អ៊ីតាលី ៖ តាមប្រភពព័ត៌មាន Metro បានឲ្យដឹងថា បវរកញ្ញាដែលត្រូវបានមិត្តប្រុសជះទឹកអាស៊ីតដាក់នៅចំមុខ បានដាច់ចិត្តបង្ហាញស្នាមទៅកាន់សាធារណជនជាលើកដំបូង។
Gessica Notaro អាយុ២៧ឆ្នាំ
អ៊ីតាលី ៖ តាមប្រភពព័ត៌មាន Metro បានឲ្យដឹងថា បវរកញ្ញាដែលត្រូវបានមិត្តប្រុសជះទឹកអាស៊ីតដាក់នៅចំមុខ បានដាច់ចិត្តបង្ហាញស្នាមទៅកាន់សាធារណជនជាលើកដំបូង។
Gessica Notaro អាយុ២៧ឆ្នាំ ដែលធ្លាប់ជាប់ជាបវរកញ្ញាឯកលេខមួយ ក្នុងកម្មវិធី Miss Italy កាលពីឆ្នាំ២០០៧ បានឡើងក្នុងកម្មវិធីទូរទស្សន៍មួយនាថ្ងៃនេះ។
នាងបាននិយាយក្រោយពេលបើកបង់បិតរុំរបួសលើមុខនាងចេញថា «ខ្ញុំចង់ឲ្យអ្នកទាំងអស់គ្នាឃើញនូវអ្វីដែលអតីតមិត្តប្រុសរបស់ខ្ញុំបានធ្វើមកលើខ្ញុំ។ នេះមិនមែនជាស្នេហាទេ»។
ពិធីករ Maurizio Costanzo បានប្រាប់ទៅនាងថា មិនចាំបាច់បើកឲ្យគេឃើញទេ។ តែនាងនៅតែចង់ធ្វើដូច្នោះ។
មុខរបស់នាងរងគ្រោះដោយទឹកអាស៊ីត កាលពីថ្ងៃទី១០ ខែមករា ដោយសារស្នាដៃរបស់អតីតមិត្តប្រុសរបស់នាង។ នាងបានទទួលការវះកាត់ ដើម្បីព្យាបាលកុំឲ្យពិការភ្នែកខាងឆ្វេង។
នាងបានចោទប្រកាន់អតីតមិត្តប្រុសរបស់នាង Jorge Edson Tavares ថា ជាអ្នកប្រព្រឹត្ត។ តាំងពីពេលនោះមកដល់សព្វថ្ងៃ គេនៅជាប់ពន្ធនាគារមិនទាន់ចេញទេ។
អ្នកទាំងពីរបានបែកគ្នាកាលពីខែសីហាឆ្នាំមុន ដែលបន្ទាប់មកពួកគេកាន់តែមានភាពរកាំរកូស ក្រោយពេលនាងបានប្រាប់អាជ្ញាធរថា Jorge បានលួចតាមមើលនាង។ ក្រោយពីមានភាពរកាំរកូសរួចមក Jorge បានគម្រាមនាងថា នឹងជះទឹកអាស៊ីតដាក់នាង។
នាងប្រាប់ថា៖ «នៅពេលដែលអាស៊ីតកំពុងតែនៅលើមុខរបស់ខ្ញុំ ខ្ញុំបានលុតជង្គង់ហើយបន់ស្រន់ទៅព្រះជាម្ចាស់ ថាបើយកសម្រស់ខ្ញុំក៏យកចុះ តែទុកភ្នែកខ្ញុំឲ្យបានមើលឃើញផង»។
ទោះបីជាសម្រស់របស់នាងបានបាត់បង់ក៏ដោយ ក៏នាងនៅមានសម្លេងដ៏ពិរោះ ដែលធ្វើឲ្យនាងមានទំនុកចិត្តក្នុងការចេញអាល់ប៊ុមបទចម្រៀងនាពេលឆាប់ៗនេះ៕
ចែករំលែកព័តមាននេះ