ខេត្តស្វាយរៀង ៖ រថយន្តធុនធំមួយគ្រឿងដឹកឈើឆ្លងស្ពានទឹកវឹលបណ្តាលឲ្យបាក់ស្ពានសមត្ថកិច្ចយាមគល់ស្ពានព្យាយាមបិតបាំង និងរាយការណ៍ថា រថយន្តដឹកដីក្រុមហ៊ុនធ្វើថ្នល់ធ្វើឲ្យបាក់ស្ពាន រីឯក្រុមហ៊ុនធ្វើថ្នល់ប្រតិកម្មបង្វែថា រថយន្តដឹកស្រូវធ្វើឲ្យបាក់ស្ពាន ។ បើតាមសមត្ថកិច្ចនគបាលស្រុករមាសហែកបានបង្ហើបឲ្យដឹងថា រថយន្តធុនធំដឹកឈើបណ្តាលឲ្យបាក់ស្ពាននេះកើតឡើងកាលពីវេលាម៉ោងប្រមាណជា១និង១៥នាទីយប់រលងអធ្រាត្រ ថ្ងៃទី២៣ ខែមេសា ឆ្នាំ២០១៧ នៅចំណុចស្ពានទឹកវឹល ស្ថិតនៅភូមិកំពង់ត្រាច ឃុំកំពង់ត្រាច ស្រុករមាសហែក ។
បើតាមក្រុមជាងសាងសង់ស្ពានទឹកវឹលបានបង្ហើបឲ្យដឹងកាលពីវេលាម៉ោង១០និង៣០នាទីព្រឹកថ្ងៃទី២៤ ខែមេសា ឆ្នាំ២០១៧ ថា នៅវេលាម៉ោងប្រមាណជា១យប់រំលងអធ្រាត្រថ្ងៃទី២២ ខែមេសា ឆ្នាំ២០១៧ ឈានចូលថ្ងៃទី២៣ ខែមេសា ឆ្នាំ២០១៧ មានរថយន្តភ្លៅប្រាំចំនួន៣គ្រឿងសង្ស័យដឹកឈើបានបើកឆ្លងស្ពានទឹកវឹលពីទិសខាងជើងទៅត្បូង ឆ្លងផុតអស់២គ្រឿងហើយរថយន្តមួយគ្រឿងចុងក្រោយ(រថយន្តទី៣)បានបើកឆ្លងស្ពានជិតផុតដល់ចុងស្ពានខាងត្បូងក៏បានបាក់ស្ពាន រថយន្តនោះរោម៉ាស៊ីនឡើងរួចផុតស្ពានទៅលើថ្នល់ហើយក៏បន្ថែមល្បឿន បើកទៅទិសខាងត្បូងយ៉ាងរំភើយពុំមានរំខានដល់សមត្ថកិច្ចឡើយ ។
បើតាមប្រភពពីប្រជាពលរដ្ឋដែលរស់នៅតាមដងផ្លូវជិតស្ពានទឹកវឹលបានបង្ហើបឲ្យដឹងថា ក្នុងអំឡុងមុនចូលឆ្នាំនិងក្រោយចូលឆ្នាំថ្មីប្រពៃណីខ្មែរក្រុមឈ្មួញឈើបានដឹកឈើឆ្លងស្ពានទឹកវឹលនៅពេលយប់ពាក់កណ្តាលអធ្រាត្រ ហើយយប់ខ្លះ៣គ្រឿងយប់ខ្លះមានរហូត៧គ្រឿងក្នុងមួយសប្តាហ៍៣ជើង ដោយមានរថយន្តតូចមួយគ្រឿងជាអ្នករត់ការបង់ថ្លៃផ្លូវឲ្យសមត្ថកិច្ចដែលយាមកាមនៅចំណុចស្ពានទឹកវឹលនេះ ។ ហើយនៅយប់កើតហេតុបាក់ស្ពានទឹកវឹលនេះគឺមានរថយន្តភ្លៅប្រាំដឹកឈើបើកឆ្លងស្ពានទឹកវឹលនេះ ។
ទាក់ទិនករណីបាក់ស្ពាននេះដែរមន្ត្រីនគបាលស្រុករមាសហែកដែលយាមគោលដៅស្ពានទឹកវឹលនេះបាននិយាយថា គ្មានរថយន្តដឹកឈើបើកឆ្លងស្ពានបណ្តាលឲ្យបាក់ស្ពានទេគឺរថយន្តដឹកដីរបស់ក្រុមហ៊ុនធ្វើថ្នល់ ក្រោយមកមានប្រតិកម្មពីក្រុមហ៊ុនធ្វើថ្នល់តបថា ក្រុមហ៊ុនធ្វើថ្នល់មិនធ្វើការឬដឹកដីដាក់ថ្នល់ពេលយប់រហូតកណ្តាលអធ្រាត្រ ឬរំលងអធ្រាត្រនោះទេ ព្រឹកចូលធ្វើការនៅម៉ោង៦និង៣០នាទីឬម៉ោង៧ព្រឹក ល្ងាចសម្រាកយ៉ាងយូម៉ោង៦ល្ងាច ។ ហើយរថយន្តដឹកដីចំណុះ១៥តោនទៅ២៥តោនប៉ុណ្ណោះមិនអាចធ្វើឲ្យបាក់ស្ពានទេ ។ ចំណែករថយន្តដឹកឈើគឺរថយន្តភ្លៅប្រាំទម្ងន់ចាប់ពី៣០តោនទៅ៥០តោនទើបបណ្តាលឲ្យបាក់ស្ពាន ។
ក្រោយមកមន្ត្រីនគបាលរូបនោះឆ្លើយប្រាប់ភ្នាក់ងារសារព័ត៌មានថា រថយន្តដឹកស្រូវធ្វើឲ្យបាក់ស្ពាននេះក៏ប៉ុន្តែមានមន្ត្រីកងរាជអាវុធហត្ថម្នាក់សុំមិនបញ្ចេញឈ្មោះបានឲ្យដឹងថា គឺពិតជាមានរថយន្តដឹកឈើប្រាកដមែនគឺគេដឹកដាក់តាមដេប៉ូឈើក្នុងស្រុករមាសហែក និងស្រុករំដួល ។ ចំណែកប្រជាពលរដ្ឋវិញបានបង្ហើបឲ្យដឹងថា ពុំមែនដាក់តាមដេប៉ូទេគឺរថយន្តឈើទាំងនោះដឹកទៅប្រទេសវៀតណាមហើយបើការដឹកឈើនេះមិនធ្វើឲ្យបាក់ស្ពានទេក៏មិនបែកធ្លាយដែរលាក់ជិតឈឹង ៕
ចែករំលែកព័តមាននេះ