ខេត្តបន្ទាយមានជ័យ ៖ ពលករចំណាកស្រុកជាង១០០នាក់ ត្រូវបានសមត្ថកិច្ចជំនាញការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្ត
ខេត្តបន្ទាយមានជ័យ ៖ ពលករចំណាកស្រុកជាង១០០នាក់ ត្រូវបានសមត្ថកិច្ចជំនាញការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្ត សហការណ៍ជាមួយនគរបាលប៉ុស្តិ៍រដ្ឋបាលឃុំអូរបីជាន់ និងនគរបាលការពារព្រំដែនគោកលេខ៩១១ ប៉ុស្តិ៍ជោគជ័យ និងប៉ុស្តិ៍អូរបីជាន់រួមគ្នាធ្វើការទប់ស្កាត់ ខណៈពួកគេប្រុងឆ្លងដែនខុសច្បាប់តាមច្រករបៀងនៅបន្ទាត់ព្រំដែនក្នុងឃុំអូរបីជាន់ស្រុកអូរជ្រៅនៅថ្ងៃទី២០ មេសា ២០១៧។ ពលករមានជាង១០០នាក់ ក្នុងនោះស្រីជិត៤០នាក់និងកុមារជាង១០នាក់ មកពីខេត្តកំពង់ធំ និងសៀមរាបច្រើនជាងគេ។
ការទប់ស្កាត់ពលករប្រុងឆ្លងដែនខុសច្បាប់ទាំងនេះគឺខណៈពួកគេកំពុងជិះរថយន្តឆ្ពោះទៅច្រករបៀងជោគជ័យ ស្ថិតក្នុងភូមិជោគជ័យដែលនៅទីនោះគ្រប់គ្រងដោយយោធា។ លោកអនុសេនីយ៍ឯក អោក សំណុក នាយរងការិយាល័យប្រឆាំងការជួញដូរមនុស្ស និងការពារអនីតិជន នៃស្នងការនគរបាលខេត្តប្រាប់នៅកន្លែងកើតហេតុថា ការចុះទប់ស្កាត់ពលករចំណាកស្រុកនេះគឺអនុវត្តន៍តាមបទបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្ត។
លោកបន្តថា វិធានការទប់ស្កាត់នេះជាគោលការណ៍គឺអប់រំក្រុមពលករមិនឲ្យឆ្លងដែនដោយប្រថុយប្រថានខុសច្បាប់ ពោលណែនាំឲ្យពួកគេងាកទៅរកបែបបទស្របច្បាប់ដើម្បីឆ្លងដែនតាមច្រកទ្វារអន្តរជាតិវិញបញ្ចៀសគ្រោះថ្នាក់ ក្រែងកើតមានជាយថាហេតុលើទឹកដីរបស់គេ។ លោកបន្តថា ពលករទាំងនេះនឹងធ្វើការអប់រំ ចំណែករាល់ម្ចាស់យានយន្តដឹកជញ្ជូនក្រុមពលករចំនួន៩នាក់នឹងឲ្យធ្វើកិច្ចសន្យានៅនឹងកន្លែង មិនយកប្រាក់មួយរៀលឡើយ បន្ទាប់មកនឹងឲ្យពួកគេវិលត្រលប់ទៅលំនៅដ្ឋានវិញរៀងខ្លួនៗ៕
ចែករំលែកព័តមាននេះ