ប្រទេសកូរ៉េខាងជើងកាលពីថ្ងៃទី២៣ មេសា បានគំរាមបា.ញ់ពន្លិចនាវាផ្ទុកយន្តហោះនុយក្លេអ៊ែរអាមេរិក USS CARL VINSON ខណៈនាវាប្រឆាំងគ្រាប់បែកបុកជប៉ុន២គ្រឿង ចាប់ផ្តើមធ្វើសមយុទ្ធយោធារួមជាមួយ
ប្រទេសកូរ៉េខាងជើងកាលពីថ្ងៃទី២៣ មេសា បានគំរាមបាញ់ពន្លិចនាវាផ្ទុកយន្តហោះនុយក្លេអ៊ែរអាមេរិក USS CARL VINSON ខណៈនាវាប្រឆាំងគ្រាប់បែកបុកជប៉ុន២គ្រឿង ចាប់ផ្តើមធ្វើសមយុទ្ធយោធារួមជាមួយកងនាវានាំមុខដោយនាវាផ្ទុកយន្តហោះនេះនៅភាគខាងលិចនៃមហាសមុទ្រប៉ាស៊ីហ្វិក ។
ក្នុងស្ថានភាពតានតឹងយ៉ាងខ្លាំងដែលញ៉ាំងឱ្យពួកមហាអំណាចក្នុងតំបន់មានការព្រួយបារម្ភដែលប្រធានាធិបតីអាមេរិក លោកដូណាល់ ត្រាំ ត្រូវជួបពិភាក្សាតាមទូរស័ព្ទនាយប់ថ្ងៃនោះជាមួយសមភាគីចិន លោកស៊ី ជីនពីង និងនាយករដ្ឋមន្ត្រីជប៉ុន លោកស៊ីនហ្សូអាបេ ។ នេះជាសេចក្តីរាយការណ៍របស់អ្នកទទួលខុសត្រូវជាន់ខ្ពស់ម្នាក់នៃរដ្ឋការអាមេរិក ។
ស្តីពីបញ្ហាកូរ៉េខាងជើង បណ្តាព្រឹទ្ធសមាជិកអាមេរិកស្នើដល់សេតវិមានឱ្យមានកិច្ចប្រជុំកម្រិតខ្ពស់មួយស្តីពីវិបត្តិនេះ ។ រដ្ឋមន្ត្រីការបរទេសអាមេរិក លោក REX TILLERSON និងរដ្ឋមន្ត្រីការពារប្រទេស លោក JIM MATTIS ក៏នឹងចូលរួមក្នុងកិច្ចប្រជុំនេះដែរ ក៏ដូចជានាយកស៊ើបការណ៍ជាតិ លោក DAN COATS និងនាយសេនាធិការកងទ័ព ឧត្តមសេនីយ៍ JOSEPH DUNFORD ។
ពេលធ្វើដំណើរទៅកាន់ប្រទេសក្រិក រដ្ឋមន្ត្រីការបរទេសចិន លោកវ៉ាង យី វាយតម្លៃថា ពេលនេះក្នុងតំបន់មានការបង្ហាញកម្លាំងដាក់គ្នាយ៉ាងច្បាស់រួចហើយ ។ យើងត្រូវស្វែងរកច្រកចេញដោយសន្តិវិធី និងសមហេតុផលមួយ ។
កាលពី២សប្តាហ៍មុន លោកប្រធានាធិបតីត្រាំ បានចេញបញ្ជាឱ្យនាវា CARL VINSON បើកឆ្ពោះទៅកាន់ឧបទ្វីបកូរ៉េ ពេលកំពុងមានភាពតានតឹងខ្លាំងជាមួយក្រុងព្យុងយ៉ាង ។ ការមកដល់ដែនទឹកឧបទ្វីបកូរ៉េរបស់នាវា CARL VINSON អាចជួនពេលគ្នាជាមួយខួបលើកទី៨៥ នៃថ្ងៃបង្កើតកងទ័ពប្រជាជនកូរ៉េ ហើយនាថ្ងៃទី២៥ មេសា នោះជាឱកាសនៃការបង្ហាញកម្លាំងថ្មីពីសំណាក់កងទ័ពរបស់ក្រុងព្យុងយ៉ាង ហើយអាចមានការសាកល្បងនុយក្លេអ៊ែរលើកទី៦ផង ។
កាសែតបក្សពលករកូរ៉េ RODONG SINMUN អះអាងនាថ្ងៃទី២៣ មេសា ថា កងកម្លាំងបដិវត្តន៍របស់យើងស្ថិតក្នុងបទបញ្ជាប្រយុទ្ធដើម្បីបាញ់ពន្លិចនាវាផ្ទុកយន្តហោះនុយក្លេអ៊ែរអាេមរិកតាមរយៈការវាយប្រហារតែមួយគត់ ។ ដោយប្រៀបធៀបនាវាផ្ទុកយន្តហោះនេះទៅនឹង «សត្វធំ» មួយ កាសែតនេះបន្តថា ការកម្ទេចនាវានោះនឹងជាគំរូមួយសម្រាប់បង្ហាញពីកម្លាំងយោធារបស់យើង។ ការគំរាមកំហែងនេះចុះនៅទំព័រទី៣ ហើយទំព័រទី១ និងទី២ សរសេរពីទស្សនកិច្ចរបស់លោកគីម ជុងអ៊ុន នៅកសិដ្ឋានចិញ្ចឹមជ្រូកមួយ ។
បន្ថែមលើភាពតានតឹងដែលមានស្រាប់ កូរ៉េខាងជើងបានចាប់ខ្លួនបុរសម្នាក់មានសញ្ជាតិអាមេរិក និងកូរ៉េ ។ លោកតូនីគីម ស្ថិតនៅកូរ៉េខាងជើងចាប់តាំងពី១ខែមកហើយ ដើម្បីបង្រៀនផ្នែកគណនេយ្យនៅសាកលវិទ្យាល័យ វិទ្យាសាស្ត្រ និងបច្ចេកវិទ្យាក្រុងព្យុងយ៉ាង ។ លោកត្រូវចាប់ខ្លួនកាលពីព្រឹកថ្ងៃទី២២ មេសា នៅព្រលានយន្តហោះអន្តរជាតិក្រុងព្យុងយ៉ាង ខណៈលោកប៉ុនប៉ងចាកចេញទៅប្រទេសលោកវិញ ។
នៅក្រុងវ៉ាស៊ីនតោន ក្រសួងការបរទេសអាមេរិកនិយាយថា បានទទួលព័ត៌មានពីការចាប់ខ្លួនជនជាតិអាមេរិកនេះនៅកូរ៉េខាងជើង តែបដិសេធមិនធ្វើអត្ថាធិប្បាយឡើយ ។
យោងតាមកងម៉ារីនអាមេរិកថា នាវាផ្ទុកយន្តហោះ CARL VINSON និងបណ្តានាវាអមចាប់ផ្តើមនាថ្ងៃទី២៣ មេសា នូវសមយុទ្ធរួមជាមួយកងម៉ារីនជប៉ុន ។ សមយុទ្ធនេះប្រព្រឹត្តទៅនៅដែនសមុទ្រហ្វ៊ីលីពីន ។ នាវានេះ ព្រមទាំងនាវាពិឃាតបាញ់មីស៊ីល២គ្រឿង និងនាវាបាញ់មីស៊ីលមួយគ្រឿងទៀត បន្តដំណើរឆ្ពោះមកទិសខាងជើងក្នុងតំបន់មហាសមុទ្រប៉ាស៊ីហ្វិកខាងលិច ។
រយៈពេលចុងក្រោយនេះ មានភាពមិនច្បាស់លាស់នៃទីតាំងពិតប្រាកដរបស់កងនាវានាំមុខដោយនាវា CARL VINSON ។ ប្រធានាធិបតីអាមេរិក លោកត្រាំ បញ្ជាឱ្យនាវានេះបើកឆ្ពោះមកកាន់ឧបទ្វីបកូរ៉េ តែតាមពិតបែរជាទៅកាន់អូស្ត្រាលី ។ រួចកាលពីថ្ងៃទី២២ មេសា អនុប្រធានាធិបតីអាមេរិក លោក MIKE PENCE ថ្លែងនៅទីក្រុងស៊ីដនីថា ក្រុមនាវានេះនឹងទៅដល់សមុទ្រជប៉ុននាប៉ុន្មានថ្ងៃខាងមុខនេះទៀត ៕
ចែករំលែកព័តមាននេះ