រាជធានីភ្នំពេញ ៖ រហូតមកដល់ពេលនេះព័ត៌មានខ្ទរខ្ទារដែលបាចសាចក្នុងស្រទាប់មហាជនជុំវិញការចោទប្រកាន់ទៅលើតារាសម្តែង និងពិធីការិនីទូរទស្សន៍បាយ័នកញ្ញា ហេង កែវនីតា ថា ជាស្រីលក់ខ្លួននោះ ត្រូវតារា២នាក់
រាជធានីភ្នំពេញ ៖ រហូតមកដល់ពេលនេះព័ត៌មានខ្ទរខ្ទារដែលបាចសាចក្នុងស្រទាប់មហាជនជុំវិញការចោទប្រកាន់ទៅលើតារាសម្តែង និងពិធីការិនីទូរទស្សន៍បាយ័នកញ្ញា ហេង កែវនីតា ថា ជាស្រីលក់ខ្លួននោះ ត្រូវតារា២នាក់ការពារចំពោះភាពស្អាតស្អំរបស់នាង ។
តារាចម្រៀងកញ្ញាសុភ័ក្រ កុសម៉ា បានបញ្ចេញសារខ្លីមួយពាក់ព័ន្ធរឿងរ៉ាវថា «ចេះតែចោទហើយ អ្នកណាមិនដឹងទេ តែសម្រាប់គាត់មួយគឺអត់ជឿហ្មង គាត់ស្អាត ចរិតរួសរាយរាក់ទាក់ មិនឫ មិននិយាយមើលងាយគេ និយាយរួមគាត់គឺជាមនុស្សល្អ គួរឱ្យគោរព ។ សម្រាប់ខ្ញុំស្រលាញ់ សំខាន់គាត់ស្អាត» ។
ដោយឡែកតារាសម្តែងលោកអុឹម ជីវ៉ា ក៏បានអះអាងថា ការចោទបែបនោះមិនពិតទេ ។ លោកបានចាត់ទុករឿងនេះជាការបង្កើតឡើងដើម្បីមួលបង្កាច់ និងបង្ខូចកិត្តិយសរបស់កញ្ញាហេង កែវនីតា ប៉ុណ្ណោះ ។
លោកអឹុម ជីវ៉ា សរសេរថា «ឱ្យតែគ្នាឡើងមុខមាត់បន្តិចចាប់ផ្តើមកាច់បំបាក់គ្នា ខ្ញុំស្គាល់ផាន់ណា ហៅហេង កែវនីតា យូរហើយគឺតាំងពីរួមការងារជាមួយគ្នាក្នុងឆ្នាំ២០០៤ ក្នុងកម្មវិធីកុមារ«ខ្ញុំអាចធ្វើបាន» របស់ទូរទស្សន៍ប៉ុស្តលេខ៣ ។
នាងជាក្មេងស្រីល្អរួសរាយរាក់ទាក់ ចរិតស្លូតបូតចេះស្គាល់ចាស់ទុំ នាងពិតជាក្មេងតស៊ូណាស់ ទោះបីកាលនោះជីវភាពគ្នាលំបាកយ៉ាងណាក៏គ្នាមិនបោះបង់ចោលការ សិក្សាឡើយ គ្នាតស៊ូរហូតមកដល់ដំណាក់កាលនេះពិតជាមិនធម្មតាឡើយ ! គួរណាស់តែលើកសរសើរគ្នា ។
អ្នកដែលចោទនាងថា ស្រីលក់ខ្លួនគឺជាមនុស្សដែលចំណែកពីភាពលេចមុខមាត់ ល្បីរបស់នាង ក្នុងចេតនាបង្អាប់បង្ខូចកិត្តិយសនាងតែប៉ុណ្ណោះ ។ បើឈប់បានឈប់ទៅ ! អ្នកបង្ខូចគេក៏មានម្តាយជាស្រីដែរ ។ ខ្ញុំឃើញអីខ្ញុំនិយាយខ្ញុំនិយាយអ្វីតែជាការពិតតែប៉ុណ្ណោះ» ។
ដំណឹងពីការចោទប្រកាន់លើកញ្ញា ហេង កែវនីតា ថា ជាស្រីលក់ខ្លួន នេះត្រូវបានផ្សព្វផ្សាយតាមសារព័ត៌មានក្នុងស្រុកជាបន្តបន្ទាប់ ដោយយោងទៅលើការទម្លាយសារមួយដែលត្រូវបានផ្ញើទៅឲ្យប្រិយមិត្តមួយចំនួនជាអ្នកគាំទ្រនាង ។
សារមួយនេះត្រូវគេអះអាងថា បានចោទប្រកាន់កញ្ញា ហេង កែវនីតា ថាជាស្រីខូចលក់ខ្លួន ដណ្តើមប្តីគេ ក្នុងនោះថែមទាំងបានបញ្ជាក់យ៉ាងច្បាស់ថា ជាពិធីការិនីនៅទូរទស្សន៍បាយ័នថែមទៀតផង ។ សារមួយនេះបានបន្ថែមថា «ហេង កែវនីតា បានយកមុខរបរលក់ទឹកត្រចៀកកាំ ដើម្បីបិទបាំងមុខមាត់ពិតរបស់នាងប៉ុណ្ណោះ ហើយបានដាក់លេខតាមទូរទស្សន៍សម្រាប់អតិថិជនងាយស្រួលក្នុងការទាក់ទង» ៕
ចែករំលែកព័តមាននេះ