រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់មជ្ឈមណ្ឌលសកម្មភាព កំចាត់មីនកម្ពុជា (CMAC) ថ្ងៃទី១៤ កញ្ញា ឱ្យដឹងថា កាលពីដើមខែកញ្ញានេះ មជ្ឈមណ្ឌលសកម្មភាពកំចាត់មីនកម្ពុជា ទទួលបានឧបករណ៍ដោះមីនធុនធ្ងន់សំរាប់ការអនុវត្តរបស់ខ្លួនលើគំរោងបោសសំអាតមីនសមាហរណកម្ម និងជួយសង្គ្រោះជនរងគ្រោះនៅក្នុងប្រទេសកម្ពុជា ក្នុងគំរោងបង្កើតសន្តិភាពដែលគាំទ្រដោយរដ្ឋាភិបាលជប៉ុន ។ សេចក្តីប្រកាសព័ត៌មានដដែលបានឱ្យដឹងទៀតថា ក្រៅពីទទួលបានឧបករណ៍ដោះមីននោះ បុគ្គលិករបស់ CMAC នឹងទទួលបានការបណ្តុះបណ្តាលផ្នែកប្រតិបត្តិការ និងថែរក្សាឧបករណ៍ដោះមីនដោយយោងតាមស្តង់ដា និងនីតិវិធីសុវត្ថិភាព ។
ឧបករណ៍ដោះមីននេះត្រូវបានផ្តល់ឱ្យដោយរដ្ឋាភិបាលជប៉ុនកាលពីដើមខែកញ្ញាកន្លងមក ក្រោមគំរោងផ្តល់ជំនួយដើម្បីទប់ស្កាត់ជំលោះ និងការបង្កើតសន្តិភាព ហើយក្រុមរៀបចំ និងគ្រប់គ្រងជាន់ខ្ពស់របស់ CMAC និងបុគ្គលិកសំខាន់ៗ មកពីក្រុមហ៊ុនផលិតឧបករណ៍ដោះមីននេះបានធ្វើការត្រួតពិនិត្យឧបករណ៍ ។ ក្នុងឱកាសនោះដែរ បុគ្គលិករបស់ CMAC ត្រូវបានជូនដំណឹងអំពីការបណ្តុះបណ្តាលស្តីអំពីការប្រើប្រាស់ និងរបៀបថែរក្សាឧបករណ៍ដោះមីននេះ ។
គំរោងបង្កើតសន្តិភាពជាកម្មវិធីបោសសំអាតមីនសមាហរណកម្ម និងជួយសង្គ្រោះជនរងគ្រោះដែលគាំទ្រដោយរដ្ឋាភិបាលជប៉ុន ហើយជាគំរោងសកម្មភាពកំចាត់មីនសមាហរណកម្មដំបូងគេរបស់ CMAC ដែលត្រូវបានអនុវត្តដោយការបញ្ចូលគ្នារវាងការដោះមីន និងសកម្មភាពអភិវឌ្ឍន៍នៅតាមសហគមន៍ក្នុងខេត្តបាត់ដំបង ។ គំរោងមានរយៈពេល៣ឆ្នាំនេះដែលចាប់ផ្តើមកាលពីខែមករា ឆ្នាំ២០១០បានរៀបចំផែនការថវិកាចំនួន១១លានដុល្លារ សំរាប់ចំណាយលើឧបករណ៍ និងផ្តល់មូលនិធិដល់ប្រតិបត្តិការបោសសំអាតមីន និងការជួយតាមសហគមន៍ ។ CMAC បានធ្វើជាដៃគូជាមួយប្រព័ន្ធសហប្រតិបត្តិការអន្តរជាតិជប៉ុន (JICS) ដើម្បីបោសសំអាតដីដែលមានយុទ្ធភណ្ឌមិនទាន់ផ្ទុះនៅខេត្តបាត់ដំបង និងដើម្បីផ្តល់ដីប្រកបដោយសុវត្ថិភាពដល់សហគមន៍ ។ លើសពីនេះទៀត គំរោងនេះនឹងជួយធ្វើឱ្យមានលក្ខណៈកាន់តែប្រសើរឡើងនូវបែបបទរស់នៅក្នុងតំបន់តាមរយៈការអភិវឌ្ឍជានិរន្តរ៍មានដូចជាការកសាងផ្លូវប្រឡាយទឹក និងផ្តល់ការបណ្តុះបណ្តាលផ្នែកកសិកម្ម ។
លោកហេង រតនា អគ្គនាយក CMAC និងជាទីប្រឹក្សាសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ថា «ឧបករណ៍ដោះមីនដែលផ្តល់ឱ្យដោយរដ្ឋាភិបាលជប៉ុននេះ នឹងផ្តល់ឱ្យ CMAC នូវសមត្ថភាពដើម្បីអនុវត្តការងារក្នុងសកម្មភាពកំចាត់មីន ។ ការប្តេជ្ញាចិត្តរបស់យើងគឺការដោះមីនផ្នែកមនុស្សធម៌» ។ លោក ហេង រតនា បានថ្លែងទៀតថា «គ្រាន់តែដោះមីននៅលើដីដែលជឿថា មានយុទ្ធភណ្ឌមិនទាន់ផ្ទុះនោះគឺមិនទាន់គ្រប់ទេ ដូច្នេះយើងបានអនុវត្តគំរោងសកម្មភាពកំចាត់មីនលក្ខណៈសមាហរណកម្មដើម្បីអនុវត្តសកម្មភាព២ គឺបោសសំអាតមីន និងការអភិវឌ្ឍនៅតាមសហគមន៍ ដើម្បីធានាឱ្យប្រាកដថា សហគមន៍ទាំងនោះនឹងទទួលបានផលប្រយោជន៍ពីដីដែលបានបោសសំអាតតាមរយៈការអភិវឌ្ឍជានិរន្តរ៍» ។
តាមសេចក្តីប្រកាសព័ត៌មានដដែលបានឱ្យដឹងផងដែរថា ឧបករណ៍ដោះមីនដែលទទួលបានកាលពីដើមខែកញ្ញានោះ ជាផ្នែកមួយនៃការផ្តល់ជំនួយផ្នែកឧបករណ៍របស់ជប៉ុនដែលសរុបជាទឹកប្រាក់មានចំនួនប្រហែល៦លានដុល្លារអាមេរិកសំរាប់ CMAC ដើម្បីអនុវត្តគំរោងបង្កើតសន្តិភាព ។ រដ្ឋាភិបាលជប៉ុននឹងផ្តល់ឧបករណ៍ដោះមីនជាម៉ាស៊ីនធុនស្រាល និងធុនធ្ងន់ ព្រមទាំងឧបករណ៍ដទៃទៀត មានដូចជារថយន្តភីកអាប់ ម៉ូតូ ម៉ាស៊ីនស្រាវជ្រាវជំរៅជ្រៅ ឧបករណ៍បូមប្រេង ម៉ាស៊ីនកាត់ស្មៅ តង់ និងត្រាក់ទ័រ ហើយឧបករណ៍ទាំងនេះនឹងមកដល់ក្នុងចន្លោះពេលពីខែកញ្ញានេះទៅដល់ខែធ្នូ ឆ្នាំ២០១០ ។ ឧបករណ៍ទាំងនេះនឹងផ្តល់ការគាំទ្រសំរាប់ CMAC ក្នុងការអនុវត្តប្រតិបត្តិការដោះមីន ព្រមទាំងការកសាងហេដ្ឋារចនាសម័្ពន្ធសំរាប់ការអភិវឌ្ឍសហគមន៍ ។ ក្នុងរយៈពេលប៉ុន្មានសប្តាហ៍ខាងមុខនេះ អ្នកប្រើប្រាស់ឧបករណ៍ដោះមីនរបស់ CMAC និងបុគ្គលិកនៅកន្លែងដោះមីន នឹងទទួលបានការបណ្តុះបណ្តាលស្តីអំពីការថែរក្សាឧបករណ៍ដោះមីន និងអំពីសុវត្ថិភាពក្នុងការប្រើប្រាស់ឧបករណ៍ ៕
ចែករំលែកព័តមាននេះ