ទីក្រុងសេអ៊ូល ៖ រដ្ឋមន្ត្រីកូរ៉េខាងត្បូងបាននិយាយកាលពីថ្ងៃសុក្រសប្ដាហ៍មុនថា ប្រទេសខ្លួនគ្រោងនឹងលើកឡើងពីបញ្ហាហាមឃាត់ការនាំចូលដែកថែបរបស់សហរដ្ឋអាមេរិក នៅកិច្ចប្រជុំគណៈកម្មាធិការអង្គការពាណិជ្ជកម្មពិភពលោក (WTO) ក្នុងសប្តាហ៍នេះ ។
ការសម្រេចចិត្តនេះកើតឡើងបន្ទាប់ពីលោកប្រធានាធិបតី Donald Trump ចេញការស៊ើបអង្កេតផ្នែកពាណិជ្ជកម្ម កាលពីថ្ងៃព្រហស្បតិ៍លើប្រទេសចិន និងប្រទេសនាំចេញដទៃទៀតនូវដែកថែបតម្លៃថោកមកកាន់ទីផ្សារអាមេរិក ដោយវាអាចនឹងមានការដាក់ពន្ធថ្មីផងដែរ ។
គួរបញ្ជាក់ថា សហរដ្ឋអាមេរិកបានដាក់ពន្ធជាច្រើនលើប្រទេសដែលលក់ដែកថែបក្នុងតម្លៃថោកពីកូរ៉េខាងត្បូង និងប្រទេសដទៃ ។
យោងតាមសមាគមដែកថែបកូរ៉េខាងត្បូងឲ្យដឹងថា សម្រាប់ផលិតផលដែកថែបរបស់ប្រទេសនេះ សហរដ្ឋអាមេរិកគឺជាទីផ្សារធំជាងគេបន្ទាប់ពីប្រទេសចិន ហើយអាមេរិកត្រូវបានរាប់បញ្ចូលប្រមាណ១២%នៃការនាំចេញលោហៈធាតុសរុបក្នុងឆ្នាំ២០១៦ របស់កូរ៉េខាងត្បូង ។
បុគ្គលិករបស់ក្រុមហ៊ុនដែកថែបកូរ៉េខាងត្បូងម្នាក់ប្រាប់ថា រដ្ឋាភិបាល និងវិស័យដែកថែបរបស់កូរ៉េខាងត្បូងគួរតែគិតដល់វិធានការទាំងអស់ រួមមានការដាក់បណ្តឹងទៅកាន់ WTO ដើម្បីឆ្លើយតបនឹងគោលនយោបាយការពារនិយមរបស់អាមេរិក ។
ឧត្តមមន្ត្រីម្នាក់ក្នុងក្រសួងពាណិជ្ជកម្មរបស់កូរ៉េខាងត្បូងនិយាយថា រដ្ឋាភិបាលបានពិចារណាលើការឆ្លើយតបរបស់ខ្លួនទៅកាន់សកម្មភាពរបស់អាមេរិក ។
មន្ត្រីម្នាក់នេះនិយាយថា ៖ « ពួកយើងបើកទូលាយលើរាល់ជម្រើសដែលមាន រួមទាំងការដាក់ពាក្យបណ្តឹងទៅកាន់ WTO ប៉ុន្តែពួកយើងមិនទាន់សម្រេចទេ ។ ពួកយើងនឹងសម្រេចបន្ទាប់ពីស្តាប់គំនិតរបស់វិស័យដែកថែបកូរ៉េជាមុនសិន » ។
ក្រសួងពាណិជ្ជកម្ម ឧស្សាហកម្ម និងថាមពលរបស់កូរ៉េខាងត្បូងបាននិយាយក្នុងសេចក្តីថ្លែងការណ៍មួយថា ៖ « រដ្ឋាភិបាលនឹងត្រួតពិនិត្យឲ្យបានដិតដល់ ហើយនឹងឆ្លើយតបដោយសកម្មជាមួយក្រុមហ៊ុនឯកជន » ។
ពួកគេបន្តថា បញ្ហាខាងលើនឹងត្រូវបានលើកឡើងក្នុងកិច្ចប្រជុំគណៈកម្មាធិការ WTO ដែលនឹងប្រារព្ធឡើងរវាងថ្ងៃទី២៥ ដល់២៧ មេសា នៅ Geneva ។
ក្រសួងខាងលើបន្តថា រដ្ឋមន្ត្រីពាណិជ្ជកម្ម លោក Joo Hyung-hwan នឹងមានកិច្ចប្រជុំជាមួយក្រុមហ៊ុនដែកថែបកូរ៉េ នាថ្ងៃទី២៧ មេសា ដើម្បីដឹងពីគំនិត និងពិភាក្សារកវិធីដោះស្រាយបញ្ហានេះ៕
ចែករំលែកព័តមាននេះ