រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា កម្ពុជាបាននាំចេញផលិតផលក្នុងវិស័យកាត់ដេរកើនឡើងខ្ពស់ជារៀងរាល់ឆ្នាំ ហើយក្នុងឆ្នាំ២០១៦កន្លងទៅ មានទឹកប្រាក់សរុបជាង៧ពាន់លានដុល្លារ ខណៈលក្ខខណ្ឌការងារនៃវិស័យនេះល្អប្រសើរជាងឆ្នាំមុនៗ ។
ថ្លែងក្នុងពិធីប្រារព្ធខួបអនុស្សាវរីយ៍លើកទី១៣១ ទិវាពលកម្មអន្តរជាតិ១ ឧសភា កាលពីថ្ងៃទី២៣ មេសា លោកបណ្ឌិត អិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ៖ « តម្លៃសរុបនៃការនាំចេញផលិតផលផ្នែកកាត់ដេរសម្លៀកបំពាក់ និងស្បែកជើងបានកើនខ្ពស់ជារៀងរាល់ឆ្នាំ ។ ដោយឡែក ក្នុងឆ្នាំ២០១៦ មានប្រមាណជាង៧,៣ពាន់លានដុល្លារអាមេរិក ។ បច្ចុប្បន្ន លក្ខខណ្ឌការងារ សិទ្ធិកម្មករនិយោជិត សេរីភាពសហជីព និងអង្គការវិជ្ជាជីវៈមានស្ថានភាពល្អប្រសើរជាងពេលណាទាំងអស់នៅក្នុងប្រវត្តិសាស្ត្រ ដែលប្រការនេះបានក្លាយជាចំណុចមានប្រៀបខ្លាំងរបស់កម្ពុជាយើង ក្នុងការប្រកួតប្រជែងលើទីផ្សារនាំចេញផលិតផលវិស័យវាយនភ័ណ្ឌកាត់ដេរ សម្លៀកបំពាក់ និងផលិតស្បែកជើង » ។
ទាក់ទងនឹងវិស័យវាយនភ័ណ្ឌ និងកាត់ដេរនៅកម្ពុជា លោករដ្ឋមន្ត្រីបញ្ជាក់ថា ៖ «ជាង១១ឆ្នាំនេះ យើងបានដំឡើងប្រាក់ឈ្នួលអប្បបរមាជាបន្ដបន្ទាប់ចំនួន១១លើក ។ ជាក់ស្តែង នៅឆ្នាំ២០១៧ ប្រាក់ឈ្នួលអប្បបរមាបានដំឡើងពីចំនួន១៤០ ទៅ១៥៣ដុល្លារអាមេរិក (កើន៩,៣%) ហើយបើគិតទាំងប្រាក់អត្ថប្រយោជន៍ផ្សេងៗ កម្មករ និយោជិតម្នាក់ៗអាចទទួលបានប្រាក់ចំណូលពី១៧០ ទៅ១៨១ដុល្លារអាមេរិកក្នុងមួយខែ » ។
លោករដ្ឋមន្ត្រីលើកឡើងថា យោងតាមលទ្ធផលនៃការចុះបញ្ជីសហគ្រាស គ្រឹះស្ថាន ស្របតាមបទប្បញ្ញតិ្តនៃច្បាប់ស្តីពីការងារ សរុបមានចំនួន១១.១៦៨គ្រឹះស្ថាន និងមានកម្មករនិយោជិតជាង១,២លាននាក់ ក្នុងនោះរោងចក្រវាយនភ័ណ្ឌកាត់ដេរ និងផលិតស្បែកជើង មាន១.១០៧គ្រឹះស្ថាន និងកម្មករនិយោជិតជាង៧៤ម៉ឺននាក់ ដោយបានទទួលប្រាក់ឈ្នួលជាមធ្យមប្រមាណជាង១ពាន់លានដុល្លារអាមេរិកក្នុង១ឆ្នាំ ព្រមទាំងបង្កើតមុខរបរប្រយោលបន្ថែមដល់ប្រជាពលរដ្ឋប្រមាណ២លាននាក់ដូចជា ជួលផ្ទះ លក់ដូរម្ហូបអាហារ និងដឹកជញ្ជូន ។
លោកស្រី អីុហ្គូណា ដូប្រាចា ប្រធានគ្រប់គ្រងធនាគារពិភពលោកប្រចាំកម្ពុជា មានប្រសាសន៍ថា ៖ « កំណើនសេដ្ឋកិច្ចកម្ពុជានៅតែបន្តរឹងមាំក្នុងរយៈពេលប៉ុន្មានឆ្នាំខាងមុខទៀត។ វាពិតជាសំខាន់ណាស់ក្នុងការជំរុញការវិនិយោគលើផលិតភាពដែលគាំទ្រដល់កំណើនសេដ្ឋកិច្ច និងប្រជាជនក្រីក្រ ធ្វើយ៉ាងណា ឲ្យផលប្រយោជន៍នៃកំណើននាពេលខាងមុខបានដល់ប្រជាជនកម្ពុជាទាំងមូល » ៕
ចែករំលែកព័តមាននេះ