សារ​ឆ្លើយ​តប CPP មិន​អាច​ចរចា​នយោបាយ​ជាមួយ CNRP រឿង​អ្នក​ជាប់​ពន្ធនាគារ​ទេ


រាជធានី​ភ្នំពេញ ៖ មន្ត្រីជាន់ខ្ពស់​គណបក្ស​ប្រជាជន​កម្ពុជា​បាន​អះអាង​ថា មិន​អាច​មានការ​ចរចា​ផ្នែក​នយោបាយ​រវាង​គណបក្សកាន់អំណាច និង​គណបក្សប្រឆាំង​នោះ​ទេ ជុំវិញ​សំណុំរឿង​អ្នក​ជាប់​ឃុំ​ក្នុង​ពន្ធនាគារ ។

ការ​លើក​ឡើងជា​ថ្មី​របស់​មន្ត្រី​គណបក្សកាន់អំណាច​នេះ ខណៈ​ពេល​មន្ត្រីជាន់ខ្ពស់​គណបក្សប្រឆាំង​បាន​អះអាង​ថា​នឹង​ចង់ឱ្យ​មាន​វប្បធម៌​សន្ទនា​រវាង​គណបក្ស​ដែល​មាន​អាសនៈ​ទាំង​ពីរ​ក្នុង​រដ្ឋសភា​នៅ​ថ្ងៃ​ណាមួយ​នោះ គឺ​លោក ស្រី មូរ សុខ​ហួរ អនុប្រធាន​គណបក្ស​សង្គ្រោះ​ជាតិ​បាន​សម្តែង​សុទិដ្ឋិនិយម​ថា គណបក្ស​របស់
លោកស្រី​នឹង​រក​ដំណោះស្រាយ​ជាមួយ​គណបក្សកាន់អំណាច​នៅ​ថ្ងៃ​ណាមួយ ដើម្បី​ឲ្យ​សកម្មជន​ដែល​ជាប់​ពន្ធនាគារ​មាន​សេរីភាព ។

ប្រាប់​អ្នក​សារព័ត៌មាន​កាលពី​ពេល​ថ្មី​ៗ​បន្ទាប់​ពី​ចូល​ជួប​សកម្មជន​នៅ​ពន្ធនាគារ លោកស្រី មូរ សុខ​ហួរ បាន​សម្តែង​សុទិដ្ឋិនិយម​ថា គណបក្ស​សង្គ្រោះ​ជាតិ​នៅ​តែ​មាន​ផ្លូវ​ចរចា​ជាមួយ​បក្ស​កាន់​អំណាច​ដើម្បី​រក​ផ្លូវ​ឲ្យ​ពួក​គាត់​ចេញពី​ពន្ធនាគារ ។

លោកស្រី​បញ្ជាក់​ថា​៖ «​យើង​នៅ​តែ​សង្ឃឹមថានឹង​មានការ​ចរចា​តាម​រយៈ​វប្បធម៌​សន្ទនា ដើម្បី​ដោះស្រាយ​រាល់​បញ្ហា​ផ្សេង​ៗ ។ ចរចា​នៅ​ពេល​មាន​បញ្ហា​យើង​មិន​អាច​មិន​យក​វប្បធម៌​សន្ទនា​ធ្វើ​ជា​ធ​ម្យោ​បាយ​ដើម្បី​ដោះស្រាយ​នោះ​ទេ​» ។ លោកស្រី​បន្ថែម​ថា សកម្មជន​ដែល​កំពុង​ជាប់​ពន្ធនាគារ​បាន​ស្នើ​ដល់​ថ្នាក់ដឹកនាំ​ថា​កុំ​យក​ពួក​គាត់​ធ្វើ​ជា​ការ​ដោះ​ដូរ​ជាមួយ​នយោបាយ តែ​ស្នើ​ឲ្យ​មានការ​ជជែក​គ្នា តាម​រយៈ​វប្បធម៌​សន្ទនា ។

លោកស្រី​គូសបញ្ជាក់​ថា​៖ «​យើង​ចៀស​មិន​ផុត​ពី​ការ​ជជែក​គ្នា​នោះ​ទេ ពេល​នេះ​គណបក្ស​បាន​ត្រៀមខ្លួន ទោះបី​មិន​ឆ្លើយ​មិន​ឆ្លង តែ​បាន​ត្រៀមខ្លួន​សម្រាប់​ការ​បោះ​ឆ្នោត ខាង​មុខ​នេះ​»​។

យ៉ាងណា​ក្តី​លោកស្រី​អនុប្រធាន​អះអាង​ថា រាល់​បញ្ហា​ទាំងអស់​ដែល​កំពុង​កើត​មាន​ចំពោះ​គណបក្សប្រឆាំង​នោះ​នឹង​មាន​ដំណោះស្រាយ​នៅ​ថ្ងៃ​ណាមួយ​ជា​មិន​ខាន ។
ចំពោះ​ការ​លើក​ឡើង​របស់​មន្ត្រីជាន់ខ្ពស់ គណបក្សប្រឆាំង​នេះ ត្រូវ​បាន​លោក សុខ ឥ​សាន អ្នកនាំពាក្យ​គណបក្ស​ប្រជាជនកម្ពុជា លើក​ឡើង​តាម​ប្រព័ន្ធ​តេ​ឡេ​ក្រាម កាល
ពី​ថ្ងៃ​ទី​២០ មេ​សា​ថា មន្ត្រី​គណបក្សប្រឆាំងដែល​មាន​ពិរុទ្ធភាព ហើយ​កំពុង​ស្ថិត​នៅ​ក្រោម​នីតិវិធី​របស់​តុលាការ បាន​និយាយ​ប្រាប់​តំណាងរាស្ត្រ​គណ​ប្ស​ប្រឆាំង​ដែល​បាន​ទៅ​សួរសុខទុក្ខ​ខ្លួន​នៅ​ពន្ធនាគារ​ព្រៃ​ស​ថា មិនបាច់​ឲ្យ​ព្យាយាម​ជួប​ចរចា​នយោបាយ​ជាមួយ​គណបក្ស​ប្រជាជន​កម្ពុជា​ទេ មិន​អាច​ដោះស្រាយ​ចេញ​ឡើយ ។

លោក​បញ្ជាក់​ថា បើ​និយាយ​មែនទែន​ទៅ អ្នក​ជាប់​ពិរុទ្ធភាព​ទាំងនោះ​មានការ​យល់​ដឹង​អំពី​ផ្លូវច្បាប់​ច្រើន​ជាង​តំណាងរាស្ត្រ​ទៅ​ទៀត ដោយ​ចេះ​វិភាគ​ថា រឿង​ណា​ជា​រឿង​ផ្លូវច្បាប់​រឿង​ណា​ជា​រឿង​នយោបាយ​ច្បាស់លាស់​មិន​យល់​ច្របូកច្របល់​ដូច​តំណាងរាស្ត្រ​របស់​គេ​នោះ​ឡើយ ។ លោក​បញ្ជាក់​បន្ថែម​ថា បើ​សាមីជន​យល់​ថា​ដូច្នេះ​ទៅ​ហើយ មានអី​ត្រូវ​ស្រពេចស្រពិល​ទៀត គឺ​ពិតជា​រឿង​ផ្លូវច្បាប់​ហើយ ហើយ​កំពុង​ស្ថិត​ក្នុង​ដៃ​តុលាការ មិន​អាច​យក​ការ​ចរចា​មក​ដោះស្រាយ​បាន​ទេ ទុក​ឲ្យ​ដំណើរការ​តាម​នីតិវិធីតុលាការ​តាម​ផ្លូវច្បាប់​ចុះ ។ ជា​រឿង​ផ្លូវច្បាប់ មិន​អាច​កាឡៃ​ទៅ​ជា​រឿង​នយោបាយ​បាន​ទេ កុំ​សង្ឃឹម​ឱ្យ​សោះ ។

ការ​លើក​ឡើង​របស់​មន្ត្រីជាន់ខ្ពស់​គណបក្សប្រឆាំង​និង​គណបក្សកាន់អំណាច​នេះ ខណៈ​ពេល​ស្ថានការណ៍​នយោបាយ​នៅ​ក្នុង​ប្រទេស​កម្ពុជា​កំពុង​តែ​មាន​ភាព​ស្ងប់ស្ងាត់​ពោល​គឺ បក្ស​កាន់​អំណាច​និង​គណបក្សប្រឆាំង​ឈប់​វាយប្រហារ​គ្នា​ដោយ​ពាក្យ​សម្តី​មួយ​រយៈ​ចុង​ក្រោយ​នេះ ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

​នយោបាយ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ