឡើងវិញ ប៉ុន្តែកសិករភាគច្រើនបែរជាត្អូញត្អែរអំពីការខ្វះខាតទឹកស្រោចស្រពទៅវិញ ។ ប្រជាកសិករនិយាយថា ពេលនេះទីផ្សារបន្លែត្រសក់កំពុងល្អណាស់ ហើយកសិករជាច្រើនដែលបានបោះបង់កន្លងមក បាននិងកំពុងចាប់ផ្ដើមដាំឡើងវិញ តែកំពុងប្រឈមនូវបញ្ហាសំខាន់២ គឺការខ្វះទឹកស្រោចស្រពដំណាំ និងបញ្ហាអាកាសធាតុក្ដៅ ដែលនាំឲ្យប៉ះពាល់ផលដំណាំ ។ នេះជាការបារម្ភបំផុត ដែលអាចធ្វើឲ្យកសិករបរាជ័យក្នុងការដាំដុះ ៕
ចែករំលែកព័តមាននេះ