ខេត្តប៉ៃលិន ៖ ជនសង្ស័យម្នាក់ ក្នុងចំណោម២នាក់ ដែលត្រូវកម្លាំងកងរាជអាវុធហត្ថខេត្តប៉ៃលិន និងខេត្តបាត់ដំបង សហការគ្នាប្រតិបត្តិការ ចុះចាប់ឃាត់ខ្លួនបន្ទាប់ពីពួកគេបានចាប់បង្ខាំង(ជនជាតិថៃ) ខុសច្បាប់ កាលពីឆ្នាំ២០១៦ កន្លងទៅ។ រហូតមកដល់ថ្ងៃទី១២ ខែមេសា ឆ្នាំ២០១៧ ថ្មីៗនេះ មុនពេលបុណ្យចូលឆ្នាំខ្មែរប្រពៃណីជាតិ ត្រូវបានតុលាការខេត្តប៉ៃលិន ធ្វើការដោះលែងបាត់ទៅហើយ។ សូមបញ្ជាក់ថា ក្រោយទទួលបានដីកាលេខ២៦៣.២៦៤.២៦៥.២៦៦.ព.ស ចុះថ្ងៃទី០៤ ខែសីហា ឆ្នាំ២០១៦ ដែលបញ្ជាឱ្យចូលខ្លួន ដោយលោក សេង គឹមឡាក់ ព្រះរាជអាជ្ញារងអមសាលាដំបូងខេត្តប៉ៃលិន ក៏ធ្វើការឃាត់ខ្លួនជនសង្ស័យទាំង២នាក់តែម្តង។
ប៉ុន្តែរហូតដល់ព្រឹកថ្ងៃទី២០ ខែតុលា ឆ្នាំ២០១៦ ជនសង្ស័យទាំង២នាក់ ទី១- ឈ្មោះ កា ប៊ុនស ភេទប្រុស អាយុ៤៣ឆ្នាំ រស់នៅភូមិអភិវឌ្ឍន៍ ឃុំអន្លង់វែង ស្រុកអន្លង់វែង ខេត្តឧត្តរមានជ័យ ទី២- ឈ្មោះ ហ៊ាង សុភ័ក្ត្រ ភេទប្រុស អាយុ៣៦ឆ្នាំ រស់នៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ត្រូវបានគេរត់ការ ដើម្បីដោះលែងឱ្យនៅក្រៅឃុំម្តងរួចទៅហើយ ខណៈតុលាការមិនទាន់កាត់ក្តីនៅឡើយ។ ចំណែកការចាប់ខ្លួនជនសង្ស័យទាំង២នាក់ខាងលើ បានធ្វើឡើងនៅវេលាម៉ោង១២ និង៣០នាទី ថ្ងៃទី០៤ ខែសីហា ឆ្នាំ២០១៦ ស្ថិតនៅភូមិដំណាក់លួង សង្កាត់វត្តគ ក្រុងបាត់ដំបង ខេត្តបាត់ដំបង។
បន្ទាប់ពីទទួលបានដីកា កម្លាំងអាវុធហត្ថក្នុងមន្ទីរយុត្តិធម៌ខេត្តប៉ៃលិន ចំនួន៤នាក់ ដឹកនាំដោយលោក វរសេនីយត្រី នង វណ្ណនី ប្រធានមន្ទីរយុត្តិធម៌ សហការ ជាមួយកងរាជអាវុធហត្ថខេត្តបាត់ដំបង ចុះអនុវត្តន៍ដីកាបញ្ជាឱ្យចូលខ្លួនចំនួន៤ដីកា ដោយក្នុងនោះមានលេខ ២៦៣, ២៦៤,២៦៥, និងលេខ២៦៦ ព.ស ចុះថ្ងៃទី៤ ខែសីហា ឆ្នាំ២០១៦ ករណីការចាប់បង្ខាំងមនុស្សខុសច្បាប់ ចេញដោយលោក សេង គឹមឡាក់ ព្រះរាជអាជ្ញារងអមសាលាដំបូងខេត្តប៉ៃលិន។
ប្រភពព័ត៌មានបានឱ្យដឹងថា ជនសង្ស័យដែលចាប់ឃាត់ខ្លួនទាំង៤នាក់ ទី១- ឈ្មោះ កា ប៊ុនស ភេទប្រុស អាយុ៤៣ឆ្នាំ ទី២- ឈ្មោះ ហ៊ាង សុភ័ក្ត្រ ភេទប្រុស អាយុ៣៦ឆ្នាំ ទី៣- ឈ្មោះ ជាម យុទ្ធិដា ភេទប្រុស អាយុ៣៣ឆ្នាំ និងទី៤- ឈ្មោះ ហាស់ ញាណ ភេទប្រុស អាយុ៣៤ឆ្នាំ ក្រោយមកស្រាប់តែគេត្រូវរ៉ូវគ្នា ដោះលែងអស់ចំនួន២នាក់ ដោយប្រាប់ថា ជាប់ពាក់ព័ន្ធតែពីរនាក់ទេ ។ ក្រោយធ្វើការឃាត់ខ្លួនរួច វត្ថុតាងដែលរឹបអូសបាន មានប្រាក់បាតចំនួន១ម៉ឺនបាត (ប្រាក់ថៃ) ប្រាក់ខ្មែរចំនួន៤៤០០០០រៀល ខ្សែកលោហពណ៌លឿងមានចំនួន២ខ្សែ។
ខ្សែដៃមាសចំនួន២ខ្សែ ចិញ្ចៀនមាសចំនួន២វង់ នាឡិកាចំនួន២ខ្សែ ដោយ១ខ្សែធ្វើអំពីមាស និង១ខ្សែទៀត ធ្វើអំពីស្បែក។ ទូរស័ព្ទដៃចំនួន៦គ្រឿង និងរថយន្ត១គ្រឿងម៉ាកRANGE ROVER ពណ៌ខ្មៅ ពាក់ស្លាកលេខ ភ្នំពេញ 2U-22 67។ ប្រភពព័ត៌មានពីជនរងគ្រោះ ឈ្មោះ ណាត់ ថាក់ផុង ភេទប្រុស អាយុ៤៥ឆ្នាំ ជនជាតិថៃ ជាអាជីវករ រស់នៅខេត្តចាន់បូរី ប្រទេសថៃ បានឱ្យដឹងថា ជនសង្ស័យទាំង៤នាក់ខាងលើ បានចាប់ជំរិតពួកគេចំនួនបីនាក់ ទី១. រូបគេផ្ទាល់ ទី២.ប្រពន្ធគេ និងទី៣. មិត្តភក្តិរបស់គេម្នាក់ទៀត ដោយរឹបអូសយកមាស និងខ្សែដៃ ខ្សែក. សរុប១៧តម្លឹង ហើយទូរស័ព្ទដៃចំនួន៨គ្រឿង។
រហូតមកដល់ពេលនេះ មិនទាន់ត្រូវបានសមត្ថកិច្ច ឬតុលាការប្រគល់ជូនពួកគេវិញនៅឡើយទេ ហើយប្រហែលជាមានសង្ឃឹមតិចតួច ខណៈមានគេរត់ការដោះលែងជនសង្ស័យម្នាក់បាត់ទៅហើយ។ ពាក់ព័ន្ធទៅនឹងបញ្ហានេះ លោក តូច សុភក្តី ព្រះរាជអាជ្ញាអមសាលាដំបូងខេត្តប៉ៃលិន ដែលទើបនឹងឡើងកាន់តំណែងថ្មីៗ កន្លងទៅនេះ បានឱ្យដឹងថា គឺខាងលោកជាអ្នកដោះលែង ហើយសំណុំរឿងយ៉ាងណានោះ ចាំខាងលោកពិនិត្យមើលសិន ហើយក៏បិទទូរស័ព្ទភ្លាមៗ។ ចំណែកលោក លាង សួគ៌ ប្រធានសាលាដំបូងខេត្តប៉ៃលិន បានឱ្យដឹងកាលពីរសៀលថ្ងៃទី២៥ ខែមេសា ឆ្នាំ២០១៧ នេះថា ខាងលោកបានជម្រះសេចក្តីរួចហើយ ដោយបុរសម្នាក់ ឈ្មោះ ហ៊ាង សុភ័ក្ត្រ មិនជាប់ពាក់ព័ន្ធនឹងករណីចាប់ជំរិត ត្រូវបានតុលាការ ដោះលែងឱ្យមានសេរីភាពឡើងវិញ ។ ចំណែកឯបុរសម្នាក់ទៀតឈ្មោះ កា ប៊ុនស ដែលជាប់ពាក់ព័ន្ធនឹងករណីខាងលើ កំពុងជាប់នៅក្នុងពន្ធនាគារខេត្តប៉ៃលិននៅឡើយទេ៕
ចែករំលែកព័តមាននេះ