មានផ្ទៃពោះប្តីរត់ចោលសម្រាលកូនគ្មានលុយមួយរៀល
រាជធានីភ្នំពេញ ៖ ស្ត្រីវ័យជាង៤០ឆ្នាំម្នាក់ ក្រោយពេលប្ដីមុនស្លា.ប់ចោលទៅ គាត់បានរស់នៅជាមួយនឹងកូន២នាក់មួយរយៈពេល
រាជធានីភ្នំពេញ ៖ ស្ត្រីវ័យជាង៤០ឆ្នាំម្នាក់ ក្រោយពេលប្ដីមុនស្លាប់ចោលទៅ គាត់បានរស់នៅជាមួយនឹងកូន២នាក់មួយរយៈពេល ។ ក្រោយមកបានជួបនឹងបុរសម្នាក់ទៀត ហើយគាត់បានយកបុរសនោះធ្វើប្ដីទៀតនិងបានរស់នៅជាមួយគ្នារហូតពេលដឹងថា នាងជាប្រពន្ធមានផ្ទៃពោះ ស្រាប់តែប្ដីក្រោយនោះចុះចោលទៅមានស្រីថ្មីម្នាក់ទៀតដោយគ្មានអាសូរឡើយ ។
ចំណែកឯកូនស្រី២នាក់ជាកូនប្តីដើមក៏បានចាកចោលគាត់ទៅធ្វើការនៅក្រៅប្រទេសបាត់អស់ទៀត តែមិនដឹងថាទៅប្រទេសណាទេ ដោយសារតែខឹងសម្បានឹងរូបគាត់យកប្ដីក្រោយ ។ ប្រការនេះហើយធ្វើឲ្យគាត់រស់នៅឯកោគ្មានអ្នកទីពឹង តែគាត់បានស៊ូទ្រាំពពោះម្នាក់ឯងរហូតដល់គ្រប់ខែ និងសម្រាលបានកូនប្រុសម្នាក់នៅក្នុងមន្ទីរពេទ្យបង្អែកខណ្ឌដង្កោ កាលពីវេលាម៉ោង២រំលងអធ្រាត្រឈានចូលថ្ងៃទី២៤ មេសា ព្រមទាំងគ្មានប្រាក់ឲ្យថ្លៃពេទ្យឡើយ ។
ស្ត្រីខាងលើបានឲ្យដឹងថា គាត់មានឈ្មោះ ធឿន ហ៊ាន អាយុ៤៣ឆ្នាំ ជាកម្មការិនីកាត់ព្រុយខោ ស្នាក់នៅផ្ទះជួលក្នុងភូមិម័ល សង្កាត់ដង្កោ ខណ្ឌដង្កោ និងមានស្រុកកំណើតនៅក្នុងភូមិអូរតាប៉ោង ឃុំអូរតាប៉ោង ស្រុកបាកាន ខេត្តពោធិ៍សាត់ ។ ដំបូងឡើយគាត់មានប្ដីដ៏ល្អម្នាក់ដែលបានរៀបការត្រឹមត្រូវតាមប្រពៃណីនិងបានកូនស្រី២នាក់ជាចំណងដៃ ប៉ុន្តែជាអកុសលប្ដីបានស្លាប់ចោលគាត់និងកូនទាំងពីរនាក់កាលពីប៉ុន្មានឆ្នាំមុន ទុកឲ្យគាត់និងកូនរស់នៅកំព្រារងាគ្មានទីពឹងឡើយ ។
ស្ត្រីខាងលើបានបន្តថា ក្រោយពេលប្ដីស្លាប់ចោលគាត់និងកូនៗបាននាំគ្នាចាកចេញពីស្រុកកំណើតមកភ្នំពេញដើម្បីរកការងារធ្វើ ហើយគាត់បានជួបនឹងបុរសម្នាក់ ដែលគាត់មិនបញ្ចេញឈ្មោះ ហើយក៏មានចិត្តស្រលាញ់គ្នានិងបានយកគ្នាជាប្ដីប្រពន្ធក្រោមការជំទាស់ពីកូនស្រីទាំងពីរនាក់ ។ ប៉ុន្តែដោយសារតែមើលទៅបុរសនោះអាចពឹងពាក់ជាគូអនាគតបាន ទើបគាត់ជម្នះយកបុរសនោះ និងបានរស់នៅជាប្ដីប្រពន្ធក្រោមដំបូលផ្ទះតែមួយ ។ ចំណែកកូនៗរបស់គាត់បានសម្ដែងការខឹងសម្បាយ៉ាងខ្លាំង រហូតនាំគ្នាចាកចេញពីគាត់ទៅធ្វើជាពលករនៅក្រៅប្រទេសបាត់ ដោយមិនដឹងថាទៅប្រទេសណានោះឡើយ និងមិនដែលគិតគូរពីគាត់ទេ ។
ប្រភពបានបន្តថា ក្រោយពីរស់នៅជាមួយប្ដីក្រោយមួយរយៈពេលគាត់មានផ្ទៃពោះ ប្ដីក្រោយនេះមានចិត្តមិនស្មោះត្រង់បានផិតក្បត់លួចចុះចោលគាត់ទៅមានស្រីថ្មីម្នាក់ទៀតដែលជាហេតុធ្វើឲ្យគាត់ក្លាយជាស្រី្តមេម៉ាយជាលើកទី២ និងខិតខំតស៊ូពពោះក្នុងស្ថានភាពលំបាកលំបិនម្នាក់ឯងរហូតដល់គ្រប់ខែ ។ គាត់ត្រូវបានអ្នកជិតខាងនាំទៅកាន់មន្ទីរពេទ្យបង្អែកខណ្ឌដង្កោ និងសម្រាលបានកូនប្រុសម្នាក់កាលពីវេលាម៉ោង២រំលងអធ្រាត្រឈានចូលថ្ងៃទី២៤ ខែមេសា ។
ស្ត្រីខាងលើបានបន្តថា ខណៈនោះគាត់គ្មានប្រាក់សូម្បីតែមួយរៀល ចំណែកគ្រូពេទ្យបានយកថ្លៃសេវាបង្កើតកូនចំនួន៩ម៉ឺនរៀល ប៉ុន្តែគាត់គ្មានប្រាក់ឲ្យពេទ្យនោះទេ ហើយដោយសារការអាណិតអាសូរដល់គាត់ទើបអ្នកជិតខាងយកប្រាក់ចំនួន៥ម៉ឺនរៀលទៅជួយ និងនៅសល់៤ម៉ឺនរៀលទៀតគ្រូពេទ្យអនុគ្រោះមិនយកឡើយ និងបានឲ្យគាត់ត្រឡប់ទៅផ្ទះវិញចុះ ។
បច្ចុប្បន្នស្ដ្រីអភ័ព្វរូបនេះពិតជាទីទ័លខ្លាំងណាស់គ្មានលទ្ធភាពអាចចិញ្ចឹមកូនតូចនេះបានទេ ។ គាត់និយាយថា ប្រសិនបើមានសប្បុរសជនណាចង់បានទារកយកទៅចិញ្ចឹម គាត់នឹងប្រគល់ឲ្យយកទៅចិញ្ចឹមចុះ ដើម្បីអនាគតកូនម្នាក់ឱ្យបានត្រចេះត្រចង់នឹងគេ ៕
ចែករំលែកព័តមាននេះ