ខេត្តបាត់ដំបង៖ អគ្គិភ័យ ដែលគេមិនទាន់ដឹងពីមូលហេតុ បានឆាបឆេះអស់គ្មានសល់នូវក្លឹបរាត្រី ដែលទើបបើកស្វាគមន៍ភ្ញៀវមួយកន្លែង យីហោ «LOL» ស្ថិតនៅភូមិ២០ឧសភា សង្កាត់ស្វាយប៉ោ ក្រុងបាត់ដំបង នៅវេលាម៉ោង ៥ល្ងាចថ្ងៃទី០៤ វិច្ឆិកានេះ។ តែគេមិនទាន់ដឹងថា តើមានគ្រោះថ្នាក់ដល់មនុស្ស ឬយ៉ាងណានោះទេ។
នៅក្នុងហេតុការណ៍ដ៏រន្ធត់នេះ គេឃើញរថយន្តពន្លត់អគ្គិភ័យរបស់ស្នងការខេត្តជាច្រើនគ្រឿង បានជួយអន្តរាគមន៍។ ជាមួយគ្នានោះ គេក៏ឃើញវត្តមានលោកអភិបាលខេត្ត លោកស្នងការ និងថ្នាក់ដឹកនាំមួយចំនួនទៀត ក៏បានចុះទៅកាន់កន្លែងកើតហេតុ ដើម្បីពិនិត្យ និងដឹកនាំបញ្ជាស្ថានភាពផ្ទាល់ ខណៈកម្លាំងសមត្ថកិច្ច និងប្រជាពលរដ្ឋរាប់រយនាក់ បាននាំគ្នាប្រើប្រាស់គ្រប់មធ្យោបាយ ដើម្បីជួយសង្រ្គោះ និងពន្លត់អគ្គិភ័យ។
ប្រភពព័ត៌មាន បង្ហាញថា ក្លឹបរាត្រី «LOL» នេះ ទើបបើកដំណើរការស្វាគមន៍ភ្ញៀវ បានរយៈពេលប្រហែលមួយខែប៉ុណ្ណោះ។ ពេលនេះ ស្រាប់តែត្រូវអគ្គិភ័យឆាបឆេះយ៉ាងសន្ធោសន្ធៅ និងផ្សែងឃ្មួលខ្មាញ់ ចេញតាមទ្វារបង្អួចមើលទៅគួរឲ្យរន្ធត់។ ប៉ុន្តែមិទាន់មានសេចក្ដីរាយការណ៍អំពីការខូចខាត ឬគ្រោះថ្នាក់មនុស្សនៅឡើយទេ ហើយក៏ពុំទាន់ដឹងពីមូលហេតុ ដែលនាំឲ្យមានអគ្គិភ័យនេះដែរ។
ប៉ុន្តែយ៉ាងណាក៏ដោយ បើតាមព័ត៌មានបឋម អគ្គិភ័យនេះ ទំនងបានលេបត្របាក់គ្រឿងក្នុង នៅក្នុងក្លឹបនេះ អស់គ្មានសល់ទេ ព្រោះអណ្ដាតភ្លើងសម្បើមណាស់ បានឆាបឆេះ ចេញពីខាងក្នុងក្លឹប ដែលជាផ្ទះល្វែង ៤ល្វែងជាប់គ្នានេះ៕
ចែករំលែកព័តមាននេះ