រដ្ឋមន្ត្រីក្រសួងមហាផ្ទៃកម្ពុជា និងសមភាគីឡាវចុះហត្ថលេខាសហប្រតិបត្តិការ
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកឧត្តមសេនីយ៍ទោ ស៊ុមកែវ ស៊ីឡាវង្ស
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកឧត្តមសេនីយ៍ទោ ស៊ុមកែវ ស៊ីឡាវង្ស រដ្ឋមន្ត្រីក្រសួងសន្តិសុខសាធារណៈឡាវ បានជួបប្រជុំនិងចុះហត្ថលេខាលើកិច្ចសហប្រតិបត្តិការឆ្នាំ២០១៧ នៅទីស្តីការក្រសួងមហាផ្ទៃកាលពីព្រឹកថ្ងៃទី២៥ ខែមេសា ។ កិច្ចប្រជុំនេះ មានការចូលរួមពីអភិបាលខេត្ត និងមន្ត្រីអាជ្ញាធរពាក់ព័ន្ធជាប់ព្រំដែននៃព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ ។
លោកនាយឧត្តមសេន៍យ៍ គៀត ច័ន្ទថារិទ្ធ អ្នកនាំពាក្យអគ្គស្នងការដ្ឋាននគរបាល បានថ្លែងថា នៅក្នុងកិច្ចប្រជុំនេះ ភាគីទាំងពីរបានវាយតម្លៃខ្ពស់ចំពោះលទ្ធផលនៃកិច្ចសហ
ប្រតិបត្តិការនិងយល់ឃើញថា កិច្ចសហប្រតិបត្តិការទាំងនេះ ត្រូវបានចាត់តាំងអនុវត្តឲ្យចេញជារូបរាងឡើង អាចក្តាប់បានសភាពការណ៍ ការផ្លាស់ប្តូរបទពិសោធន៍ បង្កើនការយោគយល់គ្នាទៅវិញទៅមកបន្ថែមទៀត ដើម្បីដោះស្រាយបញ្ហារួមគ្នាឲ្យបានល្អប្រសើរនៅកម្រិតមូលដ្ឋាន រួមចំណែកក្នុងការបង្កើនទំនាក់ទំនងជាមិត្តភាពភូមិផងរបងជាមួយ ថ្នាក់រដ្ឋាភិបាល និងប្រជាជននៃប្រទេសទាំង២ឲ្យកាន់តែប្រសើរឡើង ។
ទន្ទឹមនឹងជោគជ័យនេះ កិច្ចប្រជុំក៏បានឯកភាពវាយតម្លៃចំណុចមួយចំនួនដែលមិនទាន់បានអនុវត្តល្អនៅឡើយ ហើយយល់ឃើញថា ភាគីទាំងពីរត្រូវតែបង្កើនការចាត់តាំងអនុវត្តឲ្យចេញជារូបរាងដូចជា ការផ្លាស់ប្តូរគណៈប្រតិភូទស្សនកិច្ចដកស្រង់បទពិសោធន៍របស់បណ្តាអង្គភាពជំនាញ ការចាត់បញ្ជូននិស្សិតអាហារូបករណ៍ កិច្ចប្រជុំរវាងអាជ្ញាធរខេត្តជាប់ព្រំដែន និងកិច្ចប្រជុំថ្នាក់មូលដ្ឋាន ដើម្បីធ្វើការណែនាំប្រជាជនដែលរស់នៅតាមបណ្តោយព្រំដែននៃប្រទេសទាំងពីរ ក្នុងន័យរួមចណែកអនុវត្តកំណត់ហេតុកិច្ចសហប្រតិបត្តិការទ្វេភាគីឲ្យមានប្រសិទ្ធភាព។
ភាគីទាំងពីរ ក៏បានឯកភាពបន្តចាត់តាំងអនុវត្តកំណត់ហេតុស្តីពីកិច្ចសហប្រតិបត្តិការដូចជា កិច្ចសហប្រតិបត្តិការការពារសន្តិសុខ និងរក្សាសណ្តាប់ធ្នាប់ សុវត្ថិភាពសង្គមតាមតំបន់ជាប់ព្រំដែន ។ ក្នុងនោះភាគីទាំងពីរបានឯកភាពគ្នាបន្តជូនដំណឹងឲ្យគ្នាជាប្រចាំនិងទាន់ពេលវេលា អំពីសភាពការណ៍ព័ត៌មាន ល្បិចកល និងរាល់សកកម្មភាពដែលបង្កគ្រោះថ្នាក់ដល់ស្ថិរភាព សន្តិសុខ សណ្តាប់ធ្នាប់ សុវត្ថិភាពសង្គម និងការអភិវឌ្ឍសេដ្ឋកិច្ចរវាងប្រទេសទាំងពីរ ។
បន្ថែមលើនោះ ភាគីទាំងពីរក៏បានឯកភាពគ្នាបន្តកិច្ចសហប្រតិបត្តិការក្នុងការបង្ការ ទប់ស្កាត់ និងបង្ក្រាបរាល់់សកម្មភាពបង្កភេរវកម្ម និងឧក្រិដ្ឋកម្មឆ្លងដែន ជាពិសេសការដាំដុះ ការផលិត ការដឹកជញ្ជូន ការរក្សាទុក និងការប្រើប្រាស់ចែកចាយជួញដូរគ្រឿងងញៀន ។ ជាពិសេស ការជួញដូរអាវុធជាតិផ្ទុះ ការសម្អាតប្រាក់ ការរត់ពន្ធ និងចរាចរណ៍ទំនិញខុសច្បាប់ក្លែងក្លាយ ការកាប់ឈើ ការទិញលក់ ការដឹកជញ្ជូនឈើខុសច្បាប់ ការបំផ្លាញសត្វទឹក សត្វព្រៃ អនុផលព្រៃឈើ និងបទល្មើសផ្សេងៗទៀត ។ នៅក្នុងករណីកើតឡើងខាងលើនេះ ភាគីទាំងពីរត្រូវជូនដំណឹងឲ្យគ្នាជាបន្ទាន់សំដៅទប់ស្កាត់ បង្ក្រាប និងដោះស្រាយឲ្យទាន់ពេលវេលា ។
ចំពោះវិធានការក្នុងករណីប្រជាពលរដ្ឋរបស់ភាគីណាមួយប្រព្រឹត្តបទល្មើស ហើយរត់គេចខ្លួនពីប្រទេសម្ខាងទៅម្ខាងទៀត ភាគីទាំងពីរត្រូវតែជូនដំណឹងជាលាយល័ក្ខណ៍អក្សរឲ្យគ្នាទៅវិញទៅមកដើម្បីមានវិធានការររួម ដើម្បីឲ្យអង្គភាពពាក់ព័ន្ធតាមចាប់ខ្លួន និងបំពេញសំណុំបែបបទបញ្ជូន និងប្រគល់ស្របតាមច្បាប់របស់ភាគីរដ្ឋនីមួយៗ ។
លោកនាយឧត្តមសនីយ៍ គៀត ច័ន្ទថារិទ្ធ បានថ្លែងទៀតថា ដោយឡែកពាក់ព័ន្ធនឹងកិច្ចសហប្រតិបត្តិការក្នុងការត្រួតពិនិត្យគ្រឿងញៀនតាមព្រំដែនវិញ ភាគីទាំងពីរធានាអះអាងបន្តអនុវត្តយ៉ាងមុឺងម៉ាត់នូវកំណត់ហេតុកិច្ចប្រជុំទ្វេភាគី ស្តីពីកិច្ចសហប្រតិបត្តិការត្រួតពិនិត្យថ្នាំញៀនរវាងអាជ្ញាធរជាតិប្រយុទ្ធប្រឆាំងគ្រឿងញៀនរបស់កម្ពុជា និងគណៈកម្មាធិការជាតិត្រួតពិនិត្យនិងគ្រប់គ្រងគ្រឿងញៀនរបស់ប្រទេសឡាវ ដែលបានចុះហត្ថលេខាកាលពីថ្ងៃទី២០ ខែវិច្ឆិកា ឆ្នាំ២០១៤ កន្លងទៅ ។
ភាគីទាំងពីរក៏បានឯកភាពគ្នា ឲ្យអាជ្ញាធរថ្នាក់កណ្តាល និងអាជ្ញាធរមូលដ្ឋាន ដែលមានព្រំដែនជាប់គ្នា បន្តសហការផ្លាស់ប្តូរព័ត៌មានដែលពាក់ព័ន្ធនឹងការដាំដុះ ការជួញដូរ ការផលិត និងការរក្សាទុក ។
ភាគីទាំងពីរ ក៏បានលើកឡើងពីកិច្ចសហប្រតិបត្តិការប្រឆាំងការជួញដូរមនុស្សតាមព្រំដែនផងដែរ ។ ចំពោះកិច្ចសហប្រតិបត្តិការការពារសន្តិសុខ សណ្តាប់ធ្នាប់តាមព្រំដែន និងការចេញចូលឆ្លងកាត់ព្រំដែន ភាគីទាំងពីរឯកភាពបន្តរក្សានិងពង្រឹងកិច្ចសហប្រតិបត្តិការល្អជាមិត្តភាពភូមិផងរបងជាមួយ ។ សរុបរួមមក ធ្វើម្តេចឲ្យតំបន់ព្រំដែនជាតំបន់មិត្តភាព សហប្រតិបត្តិការនិងការអភិវឌ្ឍ ផ្អែកលើកិច្ចព្រមព្រៀងដែលរដ្ឋាភិបាលបានចុះហត្ថលេខានាពេលកន្លងមក ៕
ចែករំលែកព័តមាននេះ