ពក.កគឺជាជំងឺមួយប្រភេទដែលបណ្តាលមកពីកង្វះជាតអីុយ៉ូដ ។ ជំងឺនេះស្តែងឱ្យដឹង និងពិនិត្យឃើញផ្ទាល់ភ្នែក ក៏ប៉ុន្តែអាចបណ្តាលមកពីជំងឺមហារីកផងដែរ ដូច្នេះហើយរាល់ពេលដែលមានបញ្ហាពកកកើតឡើង គឺទាមទារឲ្យអ្នកជំងឺពិនិត្យរកមូលហេតុឲ្យបានត្រឹមត្រូវ ។
លោកវេជ្ជបណ្ឌិតអ៊ុង នរិន្ទ អនុប្រធានផ្នែកត្រចៀក ច្រមុះបំពងក E3(អគារទី៣) នៃមន្ទីរពេទ្យព្រះអង្គឌួង និងជាសមាជិកសមាគម ត្រចៀកច្រមុះ បំពង់ក ក្បាលកម្ពុជា រៀបរាប់ប្រាប់កោះសន្តិភាពឲ្យដឹងថា ជំងឺពក.ក គឺជាការរីកធំឡើងនៃក្រពេញទីរ៉ូអីុដ ហើយក្រពេញទីរ៉ូអុីដនេះមានមុខងារសំខាន់ដូចជា ធ្វើឲ្យមានការរីកធំធាត់ទាំងឆ្អឹង និងសតិបញ្ញា ជួយបំបែកខ្លាញ់(បំផ្លាញខ្លាញ់) និងជួយបញ្ចេញអ៊័រម៉ូនធ្វើឲ្យបេះដូងដើរលឿនជាដើម ។ បើសិនជាក្រពេញនេះមានការរីកធំខ្លាំងដែលយើងហៅថាជំងឺពកក អាចនឹងបណ្តាលឲ្យមានផលប៉ះពាល់ជាច្រើនដូចជា៖
-ពិបាកលេបអាហារ ។
-ពិបាកបញ្ចេញសំឡេង ។
-ពិបាកដកដង្ហើម ។
-អាចធ្វើឲ្យប៉ះពាល់ទៅលើបេះដូង ។
-ប៉ះពាល់ផ្នែកអារម្មណ៍ ។
-ប៉ះពាល់ដល់មុខងារសរសៃប្រសាទ ។
-ធ្វើឲ្យមានបញ្ហាពុកឆ្អឹង ។
-ធ្វើឲ្យគ្រាប់ភ្នែករីកធំ ឬក្រហម និងអាចបណ្តាលឲ្យមានបញ្ហាស្បែកជាដើម ។
លោកវេជ្ជបណ្ឌិតបន្តទៀតថា ជំងឺពក.កមាន២ប្រភេទ គឺពកកធម្មតា និងពកកដោយសារ តែជំងឺមហារីក ។ ជាការណ៍ពិតជំងឺពកកនេះអាចបណ្តាលឲ្យអ្នកជំងឺស្លាប់បាន បើសិនជាពុំបានព្យាបាលឲ្យបានត្រឹមត្រូវ ជាពិសេសជំងឺពកកដែលបណ្តាលមកពីជំងឺមហារីក ។ ជំងឺពកកធម្មតាអាចព្យាបាលជាសះស្បើយបានមួយរយភាគរយ បើការព្យាបាលធ្វើឡើងជាមួយគ្រូពេទ្យជំនាញ និងត្រឹមត្រូវតាមក្បួនខ្នាត។ ដូចដែលលោកអ្នកមួយចំនួនបានដឹងហើយថា ជំងឺពក.កបណ្តាលមកពីការកង្វះជាតិអុីយ៉ូដ ។ អុីយ៉ូដ គឺជាជាតិរ៉ែខនិកមួយប្រភេទ ដែលមានសារសំខាន់ ក្នុងការវិវឌ្ឍទាំងការលូតលាស់ផ្នែកសរីរាង្គ និងសតិបញ្ញារបស់មនុស្ស ។ កង្វះជាតិអុីយូដធ្វើឲ្យប៉ះពាល់ដល់ការរស់នៅរបស់មនុស្សទាំងក្មេងទាំងចាស់ រួមទាំងសង្គមទាំងមូលផងដែរ ពិសេសអាចនាំឲ្យកើតមានជំងឺពក.កនេះតែម្តង។ ការការពារបញ្ហាកង្វះជាតិអុីយ៉ូដ ដោយបង្កើនការបរិភោគចំណីអាហារ ដែលសម្បូរជាតិអុីយ៉ូដទាំងចំណីអាហារធម្មជាតិ និងចំណីអាហារដែលបានដាក់លាយបញ្ចូជាតិអុីយ៉ូដដូចជា នំបុ័ង ទឹកត្រី ជាពិសេសអំបិលអុីយ៉ូដ ដែលជាជម្រើសល្អបំផុតសម្រាប់សុខភាព និងសុខុមាលភាពយូរអង្វែង ៕
ចែករំលែកព័តមាននេះ