AFP ផ្សាយថាកាលពីថ្ងៃ១៩ មេសា ២០១៧ រដ្ឋាភិបាលឥណ្ឌាចេញបញ្ជាហាមរដ្ឋមន្ត្រី ឬមន្ត្រីជាន់ខ្ពស់ប្រើភ្លើងនាំផ្លូវ ឬភ្លើងសុីរ៉ែន បំពាក់នៅលើដំបូលរថយន្ត ដើម្បីបើកជែងមហាជនក្នុងអំឡុងពេលមានការកកស្ទះចរាចរណ៍ ដែលរងការរិះគន់ពីពលរដ្ឋទូទៅថា ជាការប្រើសិទ្ធិហួសហេតុ ។
ចាប់ពីថ្ងៃទី១ ឧសភា តទៅអាជ្ញាធរឥណ្ឌា អនុញ្ញាតឱ្យប្រើបានតែចំពោះ «រថយន្តជួយសង្គ្រោះ» ប៉ុណ្ណោះ ទើបអាចបើកភ្លើងស៊ី
រ៉ែននៅលើដងផ្លូវបាន ។ លោកArun Jaitleyរដ្ឋមន្ត្រីហិរញ្ញវត្ថុឥណ្ឌា បញ្ជាក់ប្រាប់សារព័ត៌មាននៅក្រុងញូវដេលីថា«យើងសុំប្រកាសលុបចោលច្បាប់ដែលអនុញ្ញាតឱ្យរដ្ឋមន្ត្រី ឬមន្ត្រីជាន់ខ្ពស់ក្នុងរដ្ឋ នីមួយៗកុំប្រើភ្លើងនាំផ្លូវ ។ ចាប់ពីថ្ងៃទី១ ឧសភា តទៅយានយន្តផ្ទាល់ខ្លួននឹងគ្មានសិទ្ធិប្រើភ្លើងសុីរ៉ែន និងគ្មានការលើកលែងណាមួយឡើយ» ។
ពលរដ្ឋឥណ្ឌាភាគច្រើន យល់ថាការប្រើភ្លើងនាំផ្លូវ ឬសុីរ៉ែនជានិមិត្តសញ្ញានៃអភ័យឯកសិទ្ធិ និងមានចរិតលើកតម្កើងខ្លួនឯង ព្រោះបណ្តារដ្ឋមន្ត្រី និងមន្ត្រីជាន់ខ្ពស់រមែងបើកភ្លើងនាំផ្លូវដើម្បីប្រជែងរថយន្តផ្សេងទៀតក្នុងពេលធ្វើដំណើរទៅធ្វើការ ។ សូម្បីតែមន្ត្រីថ្នាក់កណ្តាលនានានៅទីជនបទរមែងរកទិញភ្លើងសុីរ៉ែនដាក់បំពាក់នៅលើរថយន្ត ដើម្បីបង្អួតពីបុណ្យសក្តិរបស់ខ្លួនដល់មហា ជន ។
លោកអារ៉ាវីន ខេចរីវ៉ាល់ ចៅហ្វាយក្រុងញូវដេលី បានប្រកាសកាលពីឆ្នាំ២០១៥ថា រថយន្តរបស់លោកគ្មានបំពាក់ភ្លើងស៊ីរ៉ែនទេដើម្បីធ្វើជាគំរូល្អដល់មន្ត្រីរបស់រដ្ឋ ។
ចែករំលែកព័តមាននេះ