ប្រឆាំងស្ថានីយប្រេងអត់ច្បាប់ដែលមានះសាងសង់
ខេត្តបាត់ដំបង ៖ ប្រជាពលរដ្ឋជាង៥០នាក់ បានលើកគ្នាតវ៉ាប្រឆាំងនឹងការសាងសង់ស្ថានីយប្រេងឥន្ធនៈមួយកន្លែង នៅក្នុងភូមិអូតាគាំ២ សង្កាត់ទួលតាឯក
ខេត្តបាត់ដំបង ៖ ប្រជាពលរដ្ឋជាង៥០នាក់ បានលើកគ្នាតវ៉ាប្រឆាំងនឹងការសាងសង់ស្ថានីយប្រេងឥន្ធនៈមួយកន្លែង នៅក្នុងភូមិអូតាគាំ២ សង្កាត់ទួលតាឯក
ខេត្តបាត់ដំបង ៖ ប្រជាពលរដ្ឋជាង៥០នាក់ បានលើកគ្នាតវ៉ាប្រឆាំងនឹងការសាងសង់ស្ថានីយប្រេងឥន្ធនៈមួយកន្លែង នៅក្នុងភូមិអូតាគាំ២ សង្កាត់ទួលតាឯក ក្រុងបាត់ដំបង កាលពីវេលាម៉ោង៩ព្រឹកថ្ងៃទី២៤ មេសា ដែលពលរដ្ឋ និងមន្ត្រីនានាអះអាងថា គ្មានច្បាប់អនុញាតិសម្រាប់ការសាងសង់ឡើយ។
អាជ្ញាធរមូលដ្ធានបានឲ្យដឹងថា ម្ចាស់ស្ថានីយប្រេងដែលពលរដ្ឋតវ៉ាប្រឆាំងនោះឈ្មោះងិន ឆប រស់នៅក្នុងភូមិ សង្កាត់ខាងលើ និងជាអតីតមន្ត្រីកងរាជអាវុធហត្ថស្រុកសំពៅលូន។ បុរសនេះបានសាងសង់ស្ថានីយប្រេងជាប់នឹងផ្ទះរបស់គាត់ក្នុងទីប្រជុំជន ដោយគ្មានច្បាប់អនុញាតិ ដែលអាចប៉ះពាល់ដល់អ្នករស់នៅក្បែរខាង ទើបពួកគេលើកគ្នាតវ៉ា។ មន្ត្រីដដែលបានបញ្ជាក់ថា អាជ្ញាធរក្រុងបាត់ដំបង ធ្លាប់ហៅម្ចាស់ផ្ទះនេះឲ្យធ្វើកិច្ចសន្យាបញ្ឍប់ការសាងសង់ម្ដងហើយ តែជននេះមិនគោរពកិច្ចសន្យាទេ ហើយថែមទាំងព្យាយាមលួចសាងសង់បន្តនៅពេលយប់ទៀត ដូច្នេះហើយទើបអ្នកជិតខាងលើកគ្នាតវ៉ាឲ្យបញ្ឈប់សកម្មភាពទាំងស្រុងតែម្ដង ។
ប្រជាពលរដ្ឋជាង៥០នាក់ដែលលើកគ្នាតវ៉ាដល់ផ្ទះលោកងិន ឆប បាននិយាយថា ស្ថានីយប្រេងរបស់លោកងិន ឆប មិនធំដុំទេ តែអាចបង្កផលប៉ះពាល់ធ្ងន់ធ្ងរដល់អ្នករស់នៅក្បែរខាងរាប់រយគ្រួសារ ។ ពួកគេបានបន្តថា ការតវ៉ានេះគឺស្នើឲ្យអាជ្ញាធរ និងស្ថាប័នជំនាញអន្តរាគមន៍ឲ្យលោកងិន ឆប បញ្ឈប់ការសាងសង់ និងរុះរើសំណង់ចេញតែម្ដង មិនឲ្យមានការសាងសង់បន្តទៀតទេ ។
ដោយឡែកមន្ត្រីនៃមន្ទីររ៉ែថាមពលខេត្ត ក៏បាននិយាយដែរថា សំណង់ស្ថានីយប្រេងរបស់លោកងិន ឆប នេះមិនមានច្បាប់អនុញាតិទេ ហើយសាងសង់ខុសបច្ចេកទេសទាំងស្រុង ។ រីឯទីតាំងក៏មិនស័ក្តិសមនឹងការសាងសង់ស្ថានីយប្រេងដែរ ។ ដូច្នេះម្ចាស់សំណង់ត្រូវតែធ្វើការរុះរើចេញ ចៀសវាងកុំឲ្យមានបញ្ហាជាមួយអាជ្ញាធរ និងអ្នកស្រុកដែលរស់នៅតំបន់នោះ ។
សូមបញ្ជាក់ថា កាលពីថ្ងៃទី១៣ មេសា២០១៧ រដ្ឋបាលក្រុងបាត់ដំបង បានចេញលិខិតអន្តរាគមន៏មួយច្បាប់ ដល់លោកងិន ឆប ដើម្បីឲ្យផ្អាកការសាងសង់សំណង់ស្ថានីយប្រេងនេះជាបណ្ដោះអាសន្ន។ លិខិតនោះចុះហត្ថលេខា ដោយលោកឌី ពៅ អភិបាលរងក្រុងបាត់ដំបង។ ប៉ុន្តែម្ចាស់សំណង់ឈ្មោះងិន ឆប នេះមិនបានគោរពតាមការណែនាំរបស់សាលាក្រុងទេ បែរជាបន្តការសាងសង់ដដែល។ បើតាមប្រជាពលរដ្ឋដែលនៅក្បែរនោះ បានប្រាប់ថា ពេលខ្លះម្ចាស់សំណង់ធ្វើពេលថ្ងៃ តែពេលខ្លះលូចធ្វើពេលយប់បង្កការរំខានយ៉ាងខ្លាំង ។
អ្នកសារព័ត៌មានមិនអាចសុំការបំភ្លឺពីលោកងិន ឆប បានទេ នៅពេលកំពុងមានការតវ៉ានៅខាងក្រៅរបងផ្ទះ។ ព្រោះលោកបានបិទរបង ហើយចងឆ្កែកាចមួយក្បាល នៅខាងក្រៅដើម្បីបន្លាចក្រុមអ្នកតវ៉ា ។ ដោយឡែកលោកឌី ពៅ អភិបាលរងក្រុងបាត់ដំបង ក៏បានចុះទៅដល់ទីនោះដែរ ខណៈពលរដ្ឋកំពុងតវ៉ា។ លោកអភិបាលរងក្រុង បានស្នើឲ្យពលរដ្ឋផ្អាកការតវ៉ា ហើយលោកសន្យាថា នឹងហៅម្ចាស់ផ្ទះមកដោះស្រាយជាថ្មី ។
លោកឌី ពៅ បាននិយាយដែរថា សាលាក្រុងបានចេញលិខិតឲ្យលោក ងិន ឆប ផ្អាកការសាងសង់ម្ដងហើយ លោកឆប នេះមិនបានគោរពទេ ថែមទាំងបន្តការសាងសង់ទៀត តែសាលាក្រុងនឹងចាត់វិធានការជាថ្មីទៀត។ ទោះជាយ៉ាងណាក្រុមអ្នកតវ៉ាបានរំសាយ ក្រោយមានការសម្របសម្រូលពីអាជ្ញាធរក្រុង តែពួកគេអះអាងថា នឹងលើកគ្នាតវ៉ាទៀត បើម្ចាស់ផ្ទះមិនព្រមរុះរើសំណង់ស្ថានីយប្រេងឥន្ធនៈចេញទេ ៕
ចែករំលែកព័តមាននេះ