សហរដ្ឋអាមេរិក ៖ កសិករអាមេរិកដែលកំពុងជួបប្រទះនឹងបញ្ហាទឹកដោះគោតម្លៃទាបកំពុងបារម្ភពីការអះអាងរបស់លោកប្រធានាធិបតី Donald Trump ថា នឹង
ចរចាលើកិច្ចព្រមព្រៀង NAFTA ឡើងវិញ អាចនឹងប៉ះពាល់ដល់ការធ្វើពាណិជ្ជកម្មជាមួយម៉ិកស៊ិក ដែលជាទីផ្សារនាំចេញធំជាងគេ ។
យោងតាមសហព័ន្ធអ្នកផលិតទឹកដោះគោជាតិអាមេរិកឲ្យដឹងថា ប្រមាណ១៥%នៃផលិតកម្មទឹកដោះគោ និងផលិតផលធ្វើពីទឹកដោះគោរបស់អាមេរិក គឺត្រូវបាននាំចេញ១ភាគ៣ទៅកាន់ម៉ិកស៊ិក ស្មើ១,២ប៊ីលានដុល្លារ ដែលធ្វើឲ្យពាណិជ្ជកម្មជាមួយម៉ិកស៊ិកទទួលបានអាទិភាពជាងគេ ។
ក្រសួងកសិកម្មអាមេរិកឲ្យដឹងថា វាស្មើជិតទ្វេដងនៃការនាំចេញទៅកាន់ប្រទេសកាណាដា ។
លោក Jaime Castaneda ឧត្តមអនុប្រធានទទួលខុសត្រូវគោលនយោបាយក្នុងស្រុក និងអន្តរជាតិនៃសហព័ន្ធខាងលើឲ្យដឹងថា ៖ «ប្រាក់ចំណូលរបស់កសិករ មិនថាពួកគេនៅក្នុង Vermont ឬ California ទេ គឺសុទ្ធតែពឹងផ្អែកយ៉ាងខ្លាំងលើការនាំចេញទៅកាន់ម៉ិកស៊ិក » ។
លោកបន្តថា ប្រសិនបើការនាំចេញត្រូវបានកាត់បន្ថយ១,២% ឬ៣%នោះ ពួកយើងនឹងមើលឃើញតម្លៃធ្លាក់ចុះ ។
លោក Harold Howrigan Jr ជាកសិករម្នាក់និយាយថា ៖ « ម៉ិកស៊ិក គឺជាកន្លែងនាំចេញធំជាងគេសម្រាប់ទឹកដោះគោ ផលិតផលធ្វើពីទឹកដោះគោ និងផលិតផលដទៃទៀតដូចជាពោត និងសណ្តែកសៀង ហើយពួកយើងត្រូវការទីផ្សារនេះ » ។
យោងតាមក្រុមប្រឹក្សាការនាំចេញទឹកដោះគោ និងផលិតផលធ្វើពីទឹកដោះគោ ឲ្យដឹងថា ការធ្វើពាណិជ្ជកម្មក្នុងផ្នែកនេះរបស់សហរដ្ឋអាមេរិកជាមួយម៉ិកស៊ិកបានកើនឡើង ៥៥៨% តាំងពី NAFTA បានអនុម័តក្នុងឆ្នាំ១៩៩៤ ។
កាលពីសប្តាហ៍មុន លោក Trump សន្យាថា នឹងមានការភ្ញាក់ផ្អើលដ៏ល្អមួយពីកិច្ចចរចាលើ NAFTA ឡើងវិញ ។ លោកនិយាយថា NAFTA បានធ្វើឲ្យពលករអាមេរិកបាត់បង់អត្ថប្រយោជន៍ ។
លោក Scott Brown សេដ្ឋវិទូម្នាក់ក្នុងសាកលវិទ្យាល័យ Missouri ឲ្យដឹងថា រាល់សកម្មភាពដែលកាត់បន្ថយការធ្វើពាណិជ្ជកម្មជាមួយម៉ិកស៊ិក នឹងប៉ះពាល់កសិករដែលផលិតទឹកដោះគោ និងផលិតផលធ្វើពីទឹកដោះគោនៅសហរដ្ឋអាមេរិក ។
លោក Castaneda បន្ថែមថា ៖ « ពួកយើងមើលឃើញម៉ិកស៊ិកគឺជាដៃគូមួយ មិនមែនត្រឹមតែជាអតិថិជនទេ » ៕
ចែករំលែកព័តមាននេះ