មេឆ្នោតធំៗដុះស្លែមួយចំនួននៅក្នុងក្រុងបាត់ដំបង នៅតែបន្តដំណើរការយ៉ាងរលូន ប្រឆាំងនឹងបទបញ្ជារបស់រាជរដ្ឋាភិបាល ដែលពួកគេបាននាំគ្នារើតោករើហឹងចល័តពីទីតាំងចាស់ ផ្លាស់ទៅកាន់ទីតាំងថ្មី ដើម្បីបង្វែរពីការតាមប្រមាញ់របស់អាជ្ញាធរ ដែលគេសង្ស័យថា
ខេត្តបាត់ដំបង ៖ មេឆ្នោតធំៗដុះស្លែមួយចំនួននៅក្នុងក្រុងបាត់ដំបង នៅតែបន្តដំណើរការយ៉ាងរលូន ប្រឆាំងនឹងបទបញ្ជារបស់រាជរដ្ឋាភិបាល ដែលពួកគេបាននាំគ្នារើតោករើហឹងចល័តពីទីតាំងចាស់ ផ្លាស់ទៅកាន់ទីតាំងថ្មី ដើម្បីបង្វែរពីការតាមប្រមាញ់របស់អាជ្ញាធរ ដែលគេសង្ស័យថា នេះជាផែនការ នៃការសមគំនិតគ្នារវាងមេឆ្នោត និងមន្ត្រីខិចខូចមួយចំនួន ដែលទទួលបានផលប្រយោជន៍ពីល្បែ.ងឆ្នោតនេះ។ នេះបើតាមប្រភពព័ត៌មានដែលបានបង្ហើបឲ្យដឹងជាបន្តបន្ទាប់នៅប៉ុន្មានថ្ងៃនេះ។
អ្នកចាក់កន្ទុយលេខ ដែលជាប្រភពព័ត៌មានដ៏សំខាន់បានទម្លាយឲ្យដឹងកាលពីចុងសប្ដាហ៍មុននេះថា មានមេឆ្នោតធំៗចំនួន២ទីតាំង បានផ្លាស់ប្ដូរចេញពីកន្លែងចាស់ ផ្លាស់ទៅបើកលួចលាក់នៅទីតាំងថ្មី ក្រោយពីមានការរឹតបន្តឹង និងការតាមបង្ក្រាបរបស់សមត្ថកិច្ច។
ប្រភពដដែលបានប្រាប់ថា មេឆ្នោតដុះស្លែទាំង២ទីតាំងនេះ មានមួយនៅម្ដុំខាងត្បូងផ្សារបឹងឈូក និងមួយទៀតនៅម្ដុំខាងជើងផ្សារបឹងឈូក ក្បែរចំណតរថយន្ត។ ហើយមេកន្ទុយលេខធំៗទាំង២នេះ បានរើតោត រើហឹង ចាកចេញពីទីតាំងចាស់ខាងលើ ផ្លាស់ទៅកាន់ទីតាំងថ្មី នៅក្បែរៗគ្នា ស្ថិតក្នុងភូមិផ្កាស្លា សង្កាត់ចំការសំរោង ក្រុងបាត់ដំបង។
អ្នកភូមិផ្កាស្លា ដែលបានឃើញ និងបានដឹងពីសកម្មភាពក្រុមមេឆ្នោតដុះស្លែទាំង២ទីតាំងនេះ បានបង្ហើបឲ្យដឹងថា មេឆ្នោតទាំង២នេះទើបតែទៅជួលផ្ទះនៅម្ដុំភូមិផ្កាស្លា ជាបន្តបន្ទាប់ក្នុងអំឡុងពេលអាជ្ញាធរប្រកាសរឹតបន្តឹង និងតាមបង្ក្រាបរាល់ល្បែ.ងស៊ីសងខុសច្បាប់ទាំងអស់ កាលពីពេលថ្មីៗកន្លងទៅនេះ។
ប្រភពដដែលបាននិយាយថា មេឆ្នោតទាំងនេះ នៅតែបើកដំណើរការល្បែ.ងឆ្នោតរបស់ខ្លួនយ៉ាងស្ងាត់ស្ងៀម តែបានផ្លាស់ប្ដូររូបភាព។ ពួកគេមិនប្រើក្រដាស់កត់ត្រាទេ គឺពួកគេបូក ឬកត់ត្រាកន្ទុយលេខតាមប្រព័ន្ធតេឡេក្រាម ឬប្រព័ន្ធទំនាក់ទំនងផ្សេងៗ ដែលមេធំៗទាំងនេះ មានទំនាក់ទំនងគ្នាជាមួយកូនដៃ (កូនកាតុង) ដែលបញ្ជូនមកពីតាមបណ្ដាស្រុកនានា ឬនៅក្នុងក្រុងបាត់ដំបង។
បើតាមប្រភពដដែលនេះបានបញ្ជាក់ដែរថា មេកន្ទុយលេខទាំង២នេះ លក់តែ «ឆ្នោតសៀម និងឆ្នោតយួន» ទេ ក្រៅពីនេះមិនទទួលឡើយ។
ហើយប្រជាពលរដ្ឋមួយចំនួនដែលរស់នៅក្បែរទីតាំងមេឆ្នោតទាំង២ខាងលើនេះ ហាក់មានការព្រួយបារម្ភ និងធុញទ្រាន់ចំពោះសកម្មភាពល្បែ.ងនេះ។ ពួកគេខ្លាចការប្រព្រឹត្តល្បែ.ងនេះនាំឲ្យប៉ះពាល់ដល់សន្តិសុខ ដល់ការរស់នៅរបស់អ្នកក្បែរខាង និងនៅក្នុងមូលដ្ឋាន ខណៈពីមុនមកមិនធ្លាប់មានសោះ ហើយស្របពេលដែលបទល្មើសគ្រឿងញៀ.នសព្វថ្ងៃកំពុងរីករាលដាលបន្ថែមទៀត។ ដោយសារការព្រួយបារម្ភពីបញ្ហាសន្តិសុខ អ្នករស់នៅក្បែរខាងដែលស្គាល់មេឆ្នោតនេះ បានសួរនាំអំពីការបើកទីតាំងឆ្នោតដ៏ធំនេះ តែមេឆ្នោតមួយណាក៏អះអាងថា «គ្មានបញ្ហាទេ ព្រោះពួកគេបានបង់សំណូកឲ្យទៅសមត្ថកិច្ចគ្រប់សព្វអស់ហើយ»។
បើតាមប្រជាពលរដ្ឋដែលសុំមិនប្រាប់អត្តសញ្ញាណមេឆ្នោត បានបញ្ជាក់ថា មេឆ្នោតទាំងនោះ ហាក់បានបង្ហាញពីអំនួតផង បែបលួងលោមអ្នកភូមិផងយ៉ាងដូច្នេះថា «កុំបារម្ភអី រឿងសមត្ថកិច្ចពួកគេបានបង់លុយគ្រប់ថ្នាក់អស់ហើយ គេមិនហ៊ានចាប់ទេ»។ បានន័យថា ពួកគេគ្រាន់តែប្ដូរទីតាំងតាមការចង្អុលបង្ហាញពីមន្ត្រីខិលខូចដែលទទួលសំណូក តែសុវត្ថិភាពនៅតែល្អដដែល។ មិនតែប៉ុណ្ណោះ មេឆ្នោតដុះស្លែទាំងនោះ ថែមទាំងបានប្រលយប្រាប់ឈ្មោះ មេៗសមត្ថកិច្ច ដែលទទួលសំណូកប្រចាំខែពីពួកគេឲ្យបានដឹងទៀតផង។
កោះសន្តិភាពមិនអាចស្វែងរកការបំភ្លឺពីមេកន្ទុយលេខទាំង២ទីតាំងខាងលើនេះបានទេ រហូតមកដល់ពេលនេះ។
បើទោះជាល្បែ.ងស៊ីសងគ្រប់ប្រភេទ ត្រូវបានបិទទ្វារស្ទើរទាំងស្រុង នៅក្នុងក្រុងបាត់ដំបង និងនៅតាមបណ្ដាស្រុកខ្លះ ក្រោយពីមានបទបញ្ជាយ៉ាងម៉ឺងម៉ាត់ពីថ្នាក់ដឹកនាំប្រទេសយ៉ាងណាក្ដី តែក្រុមមេល្បែ.ងមួយចំនួននៅតែបន្តបើកលួចលាក់ក្រោមរូបភាពចល័តទីតាំង ដែលគេសង្ស័យមានការឃុបឃិតពីមន្ត្រីខិលខូចមួយចំនួន។ ល្បែ.ងស៊ីសងដែលគេតាមដានឃើញនៅតែមានសកម្មភាពបន្តបើកលួចលាក់នេះ គឺ «ល្បែ.ងឆ្នោត និងល្បែង.អនឡាញ»។
តាមអភិបាលខេត្តបាត់ដំបង លោក សុខ លូ បានប្រញាប់ប្រញាល់កោះប្រជុំ «គណៈបញ្ជាការកងឯកភាពខេត្ត» យ៉ាងតន់ហន់ ដើម្បីដាក់ចេញនូវផែនការទប់ស្កាត់ និងបង្ក្រាបល្បែ.ងស៊ីសងខុសច្បាប់នេះ ក្រោយពីមានបទបញ្ជាពីប្រមុខរាជរដ្ឋាភិបាល។ លុះនៅថ្ងៃបន្ទាប់ លោក សាត គឹមសាន ស្នងការខេត្ត ក៏បានស្ទុះស្ទារកោះប្រជុំមន្ត្រីក្រោមឱវាតក្នុងអង្គភាពភ្លាមៗដែរ។ ជាពិសេសមន្ត្រីការិយាល័យជំនាញ និងតាមអធិការស្រុក ក្រុង ដើម្បីរៀបចំផែនការចុះបង្ក្រាបល្បែ.ងតាមបទបញ្ជាថ្នាក់ដឹកនាំកំពូល។
នៅក្នុងអង្គប្រជុំ លោកស្នងការបានដាក់ចេញនូវផែនការក្ដៅ និងបែបម៉ឺងម៉ាត់បំផុត ដល់ថ្នាក់ដឹកនាំតាមអធិការស្រុក ក្រុង និងនៅតាមមូលដ្ឋាន។ លោកស្នងការបានប្រកាសថា «ចាប់ពីពេលនេះតទៅ នៅតាមអធិការស្រុក ក្រុង និងតាមបណ្ដាប៉ុស្ដិ៍រដ្ឋបាល ប្រសិនបើរកឃើញ នៅតែមានល្បែ.ងស៊ីសងខុសច្បាប់ ម្ចាស់មូលដ្ឋានត្រូវតែទទួលខុសត្រូវចំពោះមុខថ្នាក់ដឹកនាំ»។ ប៉ុន្តែផ្ទុយទៅវិញ រហូតមកដល់ពេលនេះ មិនទាន់ឃើញមានថ្នាក់ដឹកនាំមូលដ្ឋានណាម្នាក់ ត្រូវទទួលរងទណ្ឌកម្ម ឬទទួលខុសត្រូវចំពោះមុខថ្នាក់ដឹកនាំនៅឡើយទេ ខណៈល្បែ.ងស៊ីសងនៅតែដំណើរការយ៉ាងគគ្លើន។
ជាក់ស្ដែងល្បែ.ងស៊ីសង ដែលគេប្រមូលផ្ដុំគ្នាលួចលេងនៅក្រោមដំបូលអគារកន្ទុយកាស៊ីណូ «ប៉ារីស» នៅស្រុកសំពៅលូន ដែលទើបបែកធ្លាយ និងបែកហ្វូងកាលពីខែមុននេះ និងល្បែ.ងអនឡាញ ដែលកម្លាំងការិយាល័យព្រហ្មទណ្ឌកំរិតស្រាល ទើបបង្ក្រាបបានចំនួន៣ទីតាំង កាលពីថ្ងៃទី០៣ ខែវិច្ឆិកា នៅក្នុងក្រុងបាត់ដំបង។
ករណីជាក់ស្ដែងទាំងនេះ រហូតដល់ពេលនេះ គេមិនទាន់ឃើញថ្នាក់ដឹកនាំនៅតាមអធិការស្រុក ក្រុង ឬនៅតាមមូលដ្ឋានណាម្នាក់ ត្រូវលោកស្នងការកោះហៅមកសួរនាំ យោងលើស្មារតី នៃខ្លឹមសារក្នុងកិច្ចប្រជុំនៅឡើយទេ (ផែនការដូចផែនស្ករ)។
ប៉ុន្តែយ៉ាងណាក៏ដោយ ពេលនេះមហាជនកំពុងតែទល់ភ្នែកតាមមើលបន្តទៀតថា តើទីតាំងមេឆ្នោតដុះស្លែចំនួន២កន្លែងដែលកំពុងប្រមូលម្ដុំគ្នាបូកកាតុងឆ្នោត នៅក្នុងភូមិផ្កាស្លាខាងលើនេះ អាជ្ញាធរខេត្ត ក្រុង និងសមត្ថកិច្ចបានដឹងដែរឬអត់? បើដឹង ឬរកឃើញទីតាំង តើគេមានវិធានការបែបណា ?
បើតាមប្រភពច្បាស់ការណ៍ដាច់ដោយឡែកមួយទៀត បានខ្សឹបប្រាប់ចុងក្រោយថា «មេឆ្នោតដ៏ធំមហិមាមួយកន្លែងទៀត ក៏កំពុងបើកដំណើរការយ៉ាងរលូនផងដែរ។ ទីតាំងនេះនៅម្ដុំខាងជើងផ្សារបឹងឈូកដែរ ដែលជ្រកក្រោមស្លាកវ៉េ និងប្ដូរប្រាក់ ទ្រូម៉ានី ដែលមានប្រពន្ធជាអ្នកគ្រប់គ្រងបុគ្គលិកស្រីៗប៉ុន្មាននាក់បូកកាតុងឆ្នោត និងមានស្វាមីធ្វើជាមន្ត្រីនគរបាលចាំកាងពីក្រោយខ្នងទៀត៕
ចែករំលែកព័តមាននេះ