សមត្ថកិច្ចថៃសម្រុកទៅជួយសង្គ្រោះពលករខ្មែរ65នាក់ដែលត្រូវមេខ្យល់បង្ខាំងទុក
ខេត្តបន្ទាយមានជ័យ ៖ កាលពីថ្ងៃទី២៤ ខែមេសា ឆ្នាំ២០១៧កន្លងទៅកម្លាំងយោធាថៃអង្គភាពលេខ១២ សហការជាមួយតម្រួងក្លងលឹក ខេត្តស្រះកែវ បានឲ្យដឹងថា
ខេត្តបន្ទាយមានជ័យ ៖ កាលពីថ្ងៃទី២៤ ខែមេសា ឆ្នាំ២០១៧កន្លងទៅកម្លាំងយោធាថៃអង្គភាពលេខ១២ សហការជាមួយតម្រួងក្លងលឹក ខេត្តស្រះកែវ បានឲ្យដឹងថា មានពលករខ្មែរជាច្រើននាក់ត្រូវបានគេបង្ខាំងទុកក្នុងបន្ទប់នៃអគារពាណិជ្ជ២ជាន់ បរិវេណផ្សាររុងក្លឿ ផ្សារជាយដែន ស្រុកអារញ្ញ ទើបនាំកម្លាំងចុះទៅកន្លែងកើតហេតុ ព្រមទាំងប្រើឧបករណ៍គាស់ទ្វារខាងក្រោយអគារធ្វើឲ្យភ្ញាក់ផ្អើលនៅពេលដែលឃើញមានពលករខ្មែរ ប្រុស-ស្រីរួមទាំងក្មេងៗអង្គុយបញ្ច្រៀតគ្នា ណែនណាន់តាន់តាប់ ទាំងជាន់លើនឹងជាន់ក្រោមសរុបចំនួន៦៥នាក់ ។
ក្រោយការត្រួតពិនិត្យទើបដឹងថា ទាំងអស់គ្នាលួចទៅធ្វើការនៅក្រុងបាងកក នឹងខេត្តសម្ទ្រប្រាកាន ដោយមានមេខ្យល់ជនជាតិខ្មែរនៅប៉ោយប៉ែតជាអ្នកទាក់ទងនឹងឲ្យលួចចូលមកប្រទេសថៃ តាមបណ្ដាច្រករបៀង ។ បន្ទាប់មកឲ្យស្នាក់បណ្ដោះអាសន្ននៅអាគារខាងលើតាំងពីថ្ងៃទី២១ ខែមេសា ឆ្នាំ២០១៧ កន្លងទៅ ដោយយកថ្លៃឈ្នួលនាំផ្លូវក្នុងម្នាក់ៗពី២០០០-២៥០០បាត នឹងប្រាប់ថា ឲ្យរង់ចាំសិនបន្តិចទៀតនឹងមានរថយន្តមកទទួលទៅធ្វើការប៉ុន្តែរង់ចាំរយៈពេលជាង៣ថ្ងៃហើយ នៅតែមិនមានរថយន្តមកទទួលនោះឡើយ ។
ជាបឋមសមត្ថកិច្ចបាននាំខ្លួនពលករទាំងអស់ទៅឲ្យនគបាលអន្តោប្រវេសន៍ខេត្តស្រះកែវ យកទៅសួរនាំដើម្បីបណ្ដេញទៅប្រទេសវិញ ព្រមទាំងតាមចាប់ខ្លួនមេខ្យល់ ជាក្រុមជួញដូរមន្ស ដែលលួចចូលមករកស៊ីនៅផ្សាររុងក្លឿ ប្រញ៉ាប់ទាក់ទងទៅនគបាលអន្តោប្រវេសន៍កម្ពុជា ប្រចាំច្រកប៉ោយប៉ែតឲ្យជួយតាមចាប់មកកាត់ទោសតាមច្បាប់ជាប្រញ៉ាប់ ។
ក្រោយសួរនាំសមត្ថកិច្ចបានឲ្យដឹងថា អគារខាងលើគឺមានពលរដ្ឋកម្ពុជាជាអ្នកជួលដើម្បីលក់ដូរតែនៅមិនទាន់ឃើញមានលក់អ្វីនោះទេ បិទទ្វារខាងមុខរហូតទើបសមត្ថកិច្ចត្រៀមកោះហៅម្ចាស់អគារដែលជាអ្នកជួលឪ្យមកសួរនាំថា អ្នកមកជួលជាអ្នកណា ដើម្បីនាំខ្លួនមកដំណើរក្ដីតាមច្បាប់ ៕
ចែករំលែកព័តមាននេះ