ប្រធានាធិបតីអាមេរិកលោកដូណាល់ ត្រាំ ថ្លែងកាលពីថ្ងៃទី២៤ មេសា ថា ក្រុមប្រឹក្សាសន្តិសុខ អ.ស.ប ត្រូវរៀបចំខ្លួនអនុម័តទណ្ឌកម្មថ្មីៗប្រឆាំងកូរ៉េខាងជើង ដោយលោករិះគន់ស្ថាប័ននេះថា ពុំអាចបញ្ចេញសកម្មភាពប្រឆាំងការវាយប្រហារដោយអាវុធគីមីនៅស៊ីរី ។
លោកថ្លែងទៅកាន់ក្រុមអ្នកកាសែតថា ស្ថានភាពដដែលនៅកូរ៉េខាងជើងពុំអាចទទួលយកបានឡើយ ហើយក្រុមប្រឹក្សាសន្តិសុខ អ.ស.ប ត្រូវតែត្រៀមដាក់ទណ្ឌកម្មកាន់តែខ្លាំងថែមទៀត ប្រឆាំងកម្មវិធីនុយក្លេអ៊ែរ និងបាលីស្ទិករបស់កូរ៉េខាងជើង ។ នេះជាការគំរាមកំហែងពិតប្រាកដមួយចំពោះពិភពលោក ដែលយើងចង់ចរចា ឬអត់ ។ កូរ៉េខាងជើងជាបញ្ហាអន្តរជាតិធំមួយ ហើយយើងត្រូវដោះស្រាយបញ្ហានេះ ។
កាលពីថ្ងៃទី២៣ មេសា លោកត្រាំ បានជួបសន្ទនាតាមទូរស័ព្ទជាមួយសមភាគីចិន លោកស៊ី ជីនពីង ដោយនាឱកាសនោះលោកយល់ថា អំពើទាំងឡាយរបស់របបកូរ៉េខាងជើងបង្កអស្ថេរភាពនៅឧបទ្វីបកូរ៉េ ។
ប្រទេសចិនកាលពីថ្ងៃទី២៤ មេសា ស្នើដល់បណ្តាភាគីទាក់ទិនឱ្យរក្សាភាពស្ងប់ស្ងាត់ ហើយប្រកាន់ការអត់ធ្មត់ ហើយចៀសវាងកុំធ្វើរាល់សកម្មភាព ដែលអាចធ្វើឱ្យធ្ងន់ធ្ងរថែមដល់សភាពការណ៍នៅឧបទ្វីបកូរ៉េ ។ អ្នកនាំពាក្យក្រសួងការបរទេសចិន លោក GENG SHUANG អះអាងបែបនេះក្នុងសន្និសីទសារព័ត៌មានមួយដោយលោកថា សភាពការណ៍នៅឧបទ្វីបកូរ៉េស្មុគស្មាញ រសើប ហើយតានតឹងខ្លាំងបំផុត ។
ចំណែកកូរ៉េខាងជើងវិញថ្លែងកាលពីថ្ងៃទី២៤ េមសា ថា ខ្លួននឹងបន្តអភិវឌ្ឍន៍អាវុធនុយក្លេអ៊ែរ ដើម្បីការពារខ្លួនប្រឆាំងការគំរាមកំហែងខាងយោធាពីសំណាក់សហរដ្ឋអាមេរិក ។ ក្នុងបទអត្ថាធិប្បាយមួយ កាសែតបក្សពលករកូរ៉េ RODONG SINMUN គូសបញ្ជាក់ពីគ្រោះថ្នាក់នៃការដាក់ពង្រាយកងនាវាចម្បាំងនុយក្លេអ៊ែរអាមេរិកនៅឧបទ្វីបកូរ៉េ ។ កាសែតនេះអះអាងថា នេះជាការចាប់បង្ខំខាងយោធាជាក់ស្តែងមួយប្រឆាំងកូរ៉េខាងជើង និងជាសកម្មភាពគ្រោះថ្នាក់មួយ ដែលរុញច្រានឧបទ្វីបកូរ៉េឱ្យធ្លាក់ក្នុងសភាពការណ៍យ៉ាងក្តៅគគុកមួយ ។ ឆន្ទៈរបស់កងទ័ព និងប្រជាជនកូរ៉េគឺម៉ឺងម៉ាត់ ។ យើងប្តេជ្ញាកម្ទេចពួកឈ្លានពានរហូតដល់ទីបំផុត ហើយរហូតដល់បានជោគជ័យក្នុងការប្រឈមមុខជាមួយសហរដ្ឋអាមេរិក ដោយពង្រឹងតាមគ្រប់មធ្យោបាយ ដល់សមត្ថភាពនុយក្លេអ៊ែររបស់យើងក្នុងគោលដៅស្វ័យការពារ ។
កូរ៉េខាងជើងគំរាមលុបបំផុតអាមេរិកចេញពីផែនដីវ៉េបសាយផ្លូវការកូរ៉េជើងបានព្រមានសហរដ្ឋអាមេរិកថា ប្រទេសនេះនឹងត្រូវលុបបំបាត់ចោលពីផែនទីពិភពលោក ប្រសិនបើក្រុងវ៉ាស៊ីនតោនហ៊ានធ្វើសង្គ្រាមមួយនៅឧបទ្វីបកូរ៉េ ។
ខណៈសហរដ្ឋអាមេរិកប្រកាសពីការមកដល់នាពេលខាងមុខនេះរបស់កងនាវាចម្បាំងអាមេរិកនាំមុខដោយនាវាផ្ទុកយន្តហោះ USS CARL VINSON នៅសមុទ្រជប៉ុនកាសែត RODONG SINMUN សរសេរថា ការគំរាមកំហែងបែបនេះអាចធ្វើឱ្យគេចាប់អារម្មណ៍ខ្លាំង ក៏ប៉ុន្តែដាច់ខាតពុំអាចគំរាមកូរ៉េខាងជើងបានឡើយ ។
វ៉េបសាយ URIMINZOKKIRI វាយតម្លៃថា ការបញ្ជូននាវាផ្ទុកយន្តហោះនុយក្លេអ៊ែរមកកាន់ឧបទ្វីបកូរ៉េ ជាភស្តុតាងមួយបង្ហាញថា ការលុកលុយកូរ៉េខាងជើងជិតមកដល់រាល់ថ្ងៃ ។ ការបញ្ជូននាវា USS CARL VINSON ជាការប្រកាសសង្គ្រាមមួយ ។ វ៉េបសាយនេះ ព្រមានក្រុងវ៉ាស៊ីនតោនថា ក្នុងករណីមានការវាយប្រហារនោះពិភពលោកនឹងឃើញថាតើបណ្តានាវាផ្ទុកយន្តហោះនុយក្លេអ៊ែរ ដែលគ្មានមនសិការរបស់ក្រុងវ៉ាស៊ីនតោនត្រូវប្រែក្លាយទៅជាគំនរដែក ហើយលិចទៅក្នុងសមុទ្របែបណា ហើយតើកូរ៉េខាងជើងលុបបំបាត់សហរដ្ឋអាេមរិកចេញពីភពផែនដីបែបណា ។
អនុប្រធានាធិបតីអាមេរិកលោក MIKE PENCE ដែលទើបបញ្ចប់ដំណើរទស្សនកិច្ចនៅក្នុងតំបន់ថ្លែងថា រាល់ការជ្រើសរើសស្ថិតលើតុរួចហើយក្នុងនោះមានការជ្រើសរើសខាងយោធាផងប្រឈមមុខនឹងមហិច្ឆតានុយក្លេអ៊ែររបស់កូរ៉េខាងជើង ។ កូរ៉េខាងជើងដឹកនាំដោយលោកគីម ជុងអ៊ុន រយៈពេលចុងក្រោយនេះបានបង្កើនវោហាសាស្ត្រដុតរោល ហើយធ្វើការបាញ់សាកល្បងមីស៊ីល២គ្រាប់ គ្រាន់តែចាប់ពីដើមខែមេសានេះ ។ ម្យ៉ាងវិញទៀត លេចពាក្យចចាមអារ៉ាមពីលទ្ធភាពនៃការសាកល្បងនុយក្លេអ៊ែរលើកទី៦របស់កូរ៉េខាងជើងទៀតផង ៕
ចែករំលែកព័តមាននេះ