រាជធានីភ្នំពេញ ៖ ព្រឹត្តិការណ៍ប្រណាំងកង់អន្តរជាតិរមណីយដ្ឋានភ្នំបូកគោលើកទី១នឹងចាប់ផ្តើមធ្វើឡើងនៅថ្ងៃទី៦ និងទី៧ ខែឧសភា ខាងមុខនេះ ដែលមានកីឡាករមកពីបណ្ដាប្រទេសនានានៅលើពិភពលោកបានមកចុះឈ្មោះចូលរួមប្រកួតយ៉ាងច្រើនកុះករ ។
លោកឧកញ៉ា វង្ស ខាន់ពៅ អគ្គលេខាធិការសហព័ន្ធកីឡាទោចក្រយានកម្ពុជា បានមានប្រសាសន៍នៅក្នុងសន្និសីទសារព័ត៌មានថា នេះគឺជាលើកទី១ហើយដែលសហព័ន្ធកីឡាទោចក្រយានកម្ពុជារៀបចំឱ្យមានព្រឹត្តិការណ៍នេះឡើង និងបានបើកទូលាយអ្នកណាក៏មានសិទ្ធិមកចុះឈ្មោះចូលរួមប្រកួតបានដែរ ។ រហូតមកទល់ពេលនេះ មានអ្នកមកចុះឈ្មោះចូលរួមប្រកួតចំនួន៣២០នាក់ហើយក្នុងនោះភ្ញៀវបរទេស២០០នាក់ និងកម្ពុជា១២០នាក់ ។ អ្នកដែលចុះឈ្មោះចូលរួមប្រកួតក្នុងព្រឹត្តិការណ៍នេះមកពីបណ្ដាប្រទេសចំនួន៩ មានកម្ពុជា (ម្ចាស់ផ្ទះ) អូស្ត្រាលី បារាំង ឡាវ ម៉ាឡេស៊ី នូវែលសេឡង់ សិង្ហបុរី ថៃ និងវៀតណាម ។
ការប្រកួតចែកចេញជា៣ប្រភេទគឺ ប្រភេទទី១ចម្ងាយ៨៥គីឡូម៉ែត្រសម្រាប់កីឡាករជំនាញអាយុក្រោម៣៥ឆ្នាំ ។ ប្រភេទទី២ចម្ងាយ៦៦គីឡូម៉ែត្រ សម្រាប់កីឡាករអាយុចាប់ពី៣៥ឆ្នាំដល់៤៥ឆ្នាំ និងប្រភេទទី៣ចម្ងាយ៥១គីឡូម៉ែត្រ សម្រាប់កីឡាករ-កីឡាការិនីអាជីពមិនគិតពីអាយុ ។ សហព័ន្ធកីឡាទោចក្រយានកម្ពុជាបានដាក់បញ្ចូលក្រុមជម្រើសជាតិចំនួន៥រូប(កីឡាករ៣រូបនិងកីឡាការិនី២រូប)និងកីឡាករថ្នាលចំនួន៤រូបទៀត ឱ្យចូលរួមប្រកួតក្នុងព្រឹត្តិការណ៍នេះដែរ ។
លោកឧកញ៉ាអគ្គលេខាធិការសហព័ន្ធកីឡាទោចក្រយានកម្ពុជា បានបញ្ជាក់ថា គោលបំណងសំខាន់ដែលសហព័ន្ធរៀបចំឱ្យមានការប្រកួតនេះឡើង គឺដើម្បីវាស់ស្ទង់សមត្ថភាព និងកម្រិតបច្ចេកទេសកីឡាករ កីឡាការិនីកម្ពុជាសម្រាប់ត្រៀមចូលរួមប្រកួតកីឡាស៊ីហ្គេមលើកទី២៩នៅប្រទេសម៉ាឡេស៊ី ។
ចំណែកកីឡាករថ្នាលកម្ពុជាវិញនឹងមានឱកាសទទួលបាននូវបទពិសោធន៍បន្ថែមសម្រាប់ត្រៀមប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះជាលើកដំបូង ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានមានប្រសាសន៍ថា ឆ្នាំនេះគឺជាឆ្នាំសាកល្បង ប៉ុន្តែទោះជាយ៉ាងណាយើងនឹងខិតខំធ្វើឱ្យព្រឹត្តិការណ៍នេះទទួលបានជោគជ័យ ដើម្បីឱ្យក្លាយជាព្រឹត្តិការណ៍ប្រកួតប្រចាំឆ្នាំ ។ លោកថា វិស័យកីឡាប្រណាំងកង់កម្ពុជាធ្លាប់មានឈ្មោះបោះសំឡេងយ៉ាងខ្លាំងនៅក្នុងទសវត្សទី៦០និង៧០ ។
ដូច្នេះព្រឹត្តិការណ៍មួយនេះគឺជាឱកាសយ៉ាងល្អសម្រាប់កម្ពុជាយើងស្វែងរកបទពិសោធន៍បន្ថែមឱ្យបានច្រើនពីកីឡាករមកពីបណ្ដាប្រទេសនានាលើពិភពលោក ៕
ចែករំលែកព័តមាននេះ