ប្រមុខកងទ័ពអាមេរិក និងកងកម្លាំងអន្តរជាតិនៅអាហ្វហ្គានីស្ថាន ឧត្តមសេនីយ៍អាមេរិក JOHN NICHOLSON កាលពីថ្ងៃទី២៤ មេសា ពុំបដិសេធឡើយព័ត៌មានទាំងឡាយដែលថា រុស្ស៊ីផ្តល់ការទ្រទ្រង់តាមរូបភាពផ្សេងៗដល់ពួកតាលីបង់អាហ្វហ្គានីស្ថាន ពិសេសតាមរយៈការផ្តល់អាវុធ ។
ឆ្លើយតបសំណួររបស់អ្នកកាសែតម្នាក់ ពេលរដ្ឋមន្ត្រីការពារប្រទេសអាមេរិក លោក JAMES MATTIS មកបំពេញទស្សនកិច្ចនៅក្រុងកាប៊ុល ឧត្តមសេនីយ៍រូបនេះថ្លែងថា ខ្ញុំពុំបដិសេធឡើយនូវព័ត៌មាននេះ ។
មួយរយៈមកហើយ បណ្តាអ្នកទទួលខុសត្រូវអាេមរិករិះគន់ពីឥទ្ធិពលអាក្រក់របស់រុស្ស៊ីនៅអាហ្វហ្គានីស្ថាន ក៏ប៉ុន្តែការធ្វើអត្ថាធិប្បាយនានានៅពុំទាន់មានក្រៅពីចេញពីមាត់របស់បណ្តាមន្ត្រីយោធាជាន់ខ្ពស់អាមេរិកនៅឡើយ ។
មេបញ្ជាការជាន់ខ្ពស់របស់កងកម្លាំងសម្ព័ន្ធមិត្តនៅអឺរ៉ុប ឧត្តមសេនីយ៍អាមេរិក CURTIS SCAPARROTTI កាលពី១ខែមុននេះ ធ្លាប់ធ្វើការចោទប្រកាន់បែបនេះ ដែលរុស្ស៊ីចាត់ទុកថាជាការភូតកុហក ។
អ្នកទទួលខុសត្រូវអាមេរិកមិនបញ្ចេញឈ្មោះម្នាក់ថ្លែងទៅកាន់សារព័ត៌មាននៅក្រុងកាប៊ុលថា យោងតាមព័ត៌មានស៊ើបការណ៍អាមេរិករុស្ស៊ីបានផ្តល់ជំនួយហិរញ្ញវត្ថុ ព្រមទាំងអាវុធផងដែរដល់ពួកតាលីបង់ ពិសេសកាំភ្លើងយន្ត ។
លោក JAMES MATTIS ដែលមកកាន់អាហ្វហ្គានីស្ថានជាលើកដំបូងក្រោយការទម្លាក់គ្រាប់បែកយក្សនៅទីនោះថ្លែងថា រាល់ការលួចផ្តល់អាវុធរបស់បរទេសនឹងជាការរំលោភបំពានមួយលើច្បាប់អន្តរជាតិ ។
គួររំលឹកថា ពេលសហភាពសូវៀតលើកទ័ពចូលអាហ្វហ្គានីស្ថានអាមេរិកបានផ្តល់អាវុធដោយចំហដល់ពួកមូចាហ៊ីឌីន ៕
ចែករំលែកព័តមាននេះ