សូមកុំយល់ច្រឡំ…
រាជធានីភ្នំពេញ ៖ បន្ទាប់ពីមានមតិមួយចំនួន ក៏ដូចជាអង្គការសង្គមស៊ីវិលបានលើកឡើងថា ប្រព័ន្ធផ្សព្វផ្សាយភាគច្រើនស្ថិតនៅក្រោមការគ្រប់គ្រងរបស់គណបក្សកាន់អំណាចនោះត្រូវបានមន្ត្រីជាន់ខ្ពស់របស់គណបក្ស
រាជធានីភ្នំពេញ ៖ បន្ទាប់ពីមានមតិមួយចំនួន ក៏ដូចជាអង្គការសង្គមស៊ីវិលបានលើកឡើងថា ប្រព័ន្ធផ្សព្វផ្សាយភាគច្រើនស្ថិតនៅក្រោមការគ្រប់គ្រងរបស់គណបក្សកាន់អំណាចនោះត្រូវបានមន្ត្រីជាន់ខ្ពស់របស់គណបក្ស
រាជធានីភ្នំពេញ ៖ បន្ទាប់ពីមានមតិមួយចំនួន ក៏ដូចជាអង្គការសង្គមស៊ីវិលបានលើកឡើងថា ប្រព័ន្ធផ្សព្វផ្សាយភាគច្រើនស្ថិតនៅក្រោមការគ្រប់គ្រងរបស់គណបក្សកាន់អំណាចនោះត្រូវបានមន្ត្រីជាន់ខ្ពស់របស់គណបក្សនេះបំភ្លឺថាមិនពិតនោះទេ ។
លោក សុខ ឥសាន មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជា នៅថ្ងៃទី២៣ ខែមេសា បានធ្វើការបំភ្លឺទៅកាន់អង្គការសង្គមស៊ីវិលមួយចំនួនដែលយល់ច្រឡំថា គណបក្សប្រជាជនកម្ពុជា មានប្រព័ន្ធផ្សព្វផ្សាយច្រើនលើសលប់លើគណបក្សដទៃ ដែលជាការព្រួយបារម្ភពីការមិនស្មើភាពគ្នាក្នុងការឃោសនានយោបាយ ។
ពាក់ព័ន្ធនឹងបញ្ហានេះ លោក សុខ ឥសាន បញ្ជាក់ថា «មិនគួរអង្គការសង្គមស៊ីវិលព្រួយបារម្ភទេ ពីព្រោះមិនមែនជាដៃគូប្រកួតប្រជែងនយោបាយឯណា ។ គណបក្សប្រជាជនកម្ពុជាគ្មានប្រព័ន្ធផ្សព្វផ្សាយទេ ។ ការនិយាយថា គណបក្សប្រជាជនកម្ពុជា មានប្រព័ន្ធផ្សព្វផ្សាយច្រើននោះគឺជាការយល់ច្រឡំទាំងស្រុង ឬក៏អាចថាជាការបំផ្លើសផង» ។
លោក សុខ ឥសាន សង្កត់ធ្ងន់ថា «បណ្តាស្ថានីយវិទ្យុនិងទូរទស្សន៍ដែលមានសព្វថ្ងៃ គឺជារបស់ក្រុមហ៊ុនឯកជន រកស៊ីជាឯកជន ។ ការផ្សាយប្រចាំថ្ងៃ គឺជាព័ត៌មានដែលទាក់ទងនឹងសមិទ្ធផលសង្គមជាតិជារឿងធម្មតា ។ ការផ្សាយពាក់ព័ន្ធនឹងគណបក្សប្រជាជនកម្ពុជា ជាសន្តានចិត្តរបស់ម្ចាស់ស្ថានីយដែលជាសមាជិកគណបក្ស ឬគាំទ្រគណបក្ស តែត្រូវគោរពច្បាប់ និងគោលការណ៍របស់ គ.ជ.ប» ។
លោក សុខ ឥសាន ថ្លែងថា គណបក្សប្រជាជនកម្ពុជានិងរាជរដ្ឋាភិបាល គ្មានគោលការណ៍ណែនាំ ឬចាប់បង្ខំឱ្យផ្សាយឱ្យគណបក្សប្រជាជនកម្ពុជាទេ ។ ចាប់ពីពេលនេះតទៅសូមកុំយល់ច្រឡំទៀត ។
ទាក់ទងនឹងការឃោសនាបោះឆ្នោតវិញលោក សុខ ឥសាន ថ្លែងថា ថវិកាសម្រាប់ឃោសនាបោះឆ្នោតរបស់គណបក្សប្រជាជនកម្ពុជា ផ្អែកតាមសភាពការណ៍និងសំណូមពរជាក់ស្តែង។ គណបក្សប្រជាជនកម្ពុជា មិនមានគោលការណ៍បែកចែកថវិកាឱ្យឃុំ សង្កាត់ទេ ។
ប្រគល់ភារកិច្ចទទួលខុសត្រូវឱ្យក្រុមការងាររបស់គណបក្សតាមឃុំ សង្កាត់ រ៉ាប់រងម្ចាស់ការរៀងខ្លួន ។ ក្នុងករណីឃុំ សង្កាត់ណាមានបញ្ហាខ្វះខាត អាចស្នើអន្តរាគមន៍ពីថ្នាក់កណ្តាលបានតាមការជាក់ស្តែង ។
ចំពោះការបោះឆ្នោតជ្រើសរើសក្រុមប្រឹក្សាឃុំ សង្កាត់ ដែលនឹងមកដល់នៅរយៈពេលជាងមួយខែខាងមុខនេះ ប្រធានគណបក្សសង្គ្រោះជាតិ លោក កឹម សុខា បានបង្ហាញពីភាពវិជ្ជមានផងដែរ។
លោក កឹម សុខា ថា ចំណុចវិជ្ជមាននៃការបោះឆ្នោតលើកនេះគឺ ៖
ទី១-គ.ជ.ប ប្រសើរជាងមុនដោយមានសមាសភាពចម្រុះ
ទី២-យើងមានបញ្ជីចុះឈ្មោះបោះឆ្នោតប្រជាពលរដ្ឋថ្មី ធ្វើតាមបច្ចេកទេសល្អជាងមុន
ទី៣-ប្រជាពលរដ្ឋខ្មែរភាគច្រើនលើសលប់បានសម្រេចចិត្តរួចហើយលើការបោះឆ្នោតនេះ
ទី៤-សហគមន៍អន្ដរជាតិមានការចាប់អារម្មណ៍យ៉ាងខ្លាំងមកលើការបោះឆ្នោតនាពេលខាងមុខនេះ
ទី៥-គណបក្សសង្គ្រោះជាតិមានបញ្ជីបេក្ខជន១០០%ទូទាំងប្រទេស
ទី៦-គណបក្សសង្គ្រោះជាតិមានគោលនយោបាយច្បាស់លាស់ ដែលជាដំណោះស្រាយបញ្ហាចាំបាច់របស់ប្រជាពលរដ្ឋ និង
ទី៧-គណបក្សសង្គ្រោះជាតិ មានភ្នាក់ងារសង្កេតការណ៍បោះឆ្នោតគ្រប់ការិយាល័យទូទាំងប្រទេស ដើម្បីការពារសន្លឹកឆ្នោតប្រជាពលរដ្ឋរួចហើយ ។
សូមជម្រាបថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ត្រូវបានរាជរដ្ឋាភិបាលកំណត់យកថ្ងៃទី៤ ខែមិថុនា ឆ្នាំ២០១៧ ខាងមុខនេះ ដោយមានគណបក្សនយោបាយចំនួន១២ បានដាក់បេក្ខភាពប្រកួតប្រជែង ៕
ចែករំលែកព័តមាននេះ