មិនទាន់សម្ពោធផង សំណង់សួនច្បារអមសងខាងស្ទឹងព្រែកត្នោតបាក់ស្រុតជាបន្តបន្ទាប់
ខេត្ដកណ្ដាល ៖ សំណង់ជើងទេរ និងការ៉ូឡាលម្អអមសងខាងស្ទឹងព្រែកត្នោត ក្រុងតាខ្មៅ ដែលអាជ្ញាធរបានចំណាយថវិកាស្ថាបនាអស់ជាង២០ម៉ឺនដុល្លារ
ខេត្ដកណ្ដាល ៖ សំណង់ជើងទេរ និងការ៉ូឡាលម្អអមសងខាងស្ទឹងព្រែកត្នោត ក្រុងតាខ្មៅ ដែលអាជ្ញាធរបានចំណាយថវិកាស្ថាបនាអស់ជាង២០ម៉ឺនដុល្លារ បានតែជាង១ឆ្នាំប៉ុណ្ណោះ ក៏ប្រេះស្រាំបាក់ស្រុតចូលទៅក្នុងស្ទឹងជាបន្តបន្តបន្ទាប់ ។ ការបាក់ស្រុតនេះ បានកើតឡើងកាលពីថ្ងៃទី១១ ខែមេសា នៅត្រើយខាងជើងស្ទឹង ស្ថិតក្នុងភូមិដើមមៀន សង្កាត់ដើមមៀន ក្រុងតាខ្មៅ ។
ការបាក់ស្រុតសំណង់ និងសួនច្បារលម្អអមសងខាងស្ទឹងព្រែកត្នោតនេះ ត្រូវបានមហាជនរិះគន់ថា ដោយសារតែការស្ថាបនាគ្មានបច្ចេកទេស និងគ្មានគុណភាព គ្មានការត្រួតពិនិត្យឱ្យបានត្រឹមត្រូវ ទើបធ្វើឱ្យខាតបង់ថវិការដ្ឋទទេៗ ។
សំណង់ដែលបាក់ស្រុតកាលពីថ្ងៃទី១១ ខែមេសា គឺមានបេតុងជើងទេរចុះទៅបាតស្ទឹងនិង ការ៉ូឡាក្រាលតាមមាត់ស្ទឹង មានប្រវែងជាង៣០ម៉ែត្រ និងដងទង់ជាតិ ព្រមទាំងសួនច្បារផងដែរ ។ នៅក្បែរកន្លែងដែលបាក់ស្រុតរអិលចូលក្នុងស្ទឹងនោះ ក៏នៅមានស្នាមប្រេះស្រាំវែងៗជាច្រើនកន្លែងទៀត ដែលអាចនឹងបន្តបាក់ស្រុតថែមទៀត ។
គេនៅចាំបានថា កាលពីអំឡុងចុងឆ្នាំ២០១៦ សំណង់ជើងទេរស្ទឹងព្រែកត្នោត និងការ៉ូឡាអមសងខាងស្ទឹង នៅខាងកើតស្ពានប្រវែងប្រមាណ១០០ម៉ែត្រ បានបាក់ស្រុតជាបន្តបន្ទាប់ ខូចខាតស្ទើរទាំងស្រុងហើយរហូតមកដល់ពេលនេះ មិនទាន់មានការ ជួសជុលឡើងវិញនៅឡើយទេ ។
តាមប្រភពព័ត៌មានពីមន្ត្រីសាលាខេត្ត បានឱ្យដឹងថា សំណង់និងសួនច្បារលម្អអមសងខាងស្ទឹងព្រែកត្នោត ស្ថាបនាអស់ថវិកាប្រមាណ២៥ម៉ឺនដុល្លារ ដែលមានលោក លឹម ចាន់សុភី ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត ជាអ្នកត្រួតពិនិត្យបច្ចេកទេស និងគុណភាពសំណង់នេះ ។ ទោះបីជាបែបណាអ្នកយកព័ត៌មានមិនអាចសុំការពន្យល់ពីលោកប្រធានមន្ទីររូបនេះបានទេ ។
ចំណែកលោក ហេង ធៀម អភិបាលក្រុងតាខ្មៅ បានប្រាប់អ្នកយកព័ត៌មានតាមទូរស័ព្ទយ៉ាងខ្លីថា លោកជាប់រវល់ប្រជុំ ។ លោកបានបន្លុយបន្ថែមថា ការបាក់ស្រុតច្រាំងនិងសួនច្បារនេះ គឺបណ្ដាលមកពីចរន្តទឹកស្ទឹងហូរបុកចំបណ្ដាលឱ្យច្រោះបាក់ដី ក៏បាក់ទាំងសំណង់នេះទៅ ។
ប្រជាពលរដ្ឋនិយាយថា បើតាមការពិនិត្យមើលជាក់ស្ដែងលើសំណង់ គឺមិនបានបុកគ្រឹះឱ្យរឹងមាំទេ ទើបបាក់ស្រុតយ៉ាងងាយបែបនេះ ។
គេដឹងថា សំណង់និងសួនអមស្ទឹងព្រែកត្នោតនេះស្ថាបនាហើយមិនទាន់បានធ្វើពិធីសម្ពោធនៅឡើយផង ក៏បាក់ស្រុតជាបន្តបន្ទាប់អស់ទៅវិញ ៕
ចែករំលែកព័តមាននេះ