ខេត្តកណ្តាល ៖ មុខសញ្ញាចែកចាយ និងប្រើប្រាស់គ្រឿងញៀនចំនួន៣នាក់រួមជាមួយវត្ថុតាងមួយចំនួនត្រូវបានកម្លាំងនគរបាលស្រុកលើកដែកធ្វើការបង្ក្រាបបានកាលពីថ្ងៃទី២៥ ខែមេសា ឆ្នាំ២០១៧ វេលាម៉ោង១១និង២០នាទីព្រឹក នៅចំណុចលើផ្ទះឈ្មោះ ប៉ុន វាសនា ស្ថិតក្នុងភូមិស្ពានដែក ឃុំព្រែកទន្លាប់ស្រុកលើកដែក ខេត្តកណ្តាល។
តាមរបាយការណ៍របស់សមត្ថកិច្ចនគរបាលស្រុកលើកដែកបានឲ្យដឹងថាបន្ទាប់ពីមានព័ត៌មានពីពលរដ្ឋល្អរាយការណ៍មកប្រាប់ឃើញមុខសញ្ញាជួបជុំគ្នានៅផ្ទះចំណុចខាងលើកម្លាំងបានសហការជាមួយនគរបាលប៉ុស្តិ៍រដ្ឋបាលឃុំព្រែកទន្លាប់ ចុះទៅឡោមពទ្ធ័ចូលបង្ក្រាបបានមុខសញ្ញាចំនួន៣នាក់ ទី១-ឈ្មោះ ប៉ុន វាសនា ភេទប្រុស អាយុ៣១ឆ្នាំ ជនជាតិខ្មែរ ជាម្ចាស់ផ្ទះ និងជាមុខសញ្ញាចែកចាយគ្រឿងញៀន ទី២-ឈ្មោះ តេង វិស្សុត(ហៅសិដ្ឋ) ភេទប្រុស អាយុ២៦ឆ្នាំ ជនជាតិខ្មែរ ជាអ្នកប្រើប្រាស់ និងទី៣-ឈ្មោះ វ៉ា ភ្លុង (ហៅថៃ) ភេទប្រុស អាយុ២៨ឆ្នាំ ជនជាតិខ្មែរ ជាអ្នកប្រើប្រាស់ទាំង៣នាក់មានទីលំនៅភូមិឃុំកើតហេតុខាងលើជាមួយគ្នា។
បន្ទាប់ឃាត់ខ្លួនសមត្ថកិច្ចបានធ្វើការឆែកឆេររកឃើញដកហូតបានវត្ថុតាងនូវម្សៅក្រាមពណ៌សថ្លាសង្ស័យជាសារធាតុញៀន១កញ្ចប់តូច និងកម្ទេចម្សៅក្រាមពណ៌សថ្លា សង្ស័យជាសារធាតុញៀននៅសល់ពីការប្រើប្រាស់ សំបកថង់ប្លាស្ទីកទទេ២ថង់តូច ដែកកេះចំនួន៧ រួមជាមួយសម្ភារសម្រាប់ប្រើប្រាស់ថ្នាំញៀនមួយចំនួនទៀត។ ក្រោយសាកសួររួចជនទាំង៣នាក់រួមនឹងវត្ថុតាងត្រូវបានសមត្ថកិច្ចស្រុកលើកដែកកសាងសំណុំរឿងចាត់ការតាមនីតិវិធី៕
ចែករំលែកព័តមាននេះ