រាជធានីភ្នំពេញ ៖ រដ្ឋមន្ត្រីក្រសួងឧស្សាហកម្ម និងសិប្បកម្មថ្លែងថា ការចុះបញ្ជីរបស់សហគ្រាសធុនតូចនិងមធ្យម តាមច្រកចេញចូលតែមួយរបស់ក្រសួងមានកំណើន ប៉ុន្តែមិនទាន់គ្រប់សេចក្តីត្រូវការ និង
រាជធានីភ្នំពេញ ៖ រដ្ឋមន្ត្រីក្រសួងឧស្សាហកម្ម និងសិប្បកម្មថ្លែងថា ការចុះបញ្ជីរបស់សហគ្រាសធុនតូចនិងមធ្យម តាមច្រកចេញចូលតែមួយរបស់ក្រសួងមានកំណើន ប៉ុន្តែមិនទាន់គ្រប់សេចក្តីត្រូវការ និងការចង់បានរបស់រាជរដ្ឋាភិបាលទេ ព្រោះនៅសល់ប្រមាណ៤ទៅ៥សែនសហគ្រាសទៀតនៅក្រៅក្របខ័ណ្ឌច្បាប់ ។
ថ្លែងប្រាប់អ្នកសារព័ត៌មាននៅក្រោយសន្និបាតបូកសរុបលទ្ធផលការងារឆ្នាំ២០១៦ និងទិសដៅអនុវត្តការងារឆ្នាំ២០១៧ កាលពីថ្ងៃទី១៨ មេសា កន្លងមកនេះ លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បញ្ជាក់ថា អ្វីដែលក្រសួងធ្វើនៅពេលចាប់ផ្តើមមានច្រកចេញចូលតែមួយតាមស្រុក-ខណ្ឌ ក៏នៅតែមិនគ្រប់ ព្រោះម្ចាស់សហគ្រាសនៅតាមឃុំ គាត់មិនមកដល់ស្រុក ។ ដូច្នេះ សហគ្រាសធុនតូច និងមធ្យមនៅតែអត់មានការចុះបញ្ជី ។ លោកបន្តថា អ្វីដែលក្រសួងឧស្សាហកម្ម និងសិប្បកម្មគិតគូរ គឺការចាប់ផ្តើមផ្ទេរភារកិច្ចទៅមន្ត្រីតាមថ្នាក់ខេត្ត ចុះទៅដល់ទីតាំងរបស់សហគ្រាសទាំងនោះផ្ទាល់ដើម្បីចុះបញ្ជីដល់កន្លែងតែម្តង ធ្វើម៉េចឲ្យគាត់បានចូលទៅក្នុងក្របខ័ណ្ឌ និងត្រឹមត្រូវតាមច្បាប់ ។
លោកទេសរដ្ឋមន្ត្រី ចម ប្រសិទ្ធ បន្តថា សម្រាប់រយៈពេលមួយឆ្នាំនេះ ក្រសួងបានធ្វើកំណែទម្រង់ជាច្រើនដើម្បីដោះស្រាយបញ្ហាប្រឈមនានាដែលវិស័យឯកជនជួបប្រទះ ជាពិសេស ឲ្យមូលដ្ឋានផលិតកម្ម អាជីវកម្មនៅទូទាំងប្រទេសដំណើរការដោយស្របច្បាប់ ហើយក្រសួងក៏ងាយស្រួលក្នុងការគ្រប់គ្រង និងជួយជំរុញអភិវឌ្ឍន៍វិស័យសហគ្រាសធុនតូច មធ្យម និងសិប្បកម្ម តាមរយៈការផ្តល់បច្ចេកវិទ្យាថ្មី ការបណ្តុះបណ្តាល ការកែលម្អគុណភាព និងការគ្រប់គ្រង ។
លោកឧកញ៉ា តែ តាំងប៉ ប្រធានសម្ព័ន្ធសហគ្រាសធុនតូច និងមធ្យមកម្ពុជា លើកឡើងថា តាមជំរឿនផែនការសហគ្រាសធុនតូច និងមធ្យមឆ្នាំ២០១៥-២០១៦ ដោយមានរាប់បញ្ចូលទាំងធុនតូច មធ្យម និងធំ សរុបទាំងអស់មានចំនួន៥៣ម៉ឺនសហគ្រាស ប៉ុន្តែការចុះបញ្ជីនៅក្រសួងឧស្សាហកម្ម និងសិប្បកម្ម មានប្រមាណតែ៣ម៉ឺន៨ពាន់សហគ្រាសប៉ុណ្ណោះ ។ នៅឆ្នាំ២០១៦កន្លងទៅ ការចុះបញ្ជីទើបតែកើនជាង១ពាន់សហគ្រាស ។
លោកបន្តថា ទោះជាយ៉ាងណា សហគ្រាសធុនតូច និងមធ្យមនៅកម្ពុជាបានពង្រឹងសមត្ថភាព និងគុណភាពផលិតផលរបស់ពួកគេ ដែលធ្វើឲ្យការនាំចូលផលិតផលប្រើប្រាស់ និងគ្រឿងឧបភោគបរិភោគពីប្រទេសថៃធ្លាក់ចុះ ក្នុងប៉ុន្មានឆ្នាំចុងក្រោយនេះ ។
យោងតាមរបាយការណ៍បូកសរុបលទ្ធផលការងាររបស់ក្រសួងឧស្សាហកម្ម និងសិប្បកម្ម ប្រចាំឆ្នាំ២០១៦ និងទិសដៅការងារឆ្នាំ២០១៧ ឲ្យដឹងថា បន្ទាប់ពីក្រសួងបានធ្វើទំនើបកម្មនៃប្រព័ន្ធគ្រប់គ្រងការចុះបញ្ជីតាមប្រព័ន្ធអនឡាញ គិតត្រឹមឆ្នាំ២០១៦ ការផ្តល់ប្រកាសអនុញ្ញាតបង្កើត និងចុះបញ្ជីសហគ្រាសសិប្បកម្មសរុបបានចំនួន៨៩.០៧៣មូលដ្ឋាន ក្នុងនោះផ្តល់ប្រកាសអនុញ្ញាតបង្កើតសហគ្រាសសិប្បកម្មចំនួន៣៩.១៤១មូលដ្ឋាន ចុះបញ្ជីសិប្បកម្មចំនួន៤៩.៩៣២មូលដ្ឋាន និងគ្រប់គ្រងស្ថិតិសិប្បកម្មចំនួន៦៣.២៥៩មូលដ្ឋាន ដោយបានផ្តល់ការងារចំនួន៦០៩.៣២៨កន្លែង ៕
ចែករំលែកព័តមាននេះ