រាជធានីភ្នំពេញ ៖ សម្រាប់ត្រីមាសទី១ដើមឆ្នាំ២០១៧នេះ អាជ្ញាធររជធានីភ្នំពេញ បានបង្ក្រាបករណីបទល្មើសគ្រឿងញៀនបានជាង៧០០ករណី និងឃាត់ខ្លួនជនសង្ស័យបានជិត២ពាន់នាក់។ នេះបើតាមការលើកឡើងរបស់លោក ឃួង ស្រេង អភិបាលរងរាជធានីភ្នំពេញ ក្នុងកិច្ចប្រជុំរបស់គណៈបញ្ជាការឯកភាពរាជធានីភ្នំពេញ កាលពីចុងសប្តាហ៍កន្លងមកនេះ។ លោក ឃួង ស្រេង បានលើកឡើងថា សម្រាប់ត្រីមាសទី១ ឆ្នាំ២០១៧នេះ អាជ្ញាធររាជធានីភ្នំពេញបង្ក្រាបបានករណីគ្រឿងញៀនបានចំនួន៧៥៦ករណី និងបានឃាត់ខ្លួនជនសង្ស័យបាន១៨៥៤នាក់ ស្រី២៤៤នាក់ ក្នុងនោះខ្មែរចំនួន១៧៩៩នាក់ ស្រី២២២នាក់ ជនជាតិវៀតណាម៤៩នាក់ ជនជាតិនីសេរីយ៉ា៣នាក់ និងជនជាតិម៉ាឡេស៊ី១នាក់។
លោកបន្តថា ក្នុងចំណោមនោះបានបញ្ជូនទៅមជ្ឈមណ្ឌលឱកាសខ្ញុំចំនួន១៣៤៥នាក់ ស្រី១១០នាក់ បញ្ជូនទៅតុលាការចំនួន៩៣២នាក់ មន្ទីរសង្គមកិច្ចអតីតយុវជន និងយុវនីតិសម្បទារាជធានីភ្នំពេញចំនួន១០៧នាក់ ស្រី២នាក់ និងបញ្ជូនឲ្យទៅក្រុមគ្រួសារវិញចំនួន២៣៩នាក់ ស្រី១៥នាក់ផងដែរ។ ចំពោះល្បែងស៊ីសងវិញ បង្ក្រាបបានចំនួន៥៤ករណី ឃាត់ខ្លួនមនុស្សចំនួន១៥៧នាក់ ស្រី៤១នាក់ និងដកហូតបានសម្ភារមួយចំនួន បង្ក្រាបការជួញដូរមនុស្សបានចំនួន១២ករណី ឃាត់ខ្លួនបាន១៤នាក់ ស្រី០៦នាក់ និងបានបញ្ជូនជនរងគ្រោះដោយការជួញដូរមនុស្សទៅមន្ទីរសង្គមកិច្ចអតីតយុវជននិងយុវនីតិសម្បទារាជធានីភ្នំពេញចំនួន១៩នាក់ ស្រី១៤នាក់។
លោកបន្តទៀតថា សម្រាប់ត្រីមាសទី១នេះដែរអាជ្ញាធររាជធានីភ្នំពេញបានទទួលជនអនាថាមិនស្ម័គ្រចិត្តសរុប៤៤៧នាក់ ស្រី៩៨នាក់ កុមារ៣៧នាក់ កុមារី០៩នាក់ បានធ្វើការពិគ្រោះយោបល់ និងបញ្ជូនជនរងគ្រោះទៅមណ្ឌលសំចតសង្គមកិច្ចរាជធានីភ្នំពេញចំនួន៤៤៦នាក់ ស្រី៩៨នាក់ បញ្ជូនទៅស្នងការនរគបាលរាជធានីភ្នំពេញ ជនជាតិបរទេសម្នាក់ និងបានពន្លត់អគ្គីភ័យចំនួន២៦លើក របួស០២នាក់ ឆេះសិប្បកម្ម០៥ខ្នង ៤៦បន្ទប់ រថយន្ត០៤គ្រឿង ម៉ូតូ០៤គ្រឿង។
ចំណែកគ្រោះថ្នាក់ចរាចរណ៍នៅរាជធានីភ្នំពេញបានកើតឡើង ចំនួន៣២២លើក ស្លាប់មនុស្ស៧៥នាក់ របួស៣០៧នាក់ ខូចរថយន្ត១៧៩គ្រឿង ម៉ូតូ៣២៣គ្រឿង រ៉ឺម៉កម៉ូតូ០៦គ្រឿង និងកង់ចំនួន០១គ្រឿង គ្រោះថ្នាក់នេះផ្តើមដោយការបើកបរល្មើសល្បឿនកំណត់៥៣,១១% មិនគោរពសិទ្ធិអាទិភាព ១៦;៧៤% បើកប្រជែងគ្នា១៦,២៨% បើកបរក្នុងជាតិស្រវឹង១៣,៨៧%។ ចំណែករយៈពេល៣សប្តាហ៍ក្នុងខែមេសារនេះ បង្ក្រាបបានករណីជួញដូរគ្រឿងញៀនបាន៧៤ករណី ឃាត់ខ្លួនជនសង្ស័យបានចំនួន១៧២នាក់ ស្រី២៥នាក់ បានបញ្ជូនទៅមជ្ឈមណ្ឌលឱកាសខ្ញុំ៨៣នាក់ ស្រី០៨នាក់ ស្របពេលដែលមជ្ឈមណ្ឌលឱកាសខ្ញុំមានអ្នកញៀនថ្នាំកំពុងស្នាក់នៅជាក់ស្តែងចំនួន១៦៧៥នាក់ ស្រី១២២នាក់ផងដែរ៕
ចែករំលែកព័តមាននេះ