រដ្ឋមន្ត្រីការបរទេសអាមេរិក លោក REX TILLERSON វាយតម្លៃកាលពីថ្ងៃទី១៩ មេសា ថា កិច្ចព្រមព្រៀងនុយក្លេអ៊ែរជាមួយអីុរ៉ង់បរាជ័យក្នុងការបំពេញបណ្តាទិសដៅរបស់ខ្លួន ។ លោកប្រកាសបែបនេះ បន្ទាប់ពីប្រធានាធិបតីលោកដូណាល់ ត្រាំ បញ្ជាឱ្យវាយតម្លៃឡើងវិញលើជំហររបស់ក្រុងវ៉ាស៊ីនតោនប្រឈមមុខនឹងក្រុងតេហេរ៉ង់ ។
សេតវិមានទទួលស្គាល់កាលពីថ្ងៃទី១៨ មេសា ថា អីុរ៉ង់គោរពបណ្តាការសន្យាក្នុងកិច្ចព្រមព្រៀងដែលចរចាដោយអតីតប្រធានាធិបតីលោកបារ៉ាក់ អូបាម៉ា ។ ក៏ប៉ុន្តែប្រមុខការទូតអាមេរិកយល់ថា កិច្ចព្រមព្រៀងគ្រាន់តែជារបៀបទិញអីុរ៉ង់ ហើយគ្រាន់តែជាការពន្យារពេលការអភិវឌ្ឍន៍កម្មវិធីនុយក្លេអ៊ែរអីុរ៉ង់ប៉ុណ្ណោះ ។
ក្នុងសន្និសីទសារព័ត៌មានមួយនៅក្រុងវ៉ាស៊ីនតោន លោក REX TILLERSON ថ្លែងថា កិច្ចព្រមព្រៀងនុយក្លេអ៊ែរជាមួយអីុរ៉ង់ចុះហត្ថលេខាកាលពីឆ្នាំ២០១៥ បរាជ័យក្នុងការបំពេញទិសដៅប្រទេសអីុរ៉ង់មួយគ្មានអាវុធនុយក្លេអ៊ែរ ។
កាលពីយប់ថ្ងៃទី១៨ មេសា លោក TILLERSON អះអាងថា បានជម្រាបសភាអាមេរិកពីការបើកការសិក្សាមួយតាមសំណើរបស់លោកត្រាំ ដើម្បីចង់ដឹងថាតើការសម្រាលទណ្ឌកម្មប្រឆាំងអីុរ៉ង់ដោយកិច្ចព្រមព្រៀងនុយក្លេអ៊ែរវាសមស្របទៅនឹងផលប្រយោជន៍ជាតិរបស់សហរដ្ឋអាមេរិកដែរឬយ៉ាងណា ។លោកថា អីុរ៉ង់នៅតែជាប្រទេសសំខាន់មួយជួយដល់ភេរវកម្ម ។ លោកចោទអីុរ៉ង់ថា ធ្វើការបង្កហេតុមិនឈប់ឈរ និងគួរឱ្យព្រួយបារម្ភសំដៅបង្កអស្ថេរភាពដល់បណ្តាប្រទេសនៅមជ្ឈិមបូព៌ា។ ម្យ៉ាងទៀតលោកថា អីុរ៉ង់ស្វែងរកបំផ្លាញផលប្រយោជន៍របស់អាមេរិកនៅស៊ីរី អីុរ៉ាក់ និងលីបង់ ៕
ចែករំលែកព័តមាននេះ