ការលំបាករបស់តារាថ្មីដែលខំប្រឹងដើម្បីកេរ្តិ៍ឈ្មោះ
រាជធានីភ្នំពេញ ៖ មិនមែនជារឿងងាយស្រួលប៉ុន្មានទេ ដែលតារាថ្មីប្រឹងប្រែងរកភាពល្បីឈ្មោះក្នុងពិភពសិល្បៈ ។ តារាខ្លះត្រូវលះបង់ច្រើនទាំងពេលវេលា និងប្រាក់ផ្ទាល់ខ្លួនទិញ
រាជធានីភ្នំពេញ ៖ មិនមែនជារឿងងាយស្រួលប៉ុន្មានទេ ដែលតារាថ្មីប្រឹងប្រែងរកភាពល្បីឈ្មោះក្នុងពិភពសិល្បៈ ។ តារាខ្លះត្រូវលះបង់ច្រើនទាំងពេលវេលា និងប្រាក់ផ្ទាល់ខ្លួនទិញ
រាជធានីភ្នំពេញ ៖ មិនមែនជារឿងងាយស្រួលប៉ុន្មានទេ ដែលតារាថ្មីប្រឹងប្រែងរកភាពល្បីឈ្មោះក្នុងពិភពសិល្បៈ ។ តារាខ្លះត្រូវលះបង់ច្រើនទាំងពេលវេលា និងប្រាក់ផ្ទាល់ខ្លួនទិញរបស់ប្រើប្រាស់ទាក់ទាញគេឯង ខណៈកម្រៃពីអាជីពតិចតួច ។
សម្រាប់តារាល្បីឈ្មោះជាច្រើនវិញក៏តស៊ូជាមួយអាជីពសិល្បៈខ្លាំងដែរទម្រាំតែមានការទទួលស្គាល់ពីមហាជន ទាំងការលះបង់កម្លាំងកាយ កម្លាំងចិត្តនិងពេលវេលា ។ តារាជំនាន់មុនខ្លះបើសិនទៅច្រៀងវិញ គឺទទួលបានប្រាក់កម្រៃតិចតួចហើយត្រូវចេញទៅតំបន់ ឆ្ងាយៗត្រឡប់មកផ្ទះវិញយប់ព្រលប់ ។ ចំពោះតារាចម្រៀងស្រីពេលច្រៀងនៅតាមរង្គសាល ម្តងៗចំណាយមាត់គេ គឺរងការរិះគន់ពីអ្នក និងខ្លះទៀតត្រូវបង្ខំចិត្តលើកកែវផឹកស្រាទាំងខ្លួនមិនចេះផង ។ ពេលខ្លះវិលទៅផ្ទះវិញ ត្រូវរំខានដោយក្រុមជនល្មើសដូចជាជនគម្រាមទារប្រាក់ ឬចោរប្លន់ជាដើម ។
កញ្ញាហ៊ុន ម៉ាលីស បេក្ខនារីធ្លាប់ចូលរួមប្រឡងកម្មវិធីខេមបូឌាន អាយដលរដូវកាលទី២ រៀបរាប់កាលពីពេល ថ្មីៗកន្លងមកថា«ការព្យាយាមដើម្បីក្លាយជាតារាថ្មី គឺមិនមែនជាការងាយស្រួលដូចការគិតរបស់បងប្អូនមួយចំនួនបានដឹងឮគ្រប់គ្នាថា តារាសិល្បៈសុទ្ឋតែជាអ្នកសប្បាយគ្មានកើតទុក្ខនោះទេ តែផ្ទុយទៅវិញខុសស្រឡះតែម្តង ។
ចំពោះផលលំបាករបស់នាងខ្ញុំវិញ ជម្នះច្រើនយ៉ាងតែម្តង ទី១មានសំឡេងអាចច្រៀងបាន ត្រូវដើរសុំគេបានតែហាង តូចៗ យូរទៅគេបិទបន្តពីមួយទៅមួយបង្កឱ្យជីវភាពលំបាក ។ ម្តាយបងប្អូននៅតែផ្ទះជួល ទម្រាំអាចរកកន្លែងច្រៀងបាន ម្តងៗចង់ដាច់បាយ ។ យ៉ាងណានាងខ្ញុំ មានសំណាងបន្តិចបានអ្នកនាងខាត់ សុឃីម ឃើញស្គាល់ មាននិស្ស័យយកមកច្រៀងជាមួយក្រុមភ្លេងការគាត់ជាប្រចាំបានប្រាក់កម្រៃខ្លះ កុំអីមិនដឹងពឹងលើអ្វីនោះទេ ។ យ៉ាងណា នេះជាការសម្រាលខ្លះប៉ុណ្ណោះ នៅប្រឹងខ្លួនឯងតស៊ូ ហើយរកទីផ្សារពង្រឹងទេពកោសល្យឱ្យល្អយូរទៀត ទើបរកឱកាសល្បីបាន» ។
លោកម៉ែន អម្រុងរត្ន័ ដែលទើបមានមុខបន្តិចក្នុងពិភពសិល្បៈបានត្អូញត្អែរថា«តួថ្មីត្រូវគេមើលរំលងណាស់ បើទៅថតខារ៉ាអូខេ ម្តងៗតាំងពីម៉ោង៩ព្រឹក ដល់ម៉ោង៥ល្ងាច ពេលខ្លះបាន១ប្លង់ ឬមិនទាំងបានថតនោះទេ ក្រៅស្បែករលាកឡើងជាំអស់ហើយ ។ បើតួល្បីវិញទាល់តែត្រជាក់សាច់បានគេចេញមក ។ យ៉ាងណាខ្ញុំយល់ នេះជារឿងធម្មតារបស់រៀមច្បងមុននិងក្រោយ ។
អ្វីដែលខ្ញុំចង់បញ្ជាក់ពេលខ្លះ ផលិតករមួយចំនួនបក្សពួកនិយមក៏មានដែរ បើតួថ្មីខ្លះឡូយឆាយ គឺឆាប់លើកបន្តុកណាស់ ។ មានតារាថ្មីខ្លះលក់ខ្ទេចលក់ខ្ទីហេតុតែស្រឡាញ់សុខចិត្តលក់របស់ដូរទៅទិញខោអាវ ស្អាតៗថ្លៃ ដើម្បីឱ្យគេមើលទៅពេញចិត្ត ឬខ្លះលក់អស់ហើយទិញឡានជិះឱ្យគេឃើញថាខ្លួនមាន» ។
បើតាមទស្សនៈរបស់លោកតាវិចទ័រ អ្នកដឹកនាំកម្មវិធីសិល្បៈប្រចាំនៅស្ថានីយទូរទស្សន៍ស៊ីធីអិន និងស៊ីអិនស៊ីថា សិល្បករមិនថាថ្មី ចាស់ទេត្រូវចាំបាច់មានគោលការណ៍ក្នុងខ្លួន ។ ពាក្យសិល្បៈគឺបង្កប់ន័យ មានទាំងវិន័យ សីលធម៌ ពាក្យពេចន៍និយាយស្តី និងការស្លៀកពាក់ ។ បើជាតួថ្មី គេមិនទាន់ស្គាល់ មានតែព្យាយាមឱ្យច្រើន ជារឿងធម្មតាខំឱ្យគេមើលឃើញសិន ដូចជាគោរពពេលវេលាសម្តែង គឺសំខាន់ណាស់ ពិសេសត្រូវយោគយល់រឿងម្ចាស់កម្មវិធីឱ្យកម្រៃការងារ ។ បើសិនជាអាច និយាយរឿងប្រាក់កម្រៃឱ្យហើយ មុនសម្តែងឱ្យគេ ។
ចំពោះតួថ្មី លោកតាវិចទ័រថា លោកតែងតែរំលេចក្នុងកម្មវិធីរបស់លោកឱ្យបានសាងស្នាដៃឱ្យទស្សនិកជនស្គាល់ ។ លោកបានជួយតារាថ្មីច្រើនព្រោះយល់ថា គេមានទឹកចិត្តស្រឡាញ់សិល្បៈ ។
ពិធីការិនីយុគ ចិន្តា ឱ្យដឹងថា នាងទើបបង្កើតកម្មវិធីមួយសម្រាប់បើកឱកាសដល់អ្នកស្រឡាញ់សិល្បៈ ។ បើចាប់អារម្មណ៍ត្រូវទៅហាត់រៀនជាមុនសិន ដើម្បីឱ្យមានក្បួនខ្នាតត្រឹមត្រូវ ព្រោះមានតារារៀមច្បងចាំចង្អុលបង្ហាញ ។ ជីវិតតារា ម្នាក់ៗត្រូវតែឆ្លងកាត់គ្រប់រូបភាព មិនថាមានរឿងអ្វីទេ ពិសេសមុនល្បីគឺត្រូវព្យាយាមណាស់ ។ ក្នុងសង្គមសិល្បៈតារាជាច្រើននាក់មកហើយ មានការតស៊ូគ្រប់បែបយ៉ាងធ្វើយ៉ាងណាឱ្យត្រដែត ដូចជាឆ្លងកាត់ការមាក់ងាយ ពាក្យចចាមអារ៉ាមមិនល្អជាដើម ។
«យ៉ាងណាក្តី ប្អូនៗជំនាន់ក្រោយគួរតែប្រឹងប្រែងឱ្យច្រើន ព្រោះថាសិល្បៈបច្ចុប្បន្នគឺទីផ្សារការងារល្អ ប្រាក់កម្រៃខ្ពស់ជាងមុន សំខាន់សមត្ថភាព បើមានយើងងាយស្រួលរកទីផ្សារ ។ គេនិយាយអ្វីពីយើងស្រេចតែគេ សំខាន់មានតែខ្លួនយើងទេដែលដឹង» ៕
ចែករំលែកព័តមាននេះ