រាជធានីភ្នំពេញ ៖ មកទល់ពេលនេះ មិនមានគម្រោងណាមួយរៀបចំឱ្យមានការប្រកួតប្រដាល់នារីជាថ្មីនោះទេ បើទោះជាមន្ត្រីសហព័ន្ធនៅតែអះអាងថាមានបំណងលើកស្ទួយវិស័យនេះឱ្យរស់ទៅវិញក្ដីបន្ទាប់ពីបាត់មុខទាំងស្រុងនាពេលចុងក្រោយ ។ អ៊ីចឹងហើយទើបកីឡាការិនីដែលធ្លាប់មានឈ្មោះបោះសំឡេងចំនួន១០រូប សម្រេចចិត្តបោះបង់អាជីពមួយនេះក្នុងពេលដែលកីឡាការិនីខ្លះក៏រត់ទៅជ្រកក្នុងវិស័យកីឡាផ្សេង ហើយអ្នកខ្លះទៅធ្វើជាកម្មការិនីនៅបរទេសដោយលែងនឹកនាតែម្ដង ។
វី ស្រីខួច គឺជាកីឡាការិនីដែលមានឈ្មោះបោះសំឡេងជាងគេនៅក្នុងចំណោមអ្នកប្រដាល់នារី។ ក្រៅពីទទួលបានជើងឯកប្រាក់លានក្នុងពេលទូរទស្សន៍បាយ័ននៅបើកការប្រកួត នាងក៏ទទួលបានខ្សែក្រវាត់ជាជើងខ្លាំងនៅក្នុងប្រទេសបារាំងផងដែរ ។ កញ្ញាត្រូវបានគេហៅថា ជាខ្លាញីកំណាចក្នុងចំណោមអ្នកប្រដាល់នារី បើទោះជានាងធ្លាប់ចាញ់ តែឱកាសឈ្នះគឺច្រើនរាប់មិនអស់ ជាពិសេសសម្រាប់ការប្រកួតដែលមានលក្ខណៈដណ្ដើមប្រាក់លាន ។ នាងក៏ជាអ្នកប្រដាល់ដែលមានមុខមាត់ និងរូបរាងស្រស់ស្អាតជាងគេផងដែរ បើទោះជានាងធំធាត់ក្នុងត្រកូលអ្នកសំណង់ និងធ្លាប់ប្រឡូកការងារជាកម្មករសំណង់ដូចឪពុក ការងាររោងចក្រ និងការងារជួយបណ្ដុះកូនផ្កាអ្នកនៅតាខ្មៅ ។ នាងនៅតែបន្តអាជីពកីឡាក្នុងពេលមិត្តរួមអាជីពរបស់នាងសម្រេចចិត្តបោះបង់អស់ ដោយគ្រាន់តែប្ដូរពីអ្នកប្រដាល់ ទៅជាកីឡាការិនីជម្រើសជាតិផ្នែកវ៉ូវីណាម ។
អេ យ៉ានុត គឺជាកូនស្រីលោកអេ ភូថង ដែលបានល្បីឈ្មោះក្នុងអាជីពនេះតាំងពីអាយុមិនដល់១០ឆ្នាំម្ល៉េះ ។ នាងក៏ជាកីឡាការិនីដែលមានឱកាសឈ្នះច្រើនផងដែរ បើទោះជាមិនមែនជាដៃគូរបស់ វី ស្រីខួច ក្នុងពេលប្រឡូកខ្លាំងនៅក្នុងអាជីពប្រដាល់ ។ នាងបានផ្លាស់ប្ដូរអាជីពពីការប្រដាល់សេរីទៅប្រដាល់សាកល និងបានផ្លាស់ទៅប្រកួតផ្នែកវ៉ូវីណាមផងដែរ បន្ទាប់ពីការប្រដាល់លើរេញលែងមានដូចមុន ។ ទោះបីយ៉ាងណា អេ យ៉ានុត នៅតែចង់បន្តប្រឡូកការប្រដាល់ដូចមុនដដែល បើទោះជានាងកាន់តែពេញរូបពេញរាង ប៉ុន្តែមកពីការប្រដាល់បែបនេះលែងមានដូចមុន ទើបនាងសម្រេចចិត្តបោះបង់ ។
ឡឺម ចំរ៉ុង គឺជានារីចរិតប្រុសដែលមានកណ្ដាប់ដៃខ្លាំងមិនអន់ជាងកីឡាករក្នុងអាជីពប្រដាល់នោះទេ ប៉ុន្តែនាងបានសម្រេចចិត្តបោះបង់បើតាមតែការអះអាងដោយសារការប្រដាល់ទទួលបានលុយតិចពក មិនអាចឱ្យនាងរស់បាន ។ នាងបានសម្រេចចិត្តបោះបង់ទៅធ្វើការជាកម្មការិនីនៅប្រទេសថៃកាលពីមួយរយៈមុន ដោយក្នុងពេលនេះ មិនដឹងថាទៅដល់ទីណានោះទេ ។ គ្រូបង្វឹករបស់នាងបានអះអាងថា មិនមានដំណឹងពីនាងនោះទេ បន្ទាប់ពីនាងឈប់ប្រដាល់ហើយលេខចាស់ក៏ខលលែងចូល ។
កូយ ស្រីចាន់ គឺជាកីឡាការិនីដែលឈប់ប្រដាល់តែម្ដង ដោយសារតែនាងប្រកាសថាឪពុកម្ដាយមិនគាំទ្រអាជីពនេះ និងបន្ទាប់ពីនាងសាកល្បងមកប្រកួតដណ្ដើមពានជើងឯកម្ដងជាពីរដង ហើយមិនទទួលជោគជ័យ ។ នាងមិនមានដំណឹងថារស់នៅទីណាទេ ខណៈដែលនាងធ្លាប់អះអាងថា បើនាងឈប់ប្រដាល់នឹងត្រឡប់ទៅធ្វើការតាមសម្មាអាជីវ៉ូរបស់នាងដើម្បីផ្លាស់ប្ដូរ ។
អ៊ុក សារី ជាកីឡាការិនីវ័យក្មេងជើងខ្លាំងម្នាក់ ប៉ុន្តែនាងថាអាជីពប្រដាល់មិនមែនជាចំណូលចិត្តរបស់នាងនោះទេ គឺនាងសម្រេចចិត្តមកប្រដាល់ដើម្បីឱ្យតែបានបទពិសោធន៍ និងបានលុយចាយប៉ុណ្ណោះ ទើបនាងសម្រេចចិត្តឈប់ទទួល និងបោះបង់តែម្ដងក្រោយប្រកួតបានមួយប្រាវជាមួយនឹងកីឡាការិនីរួមអាជីពវិលចុះវិលឡើងរហូតអស់ដៃគូប្រកួតជាមួយ ។ នាងត្រូវគេអះអាងថា ចេញទៅធ្វើការនៅក្នុងប្រទេសថៃ ប៉ុន្តែដំណឹងពិតប្រាកដមិនជាក់លាក់ទេ ដោយសារតែគ្រូបង្វឹករបស់នាងប្រាប់ក៏បាត់ទំនាក់ទំនង ។
វី ស្រីឆាយ គឺជាសិស្សរួមក្លិបរបស់វី ស្រីខួច ដែលត្រូវគេឃើញបាត់មុខពីការប្រដាល់សេរីដោយសារតែអស់រេញប្រកួត ប៉ុន្តែយូរៗម្ដងឃើញនាងទទួលប្រកួតដាក់ទ្រុង និងប្រកួតប្រដាល់សាកលថ្នាក់ជាតិផងដែរ ។ នាងត្រូវបានគេអះអាងថា នៅតែចង់បន្តអាជីពនេះដើម្បីរកប្រាក់ ប៉ុន្តែមកពីការប្រដាល់បែបនេះលែងមានដូចមុនទើបនាងបំភ្លេចចោល ហើយចាប់យកការងារដោយប្រើកម្លាំងពលកម្មផ្សេងទៀតជាជំនួស ។
សូយ គឹមហៀង ជាកីឡាការិនីប្រឡូកប្រដាល់បានតែមួយខ្យល់ប៉ុណ្ណោះ ក៏សម្រេចចិត្តបោះបង់តាំងពីមុនការប្រដាល់ផ្នែកនារីមិនទាន់បិទរេញម្ល៉េះ ។ នាងត្រូវគេអះអាងថា មិនប្រកួតបន្តដោយសារតែចង់យកពេលទៅធ្វើការនៅថៃ និងការងារផ្សេងទៀតដើម្បីបានលុយទៀងទាត់ជាងការប្រដាល់ដែលយូរៗម្ដងទើបមានគូវាយ ។
មិនខុសគ្នាដែរ កីឡាការិនី ស៊ឹង តូ, សូយ សុធា និងនូវ ស្រីពៅ ក៏បានប្រកាសថា នាងឈប់ប្រដាល់ហើយ បើទោះជាការប្រដាល់មួយនេះនៅតែបន្តដូចមុន ។ ពួកនាងនិយាយស្របគ្នាថាការប្រដាល់នារីទទួលបានកម្រៃមិនច្រើនដូចប្រដាល់បុរសនោះឡើយ ហើយទម្រាំប្រកួតចប់គឺខាងគ្រូបង្វឹកកាត់លុយមួយចំនួនធ្វើឱ្យពួកនាងមិនទទួលបានសមនឹងកម្លាំងប្រឹងប្រែងនោះផង ទើបនាងឈប់តែម្ដង ។
លោក តែម ម៉ឺន ប្រធានសហព័ន្ធកីឡាប្រដាល់បាននិយាយថា លោកចង់ឱ្យមានការប្រដាល់នារីដូចដើម ប៉ុន្តែមកពីខ្វះទាំងគណៈកម្មការនារី និងខ្វះទាំងអ្នកប្រកួតទើបប្រដាល់មួយនេះមិនអាចរស់បាន ។ ជាក់ស្ដែង សូម្បីតែការប្រដាល់សាកលថ្នាក់ជាតិដែលរៀបចំតែមួយឆ្នាំម្ដងផង ក៏សឹងតែរកអ្នកប្រដាល់នារីមកប្រកួតអត់បាន ៕
ចែករំលែកព័តមាននេះ