ខេត្តបាត់ដំបង ៖ ក្រុមចោរវ័យក្មេងៗចំនួន៣នាក់ ក្នុងនោះ មានសមាសភាពស្រីម្នាក់ផងបានព្រួតគ្នាវាយដំទៅលើស្ត្រីម្នាក់ដែលមានមុខរបរលក់ប្រហិតតាមចិញ្ចើមថ្នល់ រួចប្លន់យកគ្រឿងអល័ង្ការ និងប្រាក់ដែលទុកក្នុងកាបូបអស់យ៉ាងច្រើនសន្ធឹកសន្ធាប់ កាលពីវេលាម៉ោង៤និង៣០នាទីល្ងាចថ្ងៃទី០៣ វិច្ឆិកា ត្រង់ចំណុចខាងមុខវិទ្យាល័យសម្ដេចឪ…
ខេត្តបាត់ដំបង ៖ ក្រុមចោរវ័យក្មេងៗចំនួន៣នាក់ ក្នុងនោះ មានសមាសភាពស្រីម្នាក់ផងបានព្រួតគ្នាវាយដំទៅលើស្ត្រីម្នាក់ដែលមានមុខរបរលក់ប្រហិតតាមចិញ្ចើមថ្នល់ រួចប្លន់យកគ្រឿងអល័ង្ការ និងប្រាក់ដែលទុកក្នុងកាបូបអស់យ៉ាងច្រើនសន្ធឹកសន្ធាប់ កាលពីវេលាម៉ោង៤និង៣០នាទីល្ងាចថ្ងៃទី០៣ វិច្ឆិកា ត្រង់ចំណុចខាងមុខវិទ្យាល័យសម្ដេចឪ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ហើយពួកគេជិះម៉ូតូគេចខ្លួនដោយសុវត្ថិភាព។
ប្រភពនៅកន្លែងកើតហេតុបានឲ្យដឹងថា ជនរងគ្រោះឈ្មោះ សំ ជ្រាប ហៅ មុំ ស្រីអាយុ៣៨ឆ្នាំ ស្នាក់នៅផ្ទះជួល នៅភូមិអូរតាគាំ២ សង្កាត់ទូលតាឯក ក្រុងបាត់ដំបង ។ ប្រភពបានឲ្យដឹងទៀតថា ក្រុមចោរចំនួនបីនាក់ និងមានស្រីម្នាក់ផង ពាក់ម៉ាស់មុខ និងមានវ័យក្មេងៗ ។ ពួកវាបានជិះម៉ូតូទៅឈប់ក្បែររទេះលក់ប្រហិតរបស់ជនរងគ្រោះ រួចចុះទៅទាញដងអំបោសនៅក្បែរនោះសំពងទៅលើជនរងគ្រោះយ៉ាងចាស់ដៃ ។
គ្រានោះគ្នាវាខ្លះ បានស្ទុះទៅទាញយកកាបូបជនរងគ្រោះដកយកលុយ និងគ្រឿងអល័ង្ការអស់ ហើយក៏បោះការបូបឲ្យជនរងគ្រោះវិញ រួចនាំគ្នាឡើងជិះម៉ូតូគេចខ្លួនដោយសុវត្ថិភាព មិនរំខានដល់កម្លាំងល្បាតរបស់អធិការក្រុងបន្តិចឡើយ ។ ភ្លាមៗនៅកន្លែងកើតហេតុ ស្ត្រីរងគ្រោះបាននិយាយប្រាប់មហាជនដែលកំពុងចោមរោមសួរនាំថា ពេលគាត់កំពុងមមាញឹកចម្អិនប្រហិតលក់ ស្រាប់តែមានជនបីនាក់ដែលគាត់មិនបានចាប់អារម្មណ៏ មានស្រីម្នាក់ផងបានជិះម៉ូតូមកឈប់ក្បែរ រួចចុះដើរសំដៅមករកគាត់ ។
គាត់បានសួរទៅកាន់ពួកគេទាំងបីនាក់នោះ ទាំងមិនបានយកភ្នែកមើលទេ ព្រោះជាប់រវល់ តើអូនទិញប្រហិតមែន ? គាត់បានប្រាប់ដូច្នេះថា «ពេលនោះពួកវាមិនតបទេ ។ ផ្ទុយទៅវិញ ពួកវាបែរជាទាញដងអំបោសស្ទុះមកវាយសំពងក្បាលខ្ញុំគ្មានប្រណីដៃ ខណៈមីស្រីម្នាក់ពាក់ម៉ាស់ បានស្ទុះមកខ្ទប់មាត់ខ្ញុំជាប់មិនឲ្យស្រែក។ ពួកវាបានស្ទុះទៅទាញយកកាបូបលុយខ្ញុំ ដែលទុកក្នុងរទេះផ្នែកខាងលើ រួចវាដកយកលុយ និង គ្រឿងអល័ង្ការអស់គ្មានសល់ វាក៏បោះកាបូបឲ្យខ្ញុំវិញ ឡើងជិះម៉ូតូគេចខ្លួនបាត់ភ្លាមៗ ខណៈខ្ញុំរងរបួសជាច្រើនដងអំបោសឡើងទន់ខ្លួន»។
បើតាមចម្លើយបឋមរបស់អ្នកលក់ប្រហិតរូបនេះ ទ្រព្យសម្បត្តិដែលបានបាត់បង់រួមមាន «ប្រាក់ដុល្លារចំនួន៤០០ដុល្លារ ប្រាក់ខ្មែរចំនួន១,១៥លានរៀល ខ្សែ.កមាសទម្ងន់១តម្លឹង ខ្សែដៃមាសទម្ងន់១,៥តម្លឹង និង កងដៃ០៣ឈុត»។
អ្នកស្រី សំ ជ្រាប ហៅ មុំ បានបញ្ជាក់ថា ប្រាក់និងគ្រឿងអល័ង្ការទាំងនោះ គឺបានមកពីការសន្សំច្រើនឆ្នាំ ពីមុខរបរលក់ប្រហិតតាមចិញ្ចើមថ្នល់ ។ ដោយឡែក ប្រាក់ចំនួន៤០០ដុល្លារ គឺគាត់ទើបលក់មាសប៉ុន្មានជីថ្មីៗ ដើម្បីយកទៅសងបំណុលគេ តែពេលនេះរលាយអស់ហើយអស់ទាំងប្រាក់ត្រៀមសងបំណុលគេ អស់ទាំងគ្រឿងអល័ង្ការដែលគាត់បានសន្សំប្រាក់រាប់ឆ្នាំទិញទុក ។
នៅក្នុងអំពើ«ប្លន់»យ៉ាងព្រហើន គ្មានអាណិតអាសូរទៅលើស្ត្រីលក់ប្រហិតតាមចិញ្ចើមថ្នល់ទាំងថ្ងៃ ចំកណ្ដាលក្រុងបាត់ដំបង ដែលបង្កឡើងដោយក្រុមចោរហាររយវ័យក្មេងៗ មានស្រីមានប្រុសខាងលើនេះ ត្រូវបានគេកត់សម្គាល់ថា វាជារូបភាពថ្មីមួយរបស់ក្រុមចោរប្រុស ស្រី ដែលប្រព្រឹត្តអំពើ«ប្លន់» ទាំងថ្ងៃយ៉ាងគគ្លើន ស្របពេលគេសង្កេតឃើញកម្លាំងសមត្ថកិច្ចស្ទើរគ្រប់ស្ថាប័ន និងគ្រប់អង្គភាពជំនាញ ហាក់ទន់ដៃទន់ជើងទម្លាក់ចោលនូវវិធានការទប់ស្កាត់ ឬ ផែនការបង្ក្រាប ។
គេតែងប្រទះភ្នែកឃើញកម្លាំងនគរបាលមួយក្រុមក្នុងឯកសណ្ឋានគួរឲ្យស្ញប់ស្ញែងក្រៃលែង ជិះម៉ូតូធំៗប្រដេញគ្នាយ៉ាងឡូយតាមដងផ្លូវនានាស្ទើររាល់ថ្ងៃ ដែលគេអះអាងថា ជា «ក្រុមអន្តរាគមន៏របស់អធិការក្រុងបាត់ដំបង ជិះល្បាត ការពារសន្តិសុខ»។ ប៉ុន្តែបើតាមប្រភពពីមន្ត្រីស្និតនឹងក្រុមនេះ បានបង្ហើបឲ្យដឹងនូវរឿងអាស្រូវផ្ទៃក្នុងយ៉ាងដូច្នេះថា ជា«ក្បូនល្បាត គ្រាន់តែល្អមើល តែមិនល្អស៊ី» ។
ប្រភពនេះបានបើកកកាយថា «បើពិនិត្យមើលសកម្មភាពជិះប្រដេញគ្នា បានបង្ហាញថា ពួកគេចេញល្បាតការពារសន្តិសុខម៉ាំទាំណាស់ តែប្រហោងធ្លុងចេញល្បាតមិនបានប៉ុន្មាននាទីផង ក៏នាំគ្នាវិលចូលកន្លែងវិញបាត់ទៅហើយ ព្រោះគ្មានការយកចិត្តទុកដាក់ពីថ្នាក់ដឹកនាំ ហើយពេលខ្លះគ្មានទាំងសាំងចាក់ម៉ូតូផង។ បើនិយាយពីបទល្មើសវិញ កើតឡើងស្ទើររាល់យប់ថ្ងៃ ហើយសួរចុះបើដឹង ?
ឧទាហរណ៍ដូចជា ករណីក្រុមចោរប្លន់អ្នកលក់ប្រហិតខាងលើនេះជាដើម បើកុំតែមានអ្នកសារព័ត៏មានថតបង្ហោះតាមបណ្ដាញសង្គម កុំអីសារ៉ូ» ។ ដោយឡែក បើនិយាយពីកម្លាំងជំនាញ នៅការិយាល័យនគរបាលព្រហ្មទណ្ឌកំរិតធ្ងន់ នៃស្នងការខេត្តឯណោះវិញ ដែលកំពុងស្ថិតក្រោមការគ្រប់គ្រងរបស់លោកវរៈសេនីយឯក កោ ស៊ុនកាំង ហាក់កំពុងផ្ទុះចម្លោះផ្ទៃក្នុងយ៉ាងច្របូកច្របល់ និងគ្មានសកម្មភាពអ្វីទាំងអស់ចំពោះភារកិច្ចរបស់ខ្លួន ។
បើតាមប្រភពផ្ទៃក្នុងបានឲ្យដឹងនៅពេលនេះថា មន្ត្រីជំនាញ នៃការិយាល័យនេះ ហាក់គ្មានលែងរវ៉រវល់នឹងការងារអស់ហើយ ព្រោះប្រធានការិយាល័យ និង កូនចៅក្រោមឪវាទកំពុងផ្ទុះជម្លោះផ្ទៃក្នុង រីឯលោកស្នងការខេត្ត ហាក់សម្ងំស្ងៀមធ្វើមិនដឹងមិនឮឡើយចំពោះជម្លោះផ្ទៃក្នុងនេះ។
ដូច្នេះហើយទើប មន្ត្រីនៅក្នុងការិយាល័យនេះ ធ្វើការទៅឆ្វេងទៅស្ដាំមិនចុះសម្រុងគ្នា សូម្បីករណីប្លន់ខាងលើនេះ ក៏មេការិយាល័យនេះសម្ងំឈឹងគ្មានវិធានការអ្វីដែរ ។ ជុំវិញករណីក្រុមចោរប្លន់អ្នកលក់ប្រហិតតាមចិញ្ចើមថ្នល់ខាងលើនេះ ក្រោយពីមានការផ្អើលឆោឡោខ្លាំងនៅកន្លែងកើតហេតុ ក្រោយមកគេប្រទះឃើញវត្តមានសមត្ថកិច្ចប៉ុន្មាននាក់ បានទៅដល់ទីនោះ ដើម្បីសាកសួរព័ត៏មាននានា នៅក្នុងកន្លែងកើតហេតុ។
ស្ត្រីរងគ្រោះត្រូវបានគេនាំទៅកន្លែងសមត្ថកិច្ចដើម្បីសួរនាំ នឹងដាក់ពាក្យបណ្ដឹង។ ប៉ុន្តែរហូតមកដល់ពេលនេះ បើតាមប្រភពពីសមត្ថកិច្ចបានប្រាប់ថា ហាក់គ្មានតម្រុយពីមុខសញ្ញាក្រុមចោរប្លន់ទាំងបីនាក់នោះនៅឡើយទេ តែមន្ត្រីជំនាញ បាននិងកំពុងធ្វើការស៊ើបអង្កេតលើមុខសញ្ញាក្រុមចោរប្រុស ចោរស្រីទាំងបីនាក់នោះហើយ៕
ចែករំលែកព័តមាននេះ