ទីក្រុងប៉េកាំង ៖ សហគ្រាសដែកថែបចិនចំនួន២៩ ត្រូវបានដកសិទ្ធិក្នុងការលក់ ខណៈដែលប្រទេសចិនបន្តយុទ្ធនាការដោះស្រាយនឹងបញ្ហាការផ្គត់ផ្គង់លើសលប់ក្នុងវិស័យនេះ ហើយប៉ុន្មានថ្ងៃក្រោយនេះ លោកប្រធានាធិបតី Donald Trump បាននិយាយថា លោកនឹងបើកការស៊ើបអង្កេតលើការនាំចេញដែកថែបក្នុងតម្លៃទាបពីប្រទេសចិន និងប្រទេសដទៃទៀត ។
អ្នកវិភាគបាននិយាយថា ការដកសិទ្ធិនេះប្រហែលជាមិនមែនដើម្បីឆ្លើយតបនឹងផែនការរបស់លោកTrumpទេ ប៉ុន្តែវាគឺជាផ្នែកមួយនៃការធ្វើកំណែទម្រង់របស់ប្រទេសចិនដែលមានគោលដៅកាត់បន្ថយសមត្ថភាពក្នុងការផលិតដែកថែបលើសលប់ដែលត្រូវបានព្យាករណ៍ស្មើនឹង៣០០លានតោនឯណោះ ។
សារព័ត៌មានក្នុងស្រុករបស់ចិនបាននិយាយថា ការសម្រេចចិត្តរបស់សហរដ្ឋអាមេរិកក្នុងការបើកការស៊ើបអង្កេតលើការនាំចូលដែកថែបនេះ អាចនឹងបង្កជាជម្លោះពាណិជ្ជកម្មរវាងសហរដ្ឋអាមេរិក និងដៃគូពាណិជ្ជកម្មរបស់ពួកគេ ។ ក្នុងនោះ ជប៉ុនដែលជាប្រទេសផលិតដែកថែបធំជាងគេលេខ២ បន្ទាប់ពីចិនវិញ ក្រុមអ្នកផលិតដែកថែបបានបង្ហាញការព្រួយបារម្ភលើគោលនយោបាយការពារនិយមរបស់លោក Trump ។
លោក Kosei Shindo ប្រធាននៃសហព័ន្ធរ៉ែដែក និងដែកថែបជប៉ុន បានប្រាប់ក្នុងសន្និសីទកាសែតមួយកាលពីថ្ងៃចន្ទថា ៖ « ពួកយើងពិតជាព្រួយបារម្ភពីគោលនយោបាយការពារនិយមរបស់លោកTrump ណាស់ ប៉ុន្តែពួកយើងបានលឺថា លោកបានកាត់បន្ថយការរិះគន់លើបញ្ហាមួយចំនួន បន្ទាប់ពីបានដឹងពីរឿងពិត » ។
ក្រសួងឧស្សាហកម ្មនិងព័ត៌មានរបស់ចិនបានចេញបញ្ជាមួយកាលពីថ្ងៃចន្ទដែលរួមមានសហគ្រាសទាំង២៩ នឹងត្រូវបានដកចេញពីការចុះឈ្មោះជាសហគ្រាសដែកថែប ។ ក្រុមហ៊ុនភាគច្រើនបានបញ្ឈប់ការផលិតដែកថែបហើយ ប៉ុន្តែមួយចំនួនទៀតបានបង្កើនការផលិតដោយខុសច្បាប់ ឬបានល្មើសនឹងបញ្ជាឲ្យបិទរបស់រដ្ឋ។
ប្រទេសចិនមានគោលដៅកាត់បន្ថយសមត្ថភាពផលិតពី១០០ទៅ១៥០លានតោនក្នុងរយៈពេលពីឆ្នាំ២០១៦ទៅ២០២០ ។ ពួកគេក៏មានផែនការបិទផលិតកម្មដែកថែបគុណភាពទាបប្រមាណ១០០លានតោនផងដែរនាចុងខែមិថុនា ខាងមុខនេះ ។
កាលពីថ្ងៃចន្ទ មានសហគ្រាសដែកថែបចំនួន ៤០ទៀតត្រូវបានស្នើឲ្យធ្វើកំណែទម្រង់ក្នុងផ្នែកការពារបរិស្ថាន និងសុវត្ថិភាព ។
ក្រសួងឧស្សាហកម្មបាននិយាយថា ក្រុមហ៊ុនភាគច្រើនត្រូវបានចោទប្រកាន់ថាមិនអាចសម្របតាមការហាមឃាត់មិនឲ្យផលិតក្នុងពេលមានអាសន្ន ដូចជា ក្នុងអំឡុងពេលមានបញ្ហាកខ្វក់បរិស្ថានខ្លាំងក្លា ហើយពួកគេត្រូវតែកែតម្រូវក្នុងរយៈពេលមួយកំណត់ ៕
ចែករំលែកព័តមាននេះ