ប្រទេសជប៉ុន ៖ អតីតរដ្ឋមន្ត្រីពាណិជ្ជកម្ម លោក Akira Amari បានថ្លែងក្នុងបទសម្ភាសន៍មួយថា ប្រទេសជប៉ុន និងសហរដ្ឋអាមេរិកគួរតែបង្កើតច្បាប់មានភាពយុត្តិធម៌ និងតម្លាភាពសម្រាប់ពាណិជ្ជកម្ម និងការវិនិយោគសកល ក្រោមការពិភាក្សាសេដ្ឋកិច្ចថ្មីរវាងប្រទេសទាំងពីរ ។
លោក Amari ធ្លាប់ទទួលបន្ទុកកិច្ចចរចាពាណិជ្ជកម្ម (TPP) ឲ្យដឹងថា ប្រទេសទាំងពីរគួរដាក់ចេញនូវចក្ខុវិស័យពាណិជ្ជកម្ម និងការវិនិយោគដែលត្រូវបានផ្សព្វផ្សាយនៅទូទាំងពិភពលោក ។ លោកថ្លែងថា ៖ « វាជារឿងសំខាន់ក្នុងការបង្កើតច្បាប់ត្រឹមត្រូវ និងអាចព្យាករបាននៅតំបន់អាស៊ីប៉ាស៊ីហ្វិកដែលកំពុងដឹកនាំសេដ្ឋកិច្ចពិភពលោក » ។
លោក Amari សង្កត់ធ្ងន់ថា ៖ « ច្បាប់ត្រូវធ្វើឡើងរួមគ្នាដោយប្រទេសជប៉ុន និងសហរដ្ឋអាមេរិក ហើយគួរលើកឡើងក្នុងកិច្ចពិភាក្សាពាណិជ្ជកម្មទ្វេភាគីរវាងសហរដ្ឋអាមេរិកជាមួយចិន និងប្រទេសផ្សេងទៀត » ។
ប្រទេសទាំងពីរបានរៀបចំសម័យប្រជុំដំបូងនៃកិច្ចពិភាក្សាថ្មីនៅទីក្រុងតូក្យូ កាលពីថ្ងៃអង្គារ ដែលជាលទ្ធផលនៃកិច្ចព្រមព្រៀងរវាងលោកនាយករដ្ឋមន្ត្រី Shinzo Abe និងលោកប្រធានាធិបតីសហរដ្ឋអាមេរិក Donald Trump កាលពីខែកុម្ភៈ ។
លោក Amari និយាយថា សហរដ្ឋអាមេរិកបានត្រៀមខ្លួនជាស្រេចដើម្បីពិភាក្សាពីពាណិជ្ជកម្មទ្វេភាគី ប៉ុន្តែប្រទេសជប៉ុនមិនចាំបាច់ប្រញាប់ពេកទេ ។
លោក Amari បន្តថា ជំនួសឱ្យការផ្តោតលើការទាមទាររបស់អាមេរិកពីការធ្វើពាណិជ្ជកម្មកសិកម្ម និងរថយន្ត ជប៉ុនគួរតែទាមទារឱ្យអាមេរិកបើកទីផ្សាររថយន្តរបស់ខ្លួនឲ្យបានទូលាយបន្ថែមទៀតដើម្បីប្រកួតប្រជែងជាមួយបរទេស ៕
ចែករំលែកព័តមាននេះ