រាជធានីភ្នំពេញ ៖ នាយិកាក្រុមហ៊ុននំស្រួយលីលីបានអះអាងថា មនុស្សក្មេងចាស់ប្រុសស្រីចំនួន៨នាក់ ដែលពុលនំស្រួយលីលីបន្ទាប់ពីពួកគេបានទិញយកទៅបរិភោគនោះ គឺមកពីការលួចបន្លំស្លាកសញ្ញា មានន័យថាជាផលិតផលក្លែងក្លាយ ។
ក្នុងសន្និសីទសារព័ត៌មានមួយនាថ្ងៃទី២៥ ខែមេសា នៅរោងចក្រផលិតនំស្រួយលីលី អ្នកស្រី កែវ មុំ បានលើកឡើងថា ពាក់ព័ន្ធនឹងករណីនេះ អាជ្ញាធរគួរតែទាក់ទងមកក្រុមហ៊ុនជាមុនសិន មុននឹងផ្ដល់ព័ត៌មានមិនច្បាស់លាស់ ដល់អ្នកសារព័ត៌មាន ព្រោះអាចធ្វើឲ្យមានការចុះផ្សាយនូវព័ត៌មានមិនពិត ឬមិនច្បាស់លាស់ ។
អ្នកស្រីបន្តថា «ករណីនេះអាចកើតឡើងមកពីមូលហេតុផ្សេង ក្រៅពីការបរិភោគនំនេះ ព្រោះថា នំស្រួយលីលីមានធាតុផ្សំពីអង្ករផ្កាម្លិះ ម្សៅឆា ម្សៅដំណើប ស្ករស ប្រេងឆា អំបិល ស្ករចាហួយ រសជាតិខ្ញី និងសារធាតុគ្រឿងផ្សំប៉ុណ្ណោះ មិនមានលាយសារធាតុគីមីដែលនាំឲ្យប៉ះពាល់ដល់សុខភាពឡើយ ។ ជាមួយនេះ ក្រុមហ៊ុនតែងតែយកនំទៅពិនិត្យនៅមន្ទីរពិសោធន៍របស់ក្រសួងឧស្សាហកម្មនិងសិប្បកម្ម រៀងរាល់៣ខែម្ដង មិនឃើញមានបញ្ហាអ្វីនោះទេ» ។
ពាក់ព័ន្ធនឹងករណីលួចបន្លំម៉ាកសញ្ញាក្រុមហ៊ុនវិញ អ្នកស្រីបញ្ជាក់ថា កាលពីអំឡុងចុងឆ្នាំ២០១១ ធ្លាប់មានការនាំចូលប្រភេទនំស្រដៀងនឹងនំស្រួយលីលី ហើយថែមទាំងដាក់ស្លាកសញ្ញាដូចនំស្រួយលីលីផងដែរ ប៉ុន្តែករណីនេះ ក្រុមហ៊ុនក៏បានប្តឹងប្តល់និងដោះស្រាយរួចរាល់ហើយដែរ ។
ចែករំលែកព័តមាននេះ