រាជធានីភ្នំពេញ ៖ ការសិក្សារបស់អង្គការសហប្រតិបត្តិការអន្តរជាតិ ដើម្បីការអភិវឌ្ឍហៅកាត់ថា ICCO រកឃើញថា ប្រជាពលរដ្ឋកម្ពុជារហូតដល់ជាង៩៥% បារម្ភពីសុវត្ថិភាពបន្លែដែលបាននិងកំពុងចរាចរលក់នៅលើទីផ្សារកម្ពុជា ។
រាជធានីភ្នំពេញ ៖ ការសិក្សារបស់អង្គការសហប្រតិបត្តិការអន្តរជាតិ ដើម្បីការអភិវឌ្ឍហៅកាត់ថា ICCO រកឃើញថា ប្រជាពលរដ្ឋកម្ពុជារហូតដល់ជាង៩៥% បារម្ភពីសុវត្ថិភាពបន្លែដែលបាននិងកំពុងចរាចរលក់នៅលើទីផ្សារកម្ពុជា ។
តំណាងអង្គការខាងលើ លោក លាង សេងហ៊ន បានលើកឡើងក្នុងសិក្ខាសាលាថ្នាក់ជាតិ ស្តីពីការលើកកម្ពស់សុវត្ថិភាពបន្លែកាលពីចុងសប្តាហ៍មុនថា បញ្ហាសុវត្ថិភាពបន្លែ គឺជាកង្វល់ដ៏ធំមួយរបស់អ្នកប្រើប្រាស់ រាជរដ្ឋាភិបាល បណ្តាអង្គការជាតិ អន្តរជាតិ និងស្ថាប័នឯកជននានានៅកម្ពុជា ។ តាមការសិក្សាស្រាវជ្រាវរបស់អង្គការបង្ហាញថា មានអ្នកប្រើប្រាស់៩៥% កំពុងព្រួយបារម្ភអំពីកម្រិតជាតិគីមីនៅក្នុងបន្លែ រាប់ទាំងបណ្តាបន្លែផលិតនៅក្នុងស្រុក និងបន្លែនាំចូលពីប្រទេសជាតិខាងផងដែរ ។
យោងតាមសេចក្តីប្រកាសព័ត៌មាន ស្តីពីការលើកកម្ពស់បន្លែសុវត្ថិភាពនេះ តាមរបាយការណ៍អង្គការស្បៀងអាហារពិភពលោក និងកសិកម្មនៃអង្គការសហប្រជាជាតិ ក៏បានបង្ហាញបរិមាណបន្លែដែលកំពុងផ្គត់ផ្គង់នៅក្នុងប្រទេសកម្ពុជា គឺ៩០ម៉ឺនតោនក្នុង១ឆ្នាំ ក្នុងនោះបរិមាណបន្លែផ្គត់ផ្គង់ក្នុងស្រុកមានត្រឹមតែ៤៤%ប៉ុណ្ណោះ ខណៈការនាំចូលរហូតដល់៥៦% ។
ចំណែកការសិក្សាដោយឡែកមួយទៀតបង្ហាញដែរថា បរិមាណបន្លែកំពុងផ្គត់ផ្គង់ពីបណ្តាប្រទេសជិតខាងមកកាន់រាជធានីភ្នំពេញ គឺមានរហូតដល់២០០ ទៅ៣០០តោនក្នុង១ខែៗ ។
លោក ហ៊ាន វណ្ណហ៊ន ប្រតិភូរាជរដ្ឋាភិបាលទទួលបន្ទុកជាអគ្គនាយកកសិកម្មនៃក្រសួងកសិកម្ម រុក្ខាប្រមាញ់ និងនេសាទ លើកឡើងថា ការចុះពិនិត្យបន្លែសុវត្ថិភាព ឬសារធាតុគីមីផ្សេងៗ គឺជាដែនសមត្ថកិច្ចរបស់កាំកុងត្រូល ។ មកដល់ពេលនេះ លោកពុំទាន់ឃើញថា នៅក្នុងប្រទេសយើងមានតួលេខ ឬរបាយការណ៍ណាមួយយកមកប្រើប្រាស់បាននៅឡើយ ប៉ុន្តែប៉ុន្មានឆ្នាំចុងក្រោយនេះ យើងសង្កេតឃើញថា សមត្ថកិច្ចកាំកុងត្រូលកំពុងបន្តការចុះត្រួតពិនិត្យបញ្ហាបន្លែ និងផ្លែឈើនៅតាមទីផ្សារជាបណ្តើរៗផងដែរ ។
លោក គីម មាសសុខសីហា អគ្គនាយករង នៃអគ្គនាយកដ្ឋានកាំកុងត្រូលក្រសួងពាណិជ្ជកម្មថ្លែងថា តាមរយៈការចុះត្រួតពិនិត្យជាប្រចាំ និងកាន់តែសកម្មជាងមុនរបស់មន្ត្រីកាំកុងត្រូល និងការត្រួតពិនិត្យតាមរថយន្តចល័តរកឃើញថា បន្លែ ត្រីសាច់ដែលមានសារជាតិគីមីនៅតាមទីផ្សារ និងចរាចរលក់ត្រូវបានកាត់បន្ថយ។ លោកបន្តថា ៖ « បញ្ហាសារជាតិគីមីដាក់ក្នុងបន្លែ និងត្រីសាច់ គឺជារឿងដែលអគ្គនាយកដ្ឋានយកចិត្តទុកដាក់ណាស់ ព្រោះវាជាបញ្ហាជះឥទ្ធិពលយ៉ាងធ្ងន់ធ្ងរដល់សុខភាពរបស់ប្រជាពលរដ្ឋ» ៕
ចែករំលែកព័តមាននេះ