ប្រទេសជប៉ុន ៖ រដ្ឋមន្ត្រីក្រសួងហិរញ្ញវត្ថុ លោក Taro Aso នៅថ្ងៃសុក្រ បានលើកឡើងពីការប្រុងប្រយ័ត្នលើកិច្ចព្រមព្រៀងពាណិជ្ជកម្មទ្វេភាគីជាមួយសហរដ្ឋអាមេរិក ដោយនិយាយថា ទីក្រុងវ៉ាស៊ីនតោននឹងគ្មានលក្ខខណ្ឌល្អប្រសើរជាងកិច្ចព្រមព្រៀងភាពជាដៃគូអន្តរប៉ាស៊ីហ្វិកពហុភាគី ឬហៅកាត់ថា TPP ដែលសហរដ្ឋអាមេរិកទើបតែដកខ្លួនចេញទេ ។
លោក Aso បានប្រាប់សន្និសីទកាសែតបន្ទាប់ពីបញ្ចប់កិច្ចប្រជុំថ្នាក់រដ្ឋមន្ត្រីហិរញ្ញវត្ថុនៃប្រទេសទាំង២០ នៅទីក្រុងវ៉ាស៊ីនតោនថា ៖ « គ្មានការធានាថា សហរដ្ឋអាមេរិកអាចទទួលបានលក្ខខណ្ឌល្អប្រសើរជាងមុននៅលើមូលដ្ឋានទ្វេភាគី ជាជាងការនៅក្រោមកិច្ចព្រមព្រៀង TPP ទេ » ។
លោក Aso បន្តថា ៖ « យើងជឿជាក់ថា កិច្ចព្រមព្រៀង TPP គឺជាប្រព័ន្ធដ៏ល្អសម្រាប់សហរដ្ឋអាមេរិក និងជប៉ុន » ។ លោកបានបង្ហាញទស្សនៈថា ប្រទេសទាំងពីរត្រូវការពិភាក្សាពីអ្វីដែលល្អបំផុតសម្រាប់ភាគីទាំងសងខាង ។
ប្រធានាធិបតីសហរដ្ឋអាមេរិក លោក Donald Trump កំពុងស្វែងរកកិច្ចព្រមព្រៀងលើកកម្ពស់ពាណិជ្ជកម្មទ្វេភាគី ជំនួសឱ្យពហុភាគី។ លោក Trump បានដកសហរដ្ឋអាមេរិកចេញពីកិច្ចព្រមព្រៀង TPP ដែលមានប្រទេសចំនួន១២ ។
បន្ទាប់ពីកិច្ចសន្ទនាសេដ្ឋកិច្ចរវាងជប៉ុន និងសហរដ្ឋអាមេរិកកាលពីដើមសប្តាហ៍នេះ លោក Mike Pence អនុប្រធានាធិបតីសហរដ្ឋអាមេរិកបង្ហាញក្តីសង្ឃឹមថា អាមេរិកនឹងអាចចរចាកិច្ចព្រមព្រៀងពាណិជ្ជកម្មទ្វេភាគី ។
មន្ត្រីជប៉ុនជាច្រើនរូបបានប្រុងប្រយ័ត្នចំពោះសន្ធិសញ្ញានេះ ខណៈបារម្ភពីសហរដ្ឋអាមេរិកអាចនឹងជំរុញឱ្យជប៉ុនបង្កើនការនាំចូលរថយន្ត និងផលិតផលកសិកម្មបន្ថែមទៀត ។
កាលពីថ្ងៃពុធ នៅទីក្រុងញូវយ៉ក លោក Aso និយាយថា ជប៉ុន និងប្រទេសនៅតំបន់ប៉ាស៊ីហ្វិកផ្សេងទៀតកំពុងរៀបចំពិភាក្សានៅប្រទេសវៀតណាមនាខែក្រោយ អំពីលទ្ធភាពឆ្ពោះទៅមុខជាមួយសមាជិកនៃកិច្ចព្រមព្រៀង TPP ទាំង១១ប្រទេស ។
កិច្ចព្រមព្រៀង TPP អាចមានប្រសិទ្ធភាពក្នុងទម្រង់បច្ចុប្បន្ន លុះត្រាតែវាត្រូវបានផ្ដល់សច្ចាប័នដោយសមាជិកយ៉ាងហោចណាស់ចំនួន៦ តំណាងឱ្យ៨៥%នៃផលិតផលក្នុងស្រុកសរុបរួមបញ្ចូលគ្នានៃប្រទេសហត្ថលេខីដើមទាំង១២។ សហរដ្ឋអាមេរិកតែមួយ ស្មើនឹង៦០%នៃផលិតផលក្នុងស្រុកសរុបរបស់ក្រុមនេះ ។
ប្រទេសហត្ថលេខីនៃកិច្ចព្រមព្រៀង TPP ទាំង១១ រួមមាន អូស្ត្រាលី ព្រុយណេ កាណាដា ស៊ីលី ជប៉ុន ម៉ាឡេស៊ី ម៉ិកស៊ិក នូវែលសេឡង់ ប៉េរូ សិង្ហបុរី និងវៀតណាម ៕
ចែករំលែកព័តមាននេះ