ខេត្តរតនគិរី ៖ កម្លាំងនគរបាលព្រហ្មទណ្ឌកំរិតធ្ងន់នៃស្នងការនគរបាលខេត្តនៅវេលាម៉ោង៩និង៣០នាទី ថ្ងៃទី២១ ខែមេសា ឆ្នាំ២០១៧ បានឃាត់ខ្លួនជនសង្ស័យម្នាក់នៅចំណុចភូមិកាទៀង ឃុំល្បាំង១ ស្រុកលំផាត់ ខេត្តរតនគិរី ។
បើតាមប្រភពពីលោកឧត្តមសេនីយ៍ត្រី ផែន ឌីណា ស្នងការរងទទួលបន្ទុកព្រហ្មទណ្ឌប្រាប់ឲ្យដឹងថា កម្លាំងក្រោមឱវាទលោកស្រាវជ្រាវឃាត់ខ្លួនជនសង្ស័យគឺចុះអនុវត្តតាមដីកាបង្គាប់ឲ្យចាប់ខ្លួនលេខ៣៣ ចុះថ្ងៃទី២៥ ខែមីនា ឆ្នាំ២០០៩ ដោយចៅក្រមស៊ើបសួរ គឹម អេង នៃសាលាដំបូងខេត្តព្រះសីហនុពីបទ មនុស្សឃាតដោយចេតនា ។ លោកបានបន្តថា ជនសង្ស័យមានឈ្មោះ ថាច់ យ៉ាង ភេទប្រុស អាយុ៣២ឆ្នាំ ជនជាតិខ្មែរ មុខរបរធ្វើចំការ មានទីលំនៅកន្លែងឃាត់ខ្លួនខាងលើ ។
លោកបានបន្ថែមឲ្យដឹងទៀតថា ជនសង្ស័យធ្វើសកម្មភាពពាក់ព័ន្ធមនុស្សឃាតប្រព្រឹត្តទៅកាលពីថ្ងៃទី៨ ខែមីនា ឆ្នាំ២០០៩ នៅចំណុចភូមិអូរតាប៉ាង ឃុំឧកញ៉ាហេង ស្រុកព្រៃនប់ ខេត្តព្រះសីហនុ រួចរត់មកសម្ងំលាក់ខ្លួននៅស្រុកកំណើត ។
នៅរសៀលថ្ងៃទី២២ ខែមេសា ឆ្នាំ២០១៧ សមត្ថកិច្ចខេត្តរតនគិរីបានប្រគល់ជនសង្ស័យទៅឱ្យសមត្ថកិច្ចខេត្តព្រះសីហនុរួចរាល់ផងដែរនៅក្នុងករណីចាប់ជនសង្ស័យសមត្ថកិច្ចទាំង២ខេត្តខាងលើមិនបានបញ្ជាក់ប្រាប់សារព័ត៌មានឱ្យដឹងពីរឿងឃាតកម្មនោះទេថា ការសម្លាប់នោះស្រីឬប្រុស ជារឿងគំនុំឬជារឿងប្លន់នោះឡើយ ៕
ចែករំលែកព័តមាននេះ