ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួនក្រោយពីប្រពន្ធប្ដឹងពីបទប្រើហិង្សា ប៉ុន្តែបែរជាបែកធ្លាយរឿងលាក់ទុកអាវុធខុសច្បាប់ទៅវិញ និងឈានដល់ការឃាត់ខ្លួនបក្សពួកប្ដីម្នាក់ទៀត ពាក់ព័ន្ធនឹងការប្រើប្រាស់អាវុធនេះ ហេតុការណ៍នេះ បានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី១៩ ខែមេសា ឆ្នាំ២០១៧ នៅចំណុចភូមិអូរដា ឃុំបួរ ស្រុកភ្នំព្រឹក។
ជនសង្ស័យដែលសមត្ថកិច្ចឃាត់ខ្លួន ១-ឈ្មោះ ទៀន សាន អាយុ៥៣ឆ្នាំ ត្រូវជាប្តីដែលប្រពន្ធប្តឹងពីបទប្រើហិង្សា និង២-ឈ្មោះ ពេជ្រ ប៉ាក់ អាយុ៥៧ឆ្នាំ បក្សពួករបស់ប្តី ។
បើតាមសមត្ថកិច្ចបាននិយាយថា ដំបូងសមត្ថកិច្ចមូលដ្ឋានបានឃាត់ខ្លួនឈ្មោះ ទៀន សាន ក្រោយពីប្រពន្ធប្ដឹងពីបទប្រើហិង្សាទៅលើប្រពន្ធខ្លួន។ ប៉ុន្តែក្រោយពីសួរនាំចុះឡើង បែរជាបែកធ្លាយរឿងជននេះ លួចលាក់ទុកកាំភ្លើងដោយខុសច្បាប់ និងឈានដល់ការឃាត់ខ្លួនឈ្មោះ ពេជ្រ ប៉ាក់ ម្នាក់ទៀត ដែលបានសមគំនិតក្នុងការលាក់ទុកកាំភ្លើងនេះ។
សេចក្ដីរាយការណ៍ពីមន្ត្រីមូលដ្ឋានបានឲ្យដឹងថា ទៀន សាន តែងតេប្រើហិង្សាទៅប្រពន្ធជាញឹកញ៉ាប់ ហើយពេលខ្លះថែមទាំងយកកាំភ្លើងអាការមកគំរាមប្រពន្ធទៀតផង រហូតដល់ប្រពន្ធទ្រាំមិនបាន ក៏សម្រេចប្ដឹងសមត្ថកិច្ចតែម្ដង។
ប្រភពដដែលបានឲ្យដឹងទៀតថា ក្រោយពីឃាត់ខ្លួន ទៀន សាន ក៏បានសារភាពអំពីទង្វើរបស់ខ្លួន ហើយថែមទាំងបានបង្ហាញពីកន្លែងដែលខ្លួនលាក់ទុកកាំភ្លើងទៀតផង។ រីឯជនសង្ស័យឈ្មោះ ពេជ្រ ប៉ាក់ ដែលជាប់ពាក់ព័ន្ធនឹងកាំភ្លើងនេះ ក៏ត្រូវសមត្ថកិច្ចខ្លួនភ្លាមៗផងដែរ បន្ទាប់ទទួលបានចម្លើយពីឈ្មោះទៀន សាន។ កាំភ្លើងអាការនោះត្រូវជនសង្ស័យទាំង២នាក់ រុំថង់ប្លាស្ទិកកប់ក្នុងដីលាក់ទុកក្បែររបងផ្ទះ តែគ្មានគ្រាប់ទេ ហើយមានគុណភាពប្រហែល៤០%។
មន្ត្រីនគរបាលស្រុកភ្នំព្រឹកបានប្រាប់ថា មន្ត្រីជំនាញកំពុងសួរនាំជនសង្ស័យទាំង២នាក់ ដើម្បីកសាងសំណុំរឿងបញ្ជូនមកកាន់ស្នងការខេត្ត និងចាត់ការបន្តតាមនីតិវិធី៕
ចែករំលែកព័តមាននេះ