ខេត្តបាត់ដំបង ៖ ក្រុមអ្នកប្រព្រឹត្តល្បែងស៊ីសងតាម«អនឡាញ»ចំនួន១២នាក់ ក្នុងនោះ មានស្ត្រីចំនួនពីរនាក់ផង ត្រូវបានកម្លាំងសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តហើយ នៅព្រឹកថ្ងៃទី០៥ វិច្ឆិកា នេះ ក្រោយពីបញ្ចប់ការសាកសួរ នៅការិយល័យនគរបាលព្រហ្មទណ្ឌកំរិតស្រាលនៃស្នងការខេត្ត។
របាយការណ៍ការិយាល័យព្រហ្មទណ្ឌកំរិតស្រាលបានឲ្យដឹងថា ក្រុមអ្នកលេងល្បែងតាម«អនឡាញ»ទាំង១២នាក់នោះ ១-ឈ្មោះ ស័ក្ត សុធី ភេទប្រុស អាយុ២៧ឆ្នាំ ២-ឈ្មោះ ហៀង ឧត្តម ភេទប្រុស អាយុ២៧ឆ្នាំ ៣-ឈ្មោះ សុខ សាយ័ន្ត ហៅ កូនមាន់ ភេទស្រី អាយុ២២ឆ្នាំ ៤-ឈ្មោះ ទឹម ស៊ីបូរ៉ា ហៅ រ័ត្ន ភេទប្រុស អាយុ៣២ឆ្នាំ ៥-ឈ្មោះប៉ែន ផានិត ហៅឌួង ភេទប្រុស អាយុ២៩ឆ្នាំ ៦-កែវ ប្រណីត ភេទប្រុស អាយុ៣៥ឆ្នាំ ៧-ឈ្មោះអ៊ឹម សម្បត្តិ ហៅ ម៉ាប់ ភេទប្រុស អាយុ២២ឆ្នាំ ៨-ឈ្មោះ ហេង សុវឌ្ឍនា ហៅចិន ភេទប្រុស អាយុ២៧ឆ្នាំ ៩-ឈ្មោះតាំង សុភាព ភេទប្រុស អាយុ៣៣ឆ្នាំ ១០-ឈ្មោះផល ផាន់ណា ភេទប្រុស អាយុ២២ឆ្នាំ ១១-ឈ្មោះ
ម៉ាន់ សុម៉ាលី ភេទស្រី អាយុ៤៣ឆ្នាំ និង១២-ឈ្មោះថង ឆៃយ៉ា ភេទប្រុស អាយុ២៣ឆ្នាំ ។
បើតាមរបាយការណ៍ដដែល ក្នុងចំណោមអ្នកប្រព្រឹត្តល្បែងខុសច្បាប់ទាំង១២នាក់នេះ មានបីនាក់ជាអ្នកគ្រប់គ្រងទីតាំងល្បែង ហើយក៏មានចំនួន១១នាក់ នៅក្នុងចំណោមនេះ ត្រូវបានមន្ត្រីជំនាញធ្វើតេស្ដរកឃើញថា «មានសារធាតុញៀន»។ បានន័យថា ក្រុមនេះ មិនត្រឹមតែញៀននឹងល្បែងស៊ីសងល្មើសច្បាប់ប៉ុណ្ណោះទេ ពួកគេថែមទាំងប្រព្រឹត្តបទល្មើសគ្រឿងញៀននៅក្នុងទីតាំងល្បែងទៀតផង ។
ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង ដែលដឹកនាំកិច្ចប្រតិបត្តិការនេះ ក្រោមការបញ្ជាផ្ទាល់ពីលោកស្នងការ និងតំណាងអយ្យការអមសាលាដំបូងខេត្តបានឲ្យដឹងថា កិច្ចប្រតិបត្តិការបង្ក្រាបល្បែង «អនឡាញ»នេះ ធ្វើឡើងទៅលើទីតាំងចំនួនបីផ្សេងៗគ្នា ក្នុងពេលតែមួយ ។ លោកថា ទីតាំងទី១ នៅចំណុចផ្ទះជួល ជ្រកក្រោមស្លាកប្ដូរប្រាក់ និងផ្ទេរប្រាក់ យីហោ «ខេ អេហ្វ ប៊ី» ស្ថិតក្នុងភូមិព្រែកមហាទេព សង្កាត់ស្វាយប៉ោ ទីតាំងទី២-នៅភូមិកាប់គោថ្មី សង្កាត់អូរចា និងទីតាំងទី៣-ភូមិវត្តលៀប សង្កាត់ចំការសំរោង។
សូមជម្រាបថា ល្បែងស៊ីសងគ្រប់ប្រភេទ ដែលរីកស្គុះស្គាយពាសពេញក្រុងបាត់ដំបង ច្រើនឆ្នាំកន្លងមកនេះ ត្រូវបានអាជ្ញាធរខេត្ត ទទូលបទបញ្ជាពីរាជរដ្ឋាភិបាលឲ្យបិទទាំងស្រុង កាលពីជាងពីរខែកន្លងទៅនេះ។ ប៉ុន្តែការប្រមូលម្ដុំប្រព្រឹត្តលួចលាក់របស់ក្រុមអ្នកញៀនល្បែងស៊ីសង នៅតែបន្តកើតមានមិនឈប់រហូតមកដល់ពេលនេះ ។ ជាពិសេស ល្បែង«ឆ្នោតនិងល្បែងអ៊ីនធើរណេត» នេះតែម្ដង ។ ពួកគេបានព្យាយាមចល័តទីតាំងបំភាន់ឌភ្នែកសមត្ថកិច្ច ដែលធ្វើឲ្យកម្លាំងសមត្ថកិច្ចជួបការលំបាកក្នុងការតាមប្រមាញ់ ។
លោក ឈឿង គឺមសុង បានប្រាប់ថា អ្នកលេងល្បែងស៊ីសងខុសច្បាប់មិនច្រើនទេ ។ ប៉ុន្តែពួកគេនៅតែបន្តបង្កើតទីតាំងលេងលួចលាក់ ក្នុងរូបភាពចល័តគ្រប់ទីកន្លែង បើទោះជាច្បាប់បានរឹតបន្ដឹងយ៉ាងណាក្ដី ដូចជាទីតាំងល្បែងអនឡាញទាំងបីកន្លែងខាងលើនេះជាដើម ។ លោកបានបញ្ជាក់ថា កម្លាំងជំនាញរបស់លោក បានធ្វើការស៊ើបអង្កេតយ៉ាងលំបាកបំផុត ក្រោមការបញ្ជាផ្ទាល់ពីលោកស្នងការខេត្ត និង លោកព្រះរាជអាជ្ញាអមសាលាដំបូងខេត្ត ក្នុងការតាមបង្ក្រាបទីតាំងល្បែង«អនឡាញ»ទាំងបីកន្លែងនេះ ។
ពួកអ្នកលេងល្បែងនេះ បានប្រើប្រាសគ្រប់រូបភាព តែដោយសារកម្លាំងជំនាញតាមដានយ៉ាងស្អិតរមួត ទើបឈាន់ដល់ការបង្ក្រាបព្រមៗគ្នាក្នុងពេលតែមួយ។ លោក ឈឿង គឹមសុង បានបញ្ជាក់ដែរថា បើតាមការពិនិត្យលើទីតាំង និង ការសួរនាំជនដែលពាក់ព័ន្ធ ទីតាំងល្បែង«អនឡាញ»ទាំងនេះ មិនត្រិមតែជាកន្លែងប្រព្រឹត្តល្បែងស៊ីសងបំពានច្បាប់ប៉ុណ្ណោះទេ អាចជាទីតាំងសម្រាប់ប្រព្រឹត្តបទល្មើសគ្រឿងញៀនទៀតផង។
លោកបានបញ្ជាក់បន្ថែមថា ក្នុងចំណោមជនសង្ស័យទាំង១២នាក់ ដែលត្រូវឃាត់ខ្លូនបញ្ជូនទៅតុលាការ គឺមានមនុស្សចំនួន១១នាក់ ត្រូវមន្ត្រីជំនាញធ្វើតេស្ដទឹកនោមរកឃើញថា មានសារធាតុញៀនក្នុងឈាម។ យ៉ាងណាក្ដី នៅព្រឹកថ្ងៃទី ០៥ វិច្ឆិកា នេះ លោកស្នងការបានបញ្ជាឲ្យកម្លាំងជំនាញ បញ្ជូនពួកគេ និងវត្ថុតាងនានា ទៅកាន់សាលាដំបូងខេត្ត ដើម្បីចាត់ការតាមផ្លូវច្បាប់ហើយ៕
ចែករំលែកព័តមាននេះ